Sam 69 - Nobonob Baibel

Danab nug Kayak nug ehanidkkunu ette

Imuam Dawitnu sam; Dawit nug danab kwaia gumattenu yom. Ahi imu baag am onig, “Lili”.

¹ O Kayak, da danab laa nug le lana mauhkku hette, da amubia doottem amunu, na da padal mepanu ehaniɗkkutnu ool genabnab daye oɗ medattem!

² Da danab laa nug laih wan gai-iitta, muag eleppa, wan ɠagattag iitta, nug baeg ma hibaitta dayaya, muag ooppa noa noa mauhkku, da amubia iikku daattem. O iitta, da am danab laa nug le ameg naɗinab laa umanab noa ukkak, hiɗ baaba, hiɗa noawa daatte ele, amuppa danab nug le noa lana mauhkkunu hette, da amubia iikku daattem.

³ ⌊O Kayak, da anam bia dayeye,⌋ da na ehaniɗkkutnu einne daattem. Da nahipnu ei ei, da beɗul gai-iitta me, da baal ele guiɗtte. Da na Kayak, dahil Kayak, da na anidkkulnu neekki neekki, da amel ele gai-iitta meum daatte.

⁴ Danab ah kuɗum, ahilag ebqak amu da ikkil uɗug ikkilppanu eɗittak daatteb, ag oolagppa dahilnu diig iittappa nau ninig ele dootteb. Genab, da eheɗ heminu ag atteb ele amu, da ii hemi, amge kekeɗ dahilad ag hambuppuna, da eheɗ heminu atteb. Ag ɠagattag daana, da iuppeg mauhkkulnu hetteb. Da ahilag keeke laa yab ii aomi, amge ag da yab aomi anana, duttuniɗna, da keeke amu yab aolom bia nob mekkulnu hetteb.

⁵ ⌊Ag atteb ele amu, da ii hemi, amge⌋ O Kayak, da hipunin hei, beɗulppa aab daatte, amu aab amu na noomppa lokkumak laa ii daatte. Ao, da na noomppa nahipnu dab-ii-maama hak kobol dim lamitten hipunin hemi amu, na aakku doottem.

⁶ O Naɗi, na Yawe Nakka Ɠagattag Oh Ele, da na heppe, danab ah ag nahipnu oolagppa genab dootteb ele, ag da beɗulppa, ag uɗa nak nau guittak ele doomananu oɗ medattem. Yo, O Kayak, na Israel dilag Kayak, na heppe, laa ag na anidna dim lamidkkulagnu na mattidtteb ele amu, ag da beɗulppa uɗa nak doomananu unuqidttem.

⁷ Da na dim lamidttem, diig amunu amu, laa ag dahilnu, “Keeke hamunab,” dootteb. Ao, diig amunu ag da uɗa nak nau meɗatteb.

⁸ Anam amunu, dahilnu amu da awalad amalad ele ag inam dabmetteb. “Nug am aab diig danab iitta.” Yo, da anil bekkod ag dahilnu inam aakku dabmetteb. “Nug amu wan laihnu danab.” Ag anam dabmetteb.

⁹ Ag dahilnu anam doottebnu diig am inam. Na lautppa, na ig attemnab daagnignu ippunigttem amu, da amunu yag-nab-bak doye hettem. Amu laa ele amu, danab ah ag na aon aon naunab nidatteb amu, nai nau amu dahilppa aakku uɗia, da yaaiɗtte.

¹⁰ Haen da gayeye, kud daattem, haen amu danab ah laa ag dahilnu, “Keeke hamunab,” dootteb.

¹¹ Haen da oo doyak okkai awewe, lamen heɗiag ele takken daaiyi amu, danab ah ag da aon aon iutteb.

¹² Ikki danab ag dahilnu nai nau maditteb. Ge, laa ag le nau laeg aqatte, ag da onil aon, ahi nauppa mena ettaladtteb.

¹³ Ag anam hetteb, amge O Yawe, da na unuqidttem. Na ii helom bia me, na ehaniɗkkut haenppa, na da keeke meɗakutnu unuqidmi ele, na haen amuppanab ehaniɗna meɗakkutnu ool daatte. O Kayak, na oo mauhaknab kobol dim lamidttem amunu, da na dahilnu oo metta ii uuak kobol dim lamidnana ehaniɗppe da padal ii mepanu oɗ medattem.

¹⁴ Na da ehaniɗppe, da danab nug muag nau ooppa noa mauhtte bia ii hepanu, da na oɗ medattem. Ao, dahil kekeɗ ag am le gamag naɗi umanab noa ukkak, danab laa le lana mauhkkunu elele, ag le amubia daatteb amunu, na da ehaniɗppe, da kekeɗ eppelagppa ii wapanu unuqidttem.

¹⁵ Amu le ui ele da toniɗmanu, o le gamag naɗi, umanab noa ukkak eleppa da amuppa noin mauhpanu, o da mauhen, moɗppa nopanu, da na, da ehaniɗkkutnu oɗ medattem.

¹⁶ O Yawe, na oo mauhaknab kobol nahip dim lamidttem amunu, na kobol ena nahip amu dabmenan, dahil unuqittak dookkutnu oɗ medattem. Ao, na ig danab ah, na ihinignu na oot huana gai-iitta dayeye, oot mekkan ehanigttem amunu, na eɗun, da ehaniɗkkutnu unuqidttem.

¹⁷ Da am nahip maɗi nid, na da dimeɗamnanu oɗ medattem. Da uug okkaippanab daattem amunu, da na paha ehaniɗkkutnu unuqidttem.

¹⁸ Dahil kekeɗ ⌊ag eheɗ heiɗtteb amunu,⌋ na da gukkuiɗak daanna ehaniɗppe, da amunu qagaiettakppanu eɗua uhuqak hena meɗakkutnu oɗ medattem. Ao, da kekeɗ eppelagppa daapanu na ehaniɗkkutnu unuqidttem.

¹⁹ Na doottem, dahilad kekeɗ ag dahilnu, “Keeke hamunab,” doon, ag da uɗa nak, amu uɗa nak nau guittak ele meɗatteb. Na dahilad kekeɗ oh, na doon malame.

²⁰ Ag dahilnu, “Keeke hamunab,” doyegeg, da keeke laa hekkulnu elele iitta. Da oo doyak laala awaknu dabmemi, amge iittanab. Ao, da danab laa, da oo mak meɗakunu neegmi, amge laal iitta.

²¹ Kekeɗ dahil ag da ee ninig ele lakkulnu meɗappig. Ao, da baal qaɗaiette, ag da wain nau ninig ele lakkulnu meɗappig.

²² O Kayak, na heppe, kekeɗ dahil ag hobul henana, ag doɗ pelemppa tena qakkak daatteb, amubia hobul ahilagppa ag anam daaglagnu oɗ medattem. Ao, ag nena qena, nob nau aoglagnu unuqidttem.

²³ Na ag amelag heppe gaɗueb, ag ii neegmananu oɗ medattem. Ge, na heppe, ag beɗulag bodoettaknab ele daaglagnu unuqidttem.

²⁴ Na ahilagnu oppoɗin huananab bekkunu oɗ medattem. Ao, na ahilagnu oo nauhak huananab beeb, hadappe nauhkkulagnu unuqidttem.

²⁵ Na heppe, ahilag aben am hamu, danab ah iitta daakkunu oɗ medattem. Ao, na heppe, ahilkad pehppa auntai laa amuppa ii daamanu unuqidttem.

²⁶ O Kayak, da na dahilad kekeɗ dilagppa anam hekkutnu oɗ medattemnu diig am inam. Na laa bu madattem ele amu, dