Sam 75 - Nobonob Baibel

Kayak Nug oppiaknab daatte

Imuam Asapnu sam; Asap nug danab kwaia gumattenu yom. Ahi imu baag am, “Keeke Aib Heppe Nauhom”. Imuam ahi laa.

¹ O Kayak, na ig gukkuigna daattem amunu, ig nahipnu, “Ena heme,” aot attem! Ao ig, “Ena heme,” anak na medattem. Danab ah ag na kobol danab haknu elele iitta kuɗum hettem amu, ag amunu laa amelagppa maditteb.

² Amu Kayak atte. “Daib da hettoɗiak ganeb haknu attem; daib da nai doya mala hettoɗia epeɗia elele mettak tutukku hettem.

³ Haen wan nug uɗalele, danab ah wanppa daatteb ele ag uug doyegeg, daib da wan ɠagattag medattem. Sila.

⁴ Da beɗuppa tak danab amelagppa, ‘Ag anen anen akka akka ag ahilagnu binalag mak kobol uueg!’ awe attem. Ao, da nau hak danab dilag amu, da, ‘Ag ahilkad bannu keekeppa ban aib heppig!’ awe attem.

⁵ Ge, ag laa hab attan daatteb ele, ag ag ele aib ban heppig. Ao, ag beɗuppa tak kobol, nai tappe nak kobol ele dim lamidnana, nai mattiak aib heppig.” Kayak Nug anam atte.

⁶ Kayak Nug anam attenu diig am, danab laa nug wanppa adeppa daakku me, nug laa awa, huma qappeb, aben attanppa daakkunu elele iitta.

⁷ Amu Kayak Nug amunu attenu diig laa am, Kayak Nugib Nug danab dilag nai doya mala hettoɗiatta epeɗiatta elele madatte. Nug he, danab laa nug danab okkai daatte, Nug he, laa nug okkai daatte amu, nug na qa, onig okkai iitta daatte.

⁸ Aria, amu anaknu diig laa am, Yawe Nug danab ah dilag nai doya mala hettoɗiatta epeɗiatta elele madatte amu, amuam kap Nug eppegppa aɗatte bia. Amu kap amuppa wain ɠagattag, keeke laala ele kaboliak daatte. Anam amu, Nug wain gokkaɗa heeb, nau hak danab ah oh ag lakkulagoitte. Ag biɗa naunau oh am lakkulagoitte.

⁹ Amge dahilnu amu, da hanhan Kayak aɗi heumnu akkul. Ge, da hanhan ahi edette, Jakop buɗub dilag Kayak binag mekkul.

¹⁰ Kayak atte. “Da nau hak danab dilag ɠagattag aɗadkkul, amge da danab ag genab tutukku hetteb, da ahilag ɠagattag tuɗidkkul.”