Sam 79 - Nobonob Baibel

Laa nug wan imuppan wan laa, am nuhig wan amu, nug wan amu kekeɗ eppelagppa ii daamanu unuqittom

Imuam Asapnu sam.

¹ O Kayak, iitta aɗi danab ag nahip wan aoppig daatteb. Wan amuam nahip, am na aut daatte. Ao, ag nahip mettid lag nahipnu tituanak daatte, ag lag amu heeg, nahip neekkakppa dubuttid tak ele daatte. Ge, ag heeg, Jerusalem am kinipan ameg okkai hume tak, anamib daatte.

² Ag nahip maɗi nid aqan, beɗulkad ai lattaglagnu maadppig. Ao, nahipad danab ah ag nahipnu oo metta ii uuak kobol dim lamidtteb ele, ag gaɗalkad am doɗ dakkuɗ dilag ee daappig.

³ Ag danab ah kuɗumnab aqaeg, tiilag am le bia Jerusalem talilittak, appa neum; auntai laa mauhppig boumattaknu ii dayom.

⁴ Danab ah ig guguikkak daatteb ele, ag ig aon aon iqatteb. Ao, danab ah ig talilikkak daatteb amu, ag ihinignu, “Keeke hamunab,” doon, ag imigtteb.

⁵ O Yawe, na ihinignu oot nauhom daatte; amu haen gane laa ele ukkeb, am nahip oo nauhak am bodoedakku? Nahip oo nauhak am hanhan daakkute? Ao, na ihinignu dahil doya laa aomanu doyak aɗan daattem. Anam amu, oo aeg bak amuam aab ewak bia diditte, am haen gane laa ele ukkeb, nahip oo aeg bak amu am iitta mekku?

⁶ Na danab ah ag na waatppa daaglagnu uutteb ele, na ahilagnu ooppoɗin beeb, ag bu madakkutnu oɗ medattem. Ao, na danab ah ɗo maɗoɗ laappan, ag na onin ii diitteb ele, na ahilagnu ooppoɗin beeb, ag bu madakkutnu unuqidttem.

⁷ Aɗinu? Ag ig Jakop buɗub, ig iqappig. Ao, ag Jakop buɗub dilag wan atu heeg nauhom.

⁸ ⌊O Yawe,⌋ na ig mamenkad aɗi hipunin heppig amu, na amunu nob ig mekkamnanu oɗ medattem! Ao, na oot gai-iitta doon oot mekkan ehanigkkutnu unuqidttem. Aɗinu? Ig uug okkainabppa daattem.

⁹ O Kayak, na am Padal ii maknu ehanittak ihinig daattem. Laa ag na am binan amahlak oppiaawak ele dooglagnu, na ig ehanigkkutnu oɗ medattem. Ao, laa ag nahipnu dabmak anuqak aoglagnu, ig kekeɗ eppelagppa daamtanu, na ihinig hipunin uhuqna megakkutnu, ig na unuqidttem.

¹⁰ Am danab ah wan imuppan wan anen anennu ag na, ihinig Kayak, ag nahipnu oɗ mena atteb, “Kayak ahilag am adekku?” Ag anam hetteb am ena iitta. Am ig amenigppanab laa ag nahipad maɗi nid aqaeg mauhadppig ele amu, na ag eheɗ heppignu nob tutukku madappe, danab aabaab ohppan ag na amu hettemnu dooglagnu oonig daatte.

¹¹ Na danab ah ag maniguittakppa daan, ag aeqagatteb amu, na amu dookkutnu oɗ medattem. Ao, na nahip ɠagattagppa laa ag mauhkkulagnu anak waappa daatteb amu, na ag uhuqadppe, ag ena daaglagnu unuqidttem.

¹² O Naɗi, danab ah ig guguikkak daatteb, ag na aon aon nidappig amu, na ag bu haen eblaih aɗit ele eheɗ heppignu bu madakkutnu oɗ medattem.

¹³ Ig nahipad danab ah ig am sipsip nahip dadppa gikkiɗah latteb bia daattem amu, na anam heppe, ig na amenppa, “Ena hen mekkame,” hanhan akkunig. Ao, menuattak huu laippu bia anen anen ag na aɗi heme doona, ag na binan mekkulag.