Sam 78 - Nobonob Baibel

Kayak, nuhikkud danab ah ele

Imuam Asapnu sam; am maskil laa.

¹ O dahilad danab, ag dahil ippunittak imunu dabmetteg! Ao, ag da aɗi nai attem amu dooglagnu ag daulag humeg!

² Da keeke danab ag dootteb ii dootteb ele ouaqaten ippuanatten, nai madikkul. Ao, keeke tatam tatam beppig, lokkumak daatteb amu, da am mehuqe appi dooglag.

³ Ig kaya imu daunigppa doout, ikkinigppa daatte. Ao, kaya imu, ig mamenkad aɗi ag aegeg doomut.

⁴ Ig nai genab amu ig nid ihinkad doomnanu ii lokkumadmata. Ao, menuattak huu laippu bia bau dotteb ele amu, ig apput dooglag. Ig Yawe keeke okkai okkai heumnu apput dooglag. Ao, ig nuhig ɠagattagnu, amu kobol danab hekkunu elele iitta nug heumnu ele mattignig.

⁵ Nug nuhig ɗo Jakop mettom. Ao, Nug nuhig ɗo Israel mattom. Nug ig mamenkad aɗi amelagppa haknunab ana, ag ɗo amu ahilkad nid naunau ippunadkkulagnu aum.

⁶ Nug ag hekkulagnu aumnu diig am, menuattak huu laippu bia laa daappeg, amu dimugppanu, ag ɗo nai amu ele dooglag. Ao, nid ag haen amuppa ii menuattak amu, ag ele amu dooglag. Am ag ele keeke amuib appeg, ag bekkalkad, aɗelkad ele, ag ele dooglag.

⁷ Ag menuattak huu laippu bia oh ag anam hekkulag dayeb amu, menuattak huu laippu bia anen anen dokkulag amu, ag ele Kayaknu oolagppa genab dooglag. Ag Nug aɗi aɗi heum ii daulag atima. Ao, ag nuhig ɗo dim lamidkkulag.

⁸ Am ag mamelkad aɗi bia ii hemana. Ao, ag alalkad ag oolag ɠagattag eppe, nai tappaeg ne, ii dim lamidppig. Ag oolagppa Kayak, nuhigib ii dabmena, oo metta ii uuak kobol ii dim lamidppig. Ao, ag Nugib dim lamidkkulagnu oo metta ii uuak kobol ii dim lamidppig.

⁹ Epraim ban danab ag bannu keeke oh ele elele daappig, amge ag ban gonana amu, ag eɗun aon, oolna goppig,

¹⁰ ⌊Ag aɗinu anam heppig?⌋ Ag Kayak ele nug tituana nai qakkak heppig ele amu, ag amu tippalppig. Ag nuhig ɗo waappa dayak uuppig ⌊amunu, Nug ag ii ehanattom⌋.

¹¹ Ag Nug aɗi keeke heum amu, ag amunu daulag atiom. Ao, ag Nug ahilagnu kobol danab hekkunu elele iitta heum amu, ag amunu daulag atiom.

¹² Ag mamelkad aɗi ag anttegeg, Nug keeke danab haknu elele iitta kuɗum heum. Ao, uppa Isip wanppa, wan atu onig Soan talilittak, appa Nug keeke danab haknu elele iitta kuɗum heum.

¹³ Nug ag noolagppanab he, yu obate, laih laih dayeye, amuppa omalattom! Ao, Nug he, le gilil bia heqolag laih laih hippaidya daapiɗ!

¹⁴ Nug amunppa lombigppa ag noolag awa ukkom. Ao, tuqan haenppa Nug aab ewewe, amahlak amuppa ag noolag awa ukkom.

¹⁵ Atu taɗakppa amu, Nug he, men aoɗate, ahilag le menppan neum. Ge, le huana yuppa daatte bia, ag le huanak ele daappig.

¹⁶ Nug he, menppan le, lenag laa gotte bia doum. Ao, le amu le naɗi laa bia ukkom.

¹⁷ Nug amu oh he anidppig, amge ag hipunin hak ii uuppig. Ao, ag atu taɗakppa, Kayak Attannab Laa Oh Eɗattak, ag nuhig nai tappaeg ne, Nug waappa daaglagnu uuppig.

¹⁸ Ag doonna, ag eenu oolag huananab heumnu Kayak oɗ mettanna, ag Kayak ma anttak medappig.

¹⁹ Ag nai nau Kayaknu anan, inam appig. “Kayak Nug ig atu taɗakppa ee megakkunu elelete?

