Sam 76 - Nobonob Baibel

Kayak Nug laa oh eɗadtte

Imuam Asapnu sam; Asap nug danab kwaia gumattenu yom. Danab laa ag musik haknu keeke muɗi ele qebeppeg, laa ag sam imu ahi ettaglagnu daatte. Imuam ahi laa.

¹ Juda danab ah ag Kayak dootteb. Yo, Nug onig am Israel ippa okkai daatte.

² Jerusalem amu, Nug appa daatte. Yo, qauko Sion am Nug appag.

³ Am Jerusalem appa Nug kekeɗ dilag lat aeg qiialatta, Nug nuhig kekeɗ dilag guppiɗ, qep elab ele he nauheg, bannu keeke ele he nauhppig. Sila.

⁴ O Kayak, na binan amahlak oppiaawak ele. Ao, na am dagom onin ɠagattag ele. Ge, na wan ɠagattag laa oh eɗattak.

⁵ Na kekeɗ ihinkad, ag am ban danab ɠagattagnab, na ahilag ɠagattag amu eɗidna, ahilkad keeke aome. Ag ig noonigppa mauhna niitteb. Laippu laa eppeg huma, ig oigkkunu elele ii daatte.

⁶ O Jakopnu Kayak, haen na haknunab ae amu, kekeɗ ihinkad dilag hos ag mauhatteg, ahilkad bannu karis ulum aɗak danab, ag ele mauhppig.

⁷ Danab ah ag na huana baɗidttebnu diig am miagib daatte! Haen na oppoɗin bette amu, aun nug na noomppa hibaitta daakkunu elele?

⁸ Na hab attan daanna, na nai doon malan, hettoɗin, epeɗin, elele mettan, na nai ana, nahipad kekeɗ ag bu aoglagnu ame. Wanppan danab ah ag amu doona, ag hahaɗna, na noomppa toettan daappig.

⁹ O Kayak, haen na wanppan danab dilag nai doon malan, na hettoɗiadna epeɗiadkkutnu ahame ele amu, ag baɗappig. Ao, haen na laa ag danab okkai waalagppa eheɗ daatteb ele, na ag ehanadppe, ag eheɗ ii daamnanu ahame amu, laa ag beɗulag hahaɗom. Sila.

¹⁰ Danab ah ag nahip oppoɗi bak eheɗ haknu anidtteb amu, ag na onin humidtteb. Ao, laa ag nahip oppoɗi bak anidna dootteb ele amu, ag nau haknu uutteb.

¹¹ Ag Yawe, ahilag Kayak, ag Nug amegppa keeke genabnab hekkulagnu nai anan qakkeg! Amu ag aɗi keeke hekkulagnu akkulag amu, ag heig! Ao, danab ah wan laala miag miag daatteb oh ag nuhig keeke ena ena akkan uɗin metteg! Nuhignuib danab ag ebehilag oh bodoetta le mekkunu elele; laa iitta.

¹² Nug he, ikki danab ag Nug waappa daatteb. Ao, king wanppanu ag nuhignu ebehilag oh bodoetta le mette.