Sam 73 - Nobonob Baibel

Kayak Nug nai doya mala hettoɗia epeɗia elele mettak kobolnu diig daatte

Imuam Asapnu sam.

¹ Amu genabnab, Kayak Nug am Israel danab ah dilagnu ena hadatte. Ao, Nug am laa ag oolag unuqagppa oppiak ele daatteb dilagnu ena hadatte.

² Amge dahilnu amu, ⌊da Kayak Nug nai doya mala hettoɗia epeɗia elele mettak kobol hanhan dim lamidtte, da amu oolppa genab ii dookkul bia hein,⌋ da nein qekkulnu hemi. Ge, da am laa nug keeke laa eheɗnab taataɗ qetta, na qekkunu hette bia hemi.

³ Aɗinu? Da beɗuppa tak danab ah dilagnu amu, da ahilagnu amel qe ool elele ii dayom. Yo, da nau hak danab ah, enulag okkai ele anatten, da ahilag keekenu amel qe ool elele ii dayom.

⁴ Nau hak danab ag bau dayak ahilagppa qagaiettak laa ii dootteb, ag beɗulag am ena, ɠagattag ele daatteb.

⁵ Ag bau daanna, danab laa oh ag uug laala anidtteb amu, ag uug amubia ii anidtteb. Ao, ag laa oh ag uug anidtteb bia ii anidtteb.

⁶ Ahilag oiyak am anam aakku amunu, ah laa nug kalele mette, amubia dada kobol am ahilag kalele daatte. Ao, danab laa nug lamen nuhig tagatte, amubia guittak nau mauhnoak mattak kobol am ahilag lamen bia daatte.

⁷ Nau hak kobol am ag oolag ambeum dayeye, ag nauib hetteb. Ag hanhan kobol nau hekkulagnu dabmak aotteb.

⁸ Ag danab ah laa hippelag qakkanna, ag nai nau maditteb. Ag am beɗuppa tak kobol henana, ag laa, ag ag oɗelag ii dim lamidkkulag dayeb amu, ag eheɗ hadappeg, ag oɗelag dim lamidkkulagnu atteb.

⁹ Ag Kayak hab attannu nai nau maditteb. Ag beɗuppa tak danab daan, ag wanppan laala oh ahilag nai dim lamidkkulagnu duttunadtteb.

¹⁰ Anam amunu, ahilagppanu ehanittak aoglagnu, ahilkad danab ah ag gukkuadna watteb.

¹¹ Nau hak danab ag atteb. “Kayak Nug ig attem hettem dookkun elele iitta. Ao, Kayak Attannab Laa Oh Eɗattak Nug ig attem hettem am ii dootte,” aon atteb.

¹² Amuam nau hak danab ah dilag ib aakku. Ag wanppa bau daan oiyegeg, uug ii aqeeqe, ag en okkai aonnaib daatteb.

¹³ ⌊Anam amu, dabmak imu dahil dabmakppa beum. “Nau hak danab ag anam henan oitteb amge da,⌋ da hei, da ool am oppiak ele daatte amu, da genab hamu, meu iitta ele anam hemi. Ao, da kobol laa dubuttid ele hepanu, da dakka da awaitten oimi amu, da genab hamu, meu iitta ele anam hemi.

¹⁴ Deɗ oh da hanhan uug doottem. Ao, buttua ohppa da bu awen, guittak doottem.” ⌊Dabmak amu dahil dabmakppa beum.⌋

¹⁵ ⌊Dabmak amu dahil dabmakppa beum⌋ amge, O Kayak, da keeke amu oh alom amu, da danab ah nahipad nena qekkulagnu alom.

¹⁶ Anam dayom amunu, da amu oh dookkulnu hemi, amge amuam elele iittanab dayom.

¹⁷ Anam amu, O Kayak, deɗ laa da nahip mettid lag ooppa noi, na batak haenppa, nau hak danab dilagppa attem bekku amu, na da ippuniɗme.

¹⁸ Am genab, na ag aben eheɗppa maadttem. Na heppe, ag nena qena, ag eɗun ii ahamna.

¹⁹ Ag oiyegeg, na hee, haen amuppa laippun, pahanab ag nena qena nauhtteb. Ao, na hee, uug nau be, ag baɗak eheɗ nau doon, iitta metteb.

²⁰ Ahilag bau dayak gemunu am danab ag tulppa keeke anidtteb, am amubia daatte. Ag ahatteb haenppa amu iitta mette. O Naɗi, na ahappe amu, nau hak danab ag wan imuppa baula ii daamna. Laa ag ippa baula ii anadmana.

²¹ Haen da oolppa guittak doyeye, da ool unuqagppa ninig ele doyen,

²² haen amuppa da kobol kaaka, doyak iitta ele hemi. Ge, da doɗ, dabmak iitta ele, amubia daami.

²³ Amge na da hanhan atognoiɗme, na da eppel naɗiap aɗame.

²⁴ Na nahip ulum nai, da ib ippuniɗkkunu meɗattem, amu dimppa na omaiɗna gona, aben binag amahlak oppiaawak eleppa meiɗppe daakkul.

²⁵ Hab attan appa amu, da laa ele daagnihnu ool ii hette; na aakkuib. Wanppa ele, da laa ele daagnihnu ool ii daatte; na aakkuib.

²⁶ Da beɗul iitta mekku, dabmak dahil ele am iitta mekku, amge na, Kayak, na am dahil ɠagattag. Keeke ena oh da eppelppa daakkunu elele amu, na nakka keeke amu oh abenlag aon dayeye, da ena, elele daattem. Hanhan anamib daakkut.

²⁷ O Kayak, laa ag gukkuidna ii daatteb amu, ag padal mekkulag. Ao, laa ag na ippuanattomnu oo metta ii uuak kobol ii dim lamidtteb amu, na hadappe, ag nauhkkulag

²⁸ Dahilnu amu, da Kayak guguitte daakkulnu am ena! Da Naɗi Yawe Nug dahil padal mak eɗitteb ena daakkulnu ehanittak daakkunu oɗ mettai, Nug anam daatte. Da keeke ena okkai okkai oh Nug hette amu, da laa oh amelagppa akkul.