²⁰ Amuam genab, Nug Moses amegppa men okkunu a, men o, le menppanu neum. Le amu lenagppa gotte bia neum, amge Nug danab ah nuhikkud ig, bret megakkunu elelete? Nug ig danab ah nuhikkud teppu megakkunu elelete?” Israel danab ah ag atu taɗakppa anam aakku appig.

²¹ Ag anam aeg Yawe Nug doyatta, Nug oo huana nauhom Nuhig oo nauhak amu aab ewak bia Jakopnu danab ah dilagnu doyom. Ge, Nug Israel dilagnu oppoɗi beum.

²² Yawe Nug aɗinu ahilagnu oppoɗi beum? Ag Kayak, ag nuhignu oolagppa genab ii dooppig. Ao, Nug ag atognoadkkunu genab elele ii dooppig.

²³ Nug ee habppanu, ahilagppa nekkununab aum. Ao, Nug he, ee habppanu neum.

²⁴ Nug ee onig maana ag lakkulagnu, Nug he, ee amu neum. Ao, Nug ag lakkulagnu habppanu ee ag mattom.

²⁵ Ag engel dilag ee amu lappig! Kayak Nug ee elelenab ag mattom.

²⁶ Nug he, ulah kaɗag ahom. Ao, Nug nuhig ɠagattagppa he, ulah yau ahom.

²⁷ Nug anam he, ai onig kwel ag uɗin, Israel danab ah taliliadna gappud bia daappig. Ag gu bia neppig. Ao, ai amu yu ihippa ihi daatte, ag amubia, kuɗumnab daappig.

²⁸ Nug he, ai amu ag haen tutu dayaknu aab kalak ahilag amuppa nena, ahilkad peh lag taliliattak neppig.

²⁹ Ai amu ag anam neeg, danab ah ag ai amu aon laeg ukke, baula ii lalob, amge baubau laeg, oolag elelenab aɗom. Aɗinu? Kayak Nug ag oolag heumnab ag mattom.

³⁰ Anam amge ag ee, ag oolag huanak heum ele lanan daaegeg, ai teppu, ag matu elele laappig, baula ii lalob, amge baula laegeg, ai teppu amu ag oɗelagppa dayeye,

³¹ Kayak Nug ahilagnu oo nauhe, Nug ahilkad danab ɠagattag ele aqom. Ao, Nug Israel danab bau aqe mauhppig.

³² Kayak Nug anam he, danab ah ag amu anidppig, amge ag hipunin henanaib daappig. Ao, ag kobol danab hekkunu elele iitta heum anidppig, amge ag oolagppa genab ii dooppig.

³³ Ag oolagppa genab dooglagnu uuppig amunu, Nug he, ag keeke ena ena ag aon, ahilag daakkunu Nug maittak awom amu, ag amu ii aon mauhppig. Ao, Kayak Nug he, ag huana hahaɗnana, eheɗ nau baɗana, ag mauhppig.

³⁴ Haen laala Kayak Nug laa aqe amu, haen amuppa laa daappig ag Kayaknu dabmak dooglagnu meulag ohppa dabmena, ag oolag eɗue, Kayak toppa wappig.

³⁵ Ag Kayak, Nug ahilag kekeɗ aqadmanu ehanittak daatte, ag amu dabmeppig. Ao, ag Kayak Attannab Laa Oh Eɗattak Nug am qagaiettakppanu eɗua uhuqaknu ehanittak ahilag dayom dabmeppig.

³⁶ Anam, amge nakok dimppa ag Nug amegppa nai genab iitta appig. Ao, ag nai hambuppuak Kayak amegppa appig.

³⁷ Ag oolagppa Kayak, nuhigib ii dabmeppig. Ao, ag Nug he, ag Nug ele nug tituanna nai qagappig amu, ag nai amunuib dabmena oo metta ii uuak kobol ii dim lamidppig.

³⁸ Ag amu heppig, amge Kayak Nug ahilagnu oo gai-iitta doya oo matta ehanatta, Nug ahilag hipunin uhuqa mattom. Nug ag oh ii hatte nauhppig. Haen kuɗum Nug oo nauhak nuhig aɗom. Ao, haen kuɗum Nug ahilagnu oppoɗi bak doyom, amge Nug aɗaɗa, ag bu madakkunu dayom bia ii bu mattom.

