Sam 71 - Nobonob Baibel

Danab o ah kainonu unuqittak

¹ O Yawe, na am padal mak eɗitta ena dayaknu ehanittak dahil daattem; na heppe, da deɗ laa uɗa nak ii doopanu unuqidttem.

² Na genab tutukkuib hettem amunu, na da ehaniɗppe, qagaiettakppa ii daapanu oɗ medattem. Ao, na dahil unuqittak imu doon, da padal mepanu ehaniɗkkutnu oɗ medattem.

³ Na da kekeɗ niɗamanu ehanittak dahil daappe, da hanhan nahip-ppa gokkulnu daakkutnu oɗ medattem. Ao, na am kekeɗ niɗamanu ehanittak dahil, aab aɗ ɠagattagnab ele dahil bia ele daattem amunu, na da padal mepanu ehaniɗkkutnu unuqidttem.

⁴ O Kayak dahil, da nau hak danab eppelagppanu ehaniɗppe, qagaiettak amuppa ii daapanu oɗ medattem. Yo, na da nau hak danab ag laa guittak mattaknu uug laa ii dootteb ele dilagppan ehaniɗppe, qagaiettak amuppa ii daapanu unuqidttem.

⁵ O Naɗi Yawe, da na amu hekkutnu oɗ medattemnu diig am ena baknu dabmak aɗa oiyak dahil am, naib daattem. Ao, da nid nakokppan nahipnu oolppa genab doottemib.

⁶ Na da menuiɗak haenppan digmena ehaniɗme, gemu ele hettem. Yo, na da ehaniɗe, da anil menuiɗom. Da na hanhan binan mekkul.

⁷ Danab ah kuɗum ag dahilppa aɗi aɗi keeke uug ele bena goppig anidna, ahilagppa ele bekkulagnu elele doon, ag dabmak huanaknab aotteb, amge na dahil padal mak eɗitteb ena dayaknu ehanittak okkai daattem.

⁸ Da na binan mettem. Yo, da nahip binag amahlak oppiaawak ele deɗ oh amun tuqan ele, da amunu oɗelppa madittem.

⁹ Gemu da kaino memi; na da dimeɗamnanu oɗ medattem. Yo, gemu da kaino mein bodoettami; na da uuiɗmananu unuqidttem.

¹⁰ Da amunu oɗ medattemnu diig am, dahil kekeɗ ag da niɗaglagnu maditteb. Yo, laa ag da iuglagnu hetteb ele, ag amu hekkulagnu maidtteb.

¹¹ Ag atteb. “Kayak uuittom daatte, laa ehanitteb, ig eppenigppa ii daakkunu laa ii daatte amunu, doppeg ig nug dim lamidta gota, nug ⌊aɗat qetu⌋!” aon atteb.

¹² O Kayak, na dahilnu awaidna, uma daamnanu oɗ medattem. O Kayak dahil, na da paha ehaniɗkkutnu unuqidttem.

¹³ Laa ag da naippa yaaiɗtteb ele, ag uɗalag nau neeb, padal mekkulagnu ool daatte. Yo, laa ag da guittak meɗaglagnu hetteb ele, laa ag ahilagnu, “Keeke hamunab,” dooppeg, ag uɗa nak nau guittak ele dooglagnu ool hette.

¹⁴ Amge da amu, da hanhan na heppe, dahilppa ena bekkunu dabmak aɗen oiyeye, amen mekkul. Da na baubau binan mekkul.

¹⁵ Na kobol enanagnab kuɗumnab, da oh doyadkkulnu elele iitta hettem amunu, da na keeke genab tutukku hettemnu oh amelagppa akkul. Yo, deɗ oh amun tuqan ele da laa amelagppa na danab ah nahipad padal memananu ehanadme akkul.

¹⁶ O Naɗi Yawe, da na keeke okkai okkai hemenu binan mekkul. Ao, da laa oh amelagppa, na nakkaib, na kobol genab tutukku dim lamidttemnu akkul.

¹⁷ O Kayak, na da nid nakoknab daaiyi uɗie, gemu ele na dahil ippunittak daame, amu da hanhan laa amelagppa keeke ena ena na hemenu mattien, gemu ⌊nai imu yaak haenppa⌋ ele madittem.

¹⁸ O Kayak, gemu da kaino mei umimil beum; na da paɗailmananu unuqidttem. Na heppe, da menuak laippu da dimulppa doppig imu amelagppa nahip ɠagattagnu appi dooglagnu oɗ medattem. Yo, na heppe, da laa oh ag anilkad butti aɗi menuadkkulag ele amu, da ag amelagppa nahip ɠagattagnu appi dooglagnu unuqidttem.

¹⁹ O Kayak, nahip genab tutukku hak am attannab daatte. Na, laa iitta, na keeke okkai okkai kuɗum heme. Auntai laa nug na bia ii daatte. Laa iitta.

²⁰ Na da uug digdig, nau ele aokkulnu aib ii ae, aakku toniɗppig, amge na da ehaniɗppe, da ena daakkul. Yo, uug okkai okkaippanu, na humiɗna awiɗppe, da eɗue ena daakkul.

²¹ Na da binal tuɗid meɗan, na da baula oo mak meɗakkut.

²² O Kayak, na oo metta ii uuak kobol hanhan dim lamidttem amunu, da harp qeinne, binan mekkul. Yo, O Israel dilag Kayak, oppiaawak ele, da laia qeinne, nahipnu ahi edette, na binan mekkul.

²³ Da ool gamag ahebeb, gamag ahak ahi nahipnu qale edakkul. Aɗinu? Na da qagaiettakppanu eɗua uhuqak hena meɗame.

²⁴ Laa oh ag da guittak meɗaglag heppig amu, ag uɗa nak, ge uɗa nak nau guittak ele aoppig amunu, O Kayak, da deɗ oh amun tuqan ele nahip genab tutukku hak kobolnu akkul.