Sam 74 - Nobonob Baibel

Danab laa nug Kayak wanppan wan laa nuhig ehanitteb, kekeɗ ii eɗidmanu unuqittak

Imuam Asapnu sam; am maskil laa.

¹ O Kayak, na ig haen elabnab iikku ii ehanigme. Na ig ii ehanigmenu appe doognignu oɗ medattem. Ao, na ihinignu oot nauhtte diignu appe doognignu unuqidttem.

² Ig nahipadnab danab ah daagnignu anukkanab na tituanigme amu, na ig dabmegakkutnu oɗ medattem. Ao, na ig tituanigme, ig huu okkai laa nahipad danab ahnab daagnignu, na ig qagaiettakppanu eɗua uhuqak hena mekkame amu, na ig dabmegakkutnu unuqidttem! Ge, na wan imuppa Sion qauko appa daame amu, na qauko amu dabmekkutnu oɗ medattem.

³ Na aab okkai laa ag loppaɗeg na autanab awom amu, na aab amu anidna dabmekkutnu oɗ medattem. Ao, kekeɗ ag nahip mettid lag heeg nauhom amu, na lag amu anidkkutnu unuqidttem.

⁴ Nahipad kekeɗ ag na lautppa ig eɗigppignu enan daappig. Ag ig eɗigppig laa ippunadkkunu ahilag pilak appa qabappig.

⁵ Ag danab ag atuppa ad hebebppa oadtteb bia keeke heeg nauhppig.

⁶ Ao, ag hebeb digdigppa ad hoiyak enanag na lautppa daappig ele amu, ag heeg nauhppig.

⁷ Ag nahip mettid lag manaeg ewa iitta meum. Ao, aben na onin oppiaawak ele daakkunu dayom ele amu, ag heeg, aben amuam nahip neekkakppa dubuttid tak ele dayom.

⁸ Ag amu hewona, ag ihinignu, “Ig hepput, ag nauhna autna aoglag!” dabmeppig. Ao, ag ihinig wanppa aben oh ig na Kayak, ig na binan memut ele amu, ag amu oh amotatteg eon malappig.

⁹ Kekeɗ ag anam heppig daye, gemu ig Kayak dabmettaknu kobol danab haknu elele iitta, Kayak Nug ig butti aɗi ehanigkkunu ippunigkkunu laa ii anidttem. Propet oh iitta meppig, ig danab laa waalagppa daattem. Amu haen gane laa ele ukkeb, am anamib daakkun daatte amu, ig ii doottem.

¹⁰ O Kayak, gemu ihinkad kekeɗ ag na aon aon nidatteb; amu haen gane laa ele ukkeb, na ag amu hemananu ib oo nekkut? Ao, na ag uuadppe, ag hanhan na oninnu, “Am keeke hamu,” danab ah laa ippunadkkulagte?

¹¹ Na diig aɗinu nahip ɠagattagppa ii hattai nauhtteb amu, na amu appe doognignu oɗ medattem. Ao, na nahip ɠagattagppa hadappe nauhna autna aoglagnu unuqidttem.

¹² Na, O Kayak, na anukkanabnu uɗie uɗie, gemu ele ihinig king daattem. Na am wanppan danab ah dilag Padal ii maknu ehanittak daattem.

¹³ Na nahip ɠagattagppa he, yu laih laih dayom. Na nahip ɠagattagppa na yuppan doɗ okkai nau ele ikkilkad oɗoɗatte aoɗppig.

¹⁴ Ge, am na, na yuppan doɗ nau, naɗi okkai, ikkiud kuɗum ele onig Lewiatan, na hee, nug ikkiud oɗoɗak daaegeg, na nug gaɗa aon gona, appan doɗ ag lakkulagnu atu taɗakppa buɗie ukkom.

¹⁵ Naib hee, le qeppuɗia bakppanu, lenagppanu ele, le bena goppig. Ao, ⌊amge keeke laa ele⌋ naib na hee, le hanhan gonanaib daatteb, ii qaɗaiedatteb ele amu, na hee, aakku qaɗaiedappig.

¹⁶ Na hee, amun tuqan ele daatte. Na aam, kalam ele abenlahppa matame.

¹⁷ Na wanppan tom oh maadme. Na gakkaɗak, oug haen ele heme.

¹⁸ O Yawe, kekeɗ ag na aon aon nidappig amu, na amu dabmekkutnu oɗ medattem. Ao, na danab ag na, Kayak, ag nahipnu dabmak tutukku iittappa na onin aon aon qedatteb amu, na amu dabmekkutnu unuqidttem.

¹⁹ ⌊Ig Israel amu, ig am nahipad danab ah, ai uppuɗil beɗulag nakok bia ɠagattag iitta daattem,⌋ amu na heppe, danab ah doɗ dakkuɗ bia, ag heigppeg nauhmatanu oɗ medattem. Ao, na nahipad danab ah, laa ag hanhan eheɗ hadatteb amu, na ahilagnu daut atimanu unuqidttem.

²⁰ Wan imuppa wan kuɗumppa gatatu daye, danab laa ag laa guittak nau mauhnoak madatteb amunu, na nug tituana nai qakkak nahip ig ele hemut amu, nai amu eɗua dautppa dokkunu unuqidttem.

²¹ Daɗek danab, laa ag ahilagppa eheɗ hetteb ele amu, ag daɗek amu eɗadppeg, nena qena, uɗa nak nau guittak ele doomananu, na ag ehanadkkutnu oɗ medattem. Ao, na laa ag keekenu tutu mak daatteb ele amu, ag na onin binag mekkulagnu na ehanadkkutnu unuqidttem.

²² O Kayak, na binan lokkumak daamanu na heppe, miag atiak daakkunu oɗ medattem. Ao, na danab ag Kayak dab-ii-menan ii dim lamidtteb ele, ag deɗ oh amun tuqan ele na aon aon nidatteb amu, na amu dabmekkutnu unuqidttem.

²³ Nahipad kekeɗ ag nai nau kuɗum baalag okkaippa maditteb amu, na amunu dabmena, bu madakkutnu oɗ medattem. Ao, na nahipad kekeɗ ag hanhan baalag okkaippa nahipnu keeke nau atteb amu, na nai amunu dabmena, bu madakkutnu unuqidttem.