³⁹ Aɗinu? Nug ahilagnu amu, ag am danab ah mauhtteb ele aakkuib dabmeum. Ao, ag am ulah nakok laa doa ukka, eɗua ii uɗitte bia daappig amu, Nug amu dabmeum.

⁴⁰ O gadon, atu taɗakppa ag haen kuɗum Nug waappa daaglagnu uuna, ag nuhig nai tappaeg neum. Ao, wan meu waknu nakokib elele, amuppa ele ag haen kuɗum heeg, Nug uug doyom.

⁴¹ Haen kuɗum ag Kayak ma anttak medappig. Ao, ag eɗuna heeg, Israel dilag Kayak Oppiaawak Ele, Nug oo nauhom.

⁴² Israel ag nuhig ɠagattagnu dab-ii-meppig. Ao, Israel ag Isip danab ag ag eheɗ hattaegeg deɗ laa Yawe Nug ag qagaiettakppanu eɗua uhuqak ha mattom amu, ag amu ii dabmeppig.

⁴³ Nug nuhignu dabmettaknu kobol danab haknu elele iitta kuɗum uppa Isip heum ele amu, ag amu dab-ii-meppig. Ao, wan atu Soannu, appa Nug keeke danab haknu elele iitta heehe anidppig amu, ag amu ii dabmeppig.

⁴⁴ Nug ahilkad leppan le he, tiig eɗue, auntai laa le amu lakkunu elele iitta daappig.

⁴⁵ Kayak Nug he, Isip wanppa qid ameg naɗi bena, Isip danab ah emalattegeg nauhppig. Nug og huanaknab maatte uɗin, ag heeg, danab ah Isipnu uug okkaippa daappig.

⁴⁶ Kayak Nug he, tap ag datta appa, ag Isip dilag ee lappig. Ao, Nug keeke oh ag ee aon lakkulagnu eppelagppa heppig ele amu, Nug he, tap-lokus ag lana malappig.

⁴⁷ Kayak Nug he, ais, gu teppu ele bia na he, ahilkad grep muɗi nauhppig. Ao, Nug he, ulah ɠagattag, gu ele na, ad sikamo ele nauhadppig.

⁴⁸ Kayak Nug he, ais, gu teppu ele bia na, Isip dilag makau aqom. Yo, Nug he, amemɗi ahilkad doɗ aqom.

⁴⁹ Kayak Nug nuhikkud engel, engel amu ag danab, keeke ele heeg nauhtte amu, Nug he, ag Isip aqappig. Nug Isip dilagnu oo huanaknab nauhe, Nug engel amuppa anam Isip ippuanatta, bu mattom. Ao, engel amuppa Nug oppoɗi bak, oo nauhak, Isip dilagnu kekeɗ mettak ele Isip ippuanatta, Nug ag bu mattom.

⁵⁰ Kayak Nug Isip dilagnu oo anam nauhe, Nug bu aoglagnu ib babaittom. Ao, Nug ag mauhmananu ib oo ii neum. Iitta. Nug oɗe nau danab kuɗum aqe mauhtteb ele aqeb, ag mauhkkulagnu amu, Nug oɗe amu ib mettom.

⁵¹ Kayak Nug Isip danab ah dilag nid ⌊danab⌋ tatamnu he mauhppig. Ao, Isip danab ag am Ham buɗub, amu Kayak Nug he, ahilkad nid danab tatamnu oh mauhppig.

⁵² Nug amu Isip dilagppa heum, amge Nug danab ah nuhikkud sipsip ameg laa diia laih ukkak bia omalatta ugekke, ag Isip uun goppig. Ao, danab nug sipsip diia, laih gotte, amubia Nug nuhikkud danab omalatta dabmadette, ag atu taɗakppa elele ena oippig.

⁵³ Kayak Nug danab ah nuhikkud elele ena omalatta atognoattom amunu, ag ii baɗappig, amge yu kekeɗ ahilkad tonattom.

⁵⁴ Nug ag diia, nuhig wan tomppa ukkom. Wan amuam nuhignu tituanak daatte. Ao, Nug wan qauko qauko ele, Nug nuhig ɠagattagppa danab ah appa daatteb ele eɗadkku amu, nug wan amuppa diia ukkom.

⁵⁵ Nug ⌊ig alankad⌋ ag noolagppan wan anen anen, amunu danab lamatte goppig. Nug anam he, Israel ag om ena yaak heeg, Kayak ib amuppa Nug huu anen anen ahilag wan, ag aulag daakkunu ag mattom. Ao, Nug ag ahilkad wan anen anen matte, danab ah Israel dilag huu okkai anen anennu amu, ag laulkadppa aakku daappig.

