Sam 7 - Nobonob Baibel

Yawe Nug heeb, nai doya mala hettoɗia epeɗia elele mettak kobol daakkunu unuqittak

Imuam Dawitnu sam; Nug Israel dilag huu okkai Benyamin danab laa onig Kus, nuhignu Yawe dookkunu ahi ettom.

¹ O Yawe, dahil Kayak, na dahil padal mak eɗitteb ena dayaknu ehanittak daattem. Da nahip-ppa ehanittak amu aottem. Laa ag da lamiɗttebnu amu, na da ehaniɗppe, da ag eppelagppa qagaiettak ii daapanu oɗ medattem.

² Na anam ii hekkut dayeb, kekeɗ ag geha laion laa doɗ laa kattiɗtte, ag amubia da kattiɗilkkulag. Ao, na anam ii hekkut dayeb amu, kekeɗ ag doɗ laa layag emala kattiɗe, huppu huppu nette, amubia ag heppeg da nauhkkul, amu auntai laa da ehaniɗeb qagaiettakppa ii daakkulnu ii daama.

³ O Yawe, dahil Kayak, da kobol nau laala iikku ⌊yaakkulnu hettem⌋, da amu laa hemi dayeb amu, da aakku beɗulppa aab ele daattem.

⁴ Am da laa, nug dahilnu ooppa maɗoɗ dootte ele amu, da nuhigppa nau hak laa hemi dayeb, o dahil kekeɗ, nug dahilnu eheɗ laa ii heum, da nuhig keeke yab aomi dayeb amu, da aakku beɗulppa aab ele daattem.

⁵ Am da anam hemi dayeb amu, na heppe, dahil kekeɗ ag da aɗaileg! Ao, na heppe, ag da wanppa tappoɗilppeg mauhei! Sila.

⁶ O Yawe, ⌊da anam ii hemi amunu,⌋ na kekeɗ dilagnu oo nauhak doon, ahan ehaniɗkkutnu oɗ medattem! Ao, dahil kekeɗ ag dahilnu oppoɗilag be amelag kokoɗ ebatte ele amu, na eɗadkkutnu unuqidttem! Ge, O Kayak dahil, na nai doya mala hettoɗia epeɗia elele mettak kobol dim lamidna, ehaniɗkkutnu oɗ medattem!

⁷ Na aabaab danab ah qagmaadppe, ag na talilittak daappeg, na attan daappe, ag na waatppa dayeg!

⁸ Yawe, na ⌊nai doya mala hettoɗia epeɗia elele mettak kobol dim lamidnana,⌋ wanppan danab ah oh ⌊ib amuppa⌋ epeɗiadkkutnu oɗ medattem. O Yawe, da am genab tutukku hak dim lamitten oittem, na amu anidna, na ⌊nai doya mala hettoɗia epeɗia elele mettak kobol dim lamidna, ib amuppa⌋ da epeɗilkkutnu oɗ medattem. Ao, da kobol tutukku hemi, amu O Kayak Attannab Laa Oh Eɗattak, na amu anidna, na ⌊nai doya mala hettoɗia epeɗia elele mettak kobol dim lamidna,⌋ epeɗilkkutnu unuqidttem.

⁹ O Kayak, na genab tutukku hak kobolib dim lamidttem, na danab ah dilag dabmak unuqagnab daatte, na amu neegna anidttem. O Kayak, na heppe, nau hak danab, ag laa guittak nau mauhnoak madatteb, ag amu uuglagnu, na laa oh ag na oɗen dootteb ele, na ag ehanadkkutnu oɗ medattem.

¹⁰ Kayak Attannab Laa Oh Eɗattak Nug dahil guppiɗ daatte. Nug aakkuib laa ag oolagppa kobol tutukku, kobol genab dabmenan dim lamidtteb amu, Nug ag ehanadtte.

¹¹ Kayak Nug genab tutukku hakib epeɗiak danab daatte. Nug ⌊nai doya mala, hettoɗia, epeɗia, elele ii mettak kobolnu, kobol eheɗ laa elenu amu, Nug⌋ deɗ oh ⌊kobol amunu⌋ oppoɗi bak dootte.

¹² Danab laa nug oo ii eɗutte amu, Kayak Nug king laa nug qep elab aeg hoia, laa nug oɗe ii dim lamidtteb ele bu madatte, amubia Kayak Nug danab Nug oɗe dim lamittak ii hette ele bu medatte. O nug king lat oɗ omana, nug wan laa ag nai nug atte ii dim lamidttebnu bu madatte, Nug bu amubia medatte.

¹³ Am king nug kekeɗnu daup aqadkkunu bannu keeke babaitta malom, amubia Kayak Nug danab ah kobol nau hetteb bu madakkunu babaitta daatte. Ao, king nug nuhikkud daup ag lat doɗo amotadppeg eoppeppeg, ewadppeg gona, kekeɗnu lag ɠagattag, aɗ keeke adppa hak amuppa manadkkulagnu bappalattom daatteb, amubia Kayak Nug danab ah kobol nau hetteb bu madakkunu babaitta daatte.

¹⁴ Nau hak danab ag am kobol nau hekkulagnu dabmetteb. Ao, ag kobol nau hekkulagnu maittak aonna, hambuppuak nai maditteb.

¹⁵ Laa ag laa moɗppa nena qena nokkulagnu moɗ aotteb amu, ag akka amuppa nena qena notteb.

¹⁶ Ag uug heeg, laa dilagppa bette amu, uug amu eɗua, ahilagppa bette. Ao, ag laa guittak nau mauhnoak madatteb amu, guittak amu eɗue, ag guittak anam aotteb.

¹⁷ Da geha Yawe Nug genab tutukku hak kobol dim lamidtte amunu, da nuhignu, “Ena heme,” awe akkul. Da geha Yawe, Nug Attannab Laa Oh Eɗattak amu, da Nug onig humaknu ahi edakkul.