Sam 77 - Nobonob Baibel

Kayak Nug uug haenppa oo mak danab ah madatte

Imuam Asapnu sam; Nug danab kwaia gumatte onig Jedutun, nuhignu yom.

¹ Da Kayak ehaniɗkkunu gaattem. Ao, da Kayak Nug dahil unuqittak dookkunu oɗ medattem.

² Da uug nauppa dayeye, da Naɗi antten dim lamidkkulnu Nug madittem. Ao, tuqan amu, da bahil ii yeeye, da eppel hume unuqittette, da danab laa eppegppa oo mak aokkulnu uuttem.

³ Da aiqagekke, Kayaknu dabmettem. Ao, da ɠagattag dahil iitta meeme, nuhignu dabmettem. Sila.

⁴ O Kayak, na he, da amel ii nette. Da uug okkai doottem amunu, da nai madikkulnu elele iitta daattem.

⁵ Da anukkan haennu dabmettem. Ao, da anukkan maɗ kuɗum uɗiak da haen amunu dabmettem.

⁶ Anukka da tuqan ahi laala eɗualadmi amu, da ahi amu dabmettem. Ao, da keeke ohnu dabmak unuqag awewe daye, da dagakka inam oɗ medattem.

⁷ “Naɗi Nug ig uuikka autanab awomtai? Anamib daakkute? Ge, Nug baula ihinignu ii helo bia me, Nug ehanikkak kobol iite ha ehanigkku?

⁸ Nuhig oo mauhaknab kobol am iitta meumte? Nug keeke hekkunu nai anan qakkom ele amu, nai amuam hanhan meu ii omate?

⁹ Kayak Nug ihinignu oo gai-iitta doya oo mekka ehanigkkunu daug atiomte? Nug oo nauhom daatte amunute Nug ihinignu oo bodoetta, le ii mette?” awe ami. Sila.

¹⁰ Da anam dabmein, da ami. “Da uug naunabppa nomi, amge ⌊da dabmak eheɗ tuɗitten aopanu,⌋ da Kayak Attannab Laa Oh Eɗattak, Nug keeke okkai okkai heumnu dabmekkul.

¹¹ Da Yawe keeke oh heumnu dabmekkul. Ao, O Yawe, da nahip hak danab laa hekkunu elele iitta anukka na heme amu, da amunu dabmekkul.

¹² Da nahip uɗatnu dabmak unuqag awewe daakkul. Ao, da uɗat ɠagattagnab, na nahip ɠagattagppa heme amu, da dabmein daakkul,” awe ami.

¹³ O Kayak, nahip hak am oppiaawak ele. Amu kayak laa, nug na, ihinig Kayak, nug na ɠagattag okkai ele daattem amu, laa nug amubia daattete? Iitta!

¹⁴ Na am Kayak keeke danab haknu elele iitta amu, na amu hettem ele. Ao, na nahip ɠagattag attemu amu, na danab ah ippunadttem.

¹⁵ Na ɠagattag okkainab ele, amu ɠagattag amuppa na nahipad danab ah qagaiettakppanu eɗua uhuqak dayaknu heme. Nahipad danab ah amu, ag am Jakop, amu Josep ele buɗulti. Sila.

¹⁶ O Kayak, na le gukkuidna wame. Ao, na le gukkuidna wae, le uɗalom. Le uɗale, le unuqagnab amu, aben amu hahaɗom.

¹⁷ ⌊Haen amuppa amu,⌋ lombig ag gu gokkaɗeg neum. Habppa hakkaɗ naɗi qaaqa ukkom. Amu amemɗi, amuam nahip lat doɗo bia amu, amemɗi amu eheɗ awa amahlom.

¹⁸ ⌊Genab,⌋ hakkaɗ am habppa huana qaaqa ukkom. Amemɗi awa, wan oh amahlom. Wannu amu, wan hahaɗaɗa, uɗalom.

¹⁹ Nahip ib am yu gamagppa ukkom. Ao, na ippun am le naɗi gamagppa ukkom. Nahip ib am anam, amge auntai laa na baen abenab anidkkunu elele iitta dayom!

²⁰ Na nahipad danab ah sipsip ameg laa diia ukkak bia omaladme. Na Moses, Aron ele ehanate, aa amu hepiɗ.