⁵⁶ Kayak Nug amu oh ahilagnu heum, amge ag Nug ma anttak medappig. Ag Kayak Attannab Laa Oh Eɗattak waappa daaglagnu uun, ag nuhig nai tappeg neum. Ao, ag nuhig ɗo dim lamidkkulagnu uuppig.

⁵⁷ Ag mamelkad aɗi heppig bia, ag nuhigib ii dabmena oo metta ii uuak kobol ii dim lamidppig, nuhignu ag ele oolagppa genab ii dooppig. Am lat tanig laa pimalaknu elele iitta, lat doɗo ele pehetta ii ema, laa nug lat pimala ekku amu, ewak am ena ii bema; ig alankad ag lat amubia daappig.

⁵⁸ Ag kayak hambuppuak dilag mettid lag nakokppa ag kayak hambuppuak noolagppa dup nona binalag meppig amu, kobol amuppa ag heeg, Kayak oo nauhak doyom. Ao, ag kayak hambuppuak dottolkad noolagppa dup nona binalag meeg, Nug ahilagnu dahil doya laa aomanu doyak aɗa dayom.

⁵⁹ Kayak Nug ag amu heegeg anatta, Nug oo huana nauhe, Nug Israel dimatta, auta awom.

⁶⁰ Nug Silo appa mettid haknu peh lag nuhig uuom. Ao, Nug peh lag nuhig, Nug peh lag amu he, ag danab ah oolagppa qappaeg daattom amu, Nug amu uuom.

⁶¹ Tituanak Nainu Kunup am Nug ɠagattag attem ele epponigtte, amge Nug kekeɗ uuatte, ag Tituanak Nainu Kunup aakku aoppig. Ao, Tituanak Nainu Kunup nuhig ɠagattag okkai naɗi ele epponigtte, amge Nug he, kekeɗ ag aoppig.

⁶² Nug danab ah nuhikkud kekeɗ ahilkad eppelagppa uuatte, ag qep elabppa aqappig. Nug danab ah nuhikkudnab amu, Nug amu dilagnu oo huana nauhom.

⁶³ Aab aɗu keeke ewa nauhtte, amubia kekeɗ ag Israel dilag nid bau heeg mauhppig. Ao, ⌊diig amunu⌋ ah bau ag nid danab diiglagnu elele iitta.

⁶⁴ Kekeɗ ag Israel dilag mana mettak danab qep elabppa duulag watteg, Israel danab amu, ag waalkad ag mahialadkkulagnu elele iitta daappig.

⁶⁵ Ag amu heeg, Naɗi Nug danab niia ahatte bia ahom. Ao, ban danab ɠagattag nug wain lawowa, niia aha ban huana hette, amubia Naɗi Nug ban ɠagattag heum.

⁶⁶ Nug nuhikkud kekeɗ eɗattom. Nug he, ag uɗalag naunab neum. Uɗa nak amuam hanhan daakku.

⁶⁷ Naɗi Nug anam heum, amge Nug Josep buɗub dilag ⌊Israel dilag huu okkai oolagppa anuqak daakkunu⌋ uuom. Ao, nug Israel dilag huu okkai Epraim ⌊anuqak daakkunu⌋ ii tituanattom.

⁶⁸ Nug Israel dilag huu okkai amu ii tituanom. Iitta. Nug Israel dilag huu okkai Juda epeɗiom. Nug qauko Sion, ⌊qauko amuam Juda wanppa daatte,⌋ Nug qauko amunu oo mauhtte amu, Nug qauko amu tituanom.

⁶⁹ Nug nuhig mettid lag qauko attannab hume tak amubia buuom. Ao, Nug wan haen elab daakkunu heum, Nug nuhig lag amubia daakkunu buuom.

⁷⁰ Naɗi Nug nuhig maɗi nid Dawit epeɗiom. Yo, Nug sipsip aɗppanu onigppa eum.

⁷¹ Ge, Nug Dawit sipsip gumattakppan awom. Naɗi Nug Dawit nug nuhikkud danab, ag Jakop buɗub amu, nug ag gumadkkunu diiom. Ao, Nug danab ah nuhikkudnab daatteb, ag Israel danab ah amu, Nug Dawit ag gumadkkunu diiom.

⁷² Dawit nug Israel danab ah dilagnu oo unuqagppa dabmak tutukku aɗaɗa atognoattom. Ao, nug doyak ena ele omalattom.