Sam 72 - Nobonob Baibel

Laa nug kingnu Kayak unuqittom

Sam imuam laa nug Solomonnu yom.

¹ O Kayak, da na king ⌊daatte, na nug⌋ ehanidppe, nug nai doya mala hettoɗia epeɗia elele mettak kobol doya, dabmakppa meeb daakkunu oɗ mettem. Yo, da na ⌊laa king dayom, nug bekka gemu king daatte amu, na⌋ king bekka amu ehanidppe, nug genab tutukku hak kobol doya, dabmakppa meeb daakkunu unuqidttem.

² ⌊Na nug anam⌋ ehanidppe amu, nug nahipad danab ah genab tutukku hak kobolppa epeɗiadkku. Ao, ⌊na nug anam⌋ ehanidppe, nug nahipad danab ah daɗek daatteb amu, nug ahilagnu nai doya mala hettoɗia epeɗia elele mettak kobol dim lamitta, nug eppediadkku.

³ Anam amu qaukoppa, ⌊aben laa ohppa ele⌋ maɗoɗ daakku. Ao, qauko nakok, amuppa, ⌊aben laa ohppa ele⌋ genab tutukku hak kobol nug daakku.

⁴ King nug daɗek danab ah hettoɗiakppa ehanadkku. Ao, nug nid naunau ag anilkad mamelkad keekenu tutu meppig daatteb amu, nug ag ehanatteb, qagaiettakppa ii daamna. Ge, nug laa ag daɗek eheɗ hadatteb ele, nug ag tappalatteb nokkulag.

⁵ ⌊Danab ah ag anam anidna amu,⌋ ag butti aɗi, haen adekkuppa aam qauha, iitta mekku, amge aam ii iitta mette, haen gamag imuppa amu, aam neebeb, danab ah ag nahipnu ebehilag oh bodoetta le mekku. Ao, ag butti aɗi, haen adekkuppa kalam qauha, iitta mekku, amge kalam ii iitta mette, haen gamag imuppa amu, kalam lomppa haɗaɗa dayebeb, danab ah ag nahipnu ebehilag oh bodoetta le mekku. Amuam, hanhan ag anam dooglag.

⁶ King nug gu naana, gikkiɗah le medatte bia, nug anam bia daakku. Yo, nug gu naunau na, wan le medatte bia daakku.

⁷ Genab tutukku hak danab ag nug king dayebeb, ag enaib daaglag. Nahipad danab ah ag haen oh, gemu ukkeb gog tak haenppa ele, ag maɗoɗ daaglag.

⁸ Nug danab ah oh, wan yu laih laih gamagppa daatteb amu, nug ag oh, ahilag king daakku. Ao, nug Yupretis leppan digma ukka, wan batakppan ele, nug amu dilag king daakku.

⁹ Danab ah ag atu taɗakppa oinna daatteb ele, ag nug noobppa dup nokkulag. Nuhig kekeɗ ag nug noobppa nena qena, gappudppa niiglag.

¹⁰ Tarsisnu king, amu wan umanu king ele, ag en takis bia, aon uɗin mettaglag. Ao, aab aɗit, aa oh onilti am Seba, ahilti king ag keeke ena ena aon, nug gumidna wana, keeke amu nuhig daakkunu hamu mettaglag.

¹¹ King oh ag nug noobppa dup nokkulag. Ao, danab ah wan ohppanu ag nug waappa daan Nug oɗe dim lamidkkulag.

¹² Ag anam hekkulagnu diig am, daɗek ag nug unuqidppeg, nug ag ehanatteb, qagaiettakppa ii daamna. Ao, laa ag laa eppelagppa daatteb, auntai laa ehanadkku iitta ele amu, ag nug unuqidppeg, nug ag ehanadkku.

¹³ Nug geha danab gai-iitta doon, keekenu tutu mak daatteb ele, nug ahilagnu oo gai-iitta doya oo matta, ag ehanadkku. Ge, Nug laa ag keekenu tutu mak daatteb ele, nug ag padal memananu ehanadkku.

¹⁴ Nug ag ehanatteb, ag laa ag ɠagattag ele, ag ag eppelagppa ii daamna; laa ag guittak nau mauhnoak ii mattamna. Aɗinu? Nug ahilagnu, “Dahiladnab,” dootte.

¹⁵ Da king nug haen elabnab daakkunu, Seba danab ah ag nug gol mettaglagnu ele ool daatte. Ele amu, da danab ah ag nuhignu hanhan Kayak unuqidkkulagnu, ag deɗ oh hanhan itittak ena ele mettaglagnu ool hette.

¹⁶ Ihinig wanppa ee dattanu meu huana okkulagnu ool daatte. Yo, qauko ikkilkadppa ee bekkulagnu ool hette. Ad meulkad oeg, ig lattem ele, Lebanon appa ena betteb amubia, ippa ena bekkulagnu ool daatte. Ge, gikkiɗah atuppa hamu betteb, ad meu amubia bekkulagnu ool hette.

¹⁷ Danab ah ag hanhan king daulagppa dokkunu ool daatte. Ao, aam amahleb ukkeb ukkeb, batak haenppa batak, ag nuhignu daulagppa dokkunu ool hette. Wan atu ohppan danab ah oh nuhig itittak ena aon, ag nug binag mekkulagnu ool daatte.

¹⁸ Ig Yawe Kayak binag metu! Nug am Israel dilag Kayak. Nugib keeke okkai ena ena hette.

¹⁹ Nug onig am binag amahlak oppiaawak ele; ag Nug hanhan binag meig! Wan atu ohppan danab ah ag Nug binag amahlak oppiaawak ele amu, ag amu anidkkulagnu ool daatte. Genab anam dayaɗ! Genab, anam dayaɗ!

²⁰ Jesi bekka Dawitnu unuqittak anen anen iguppa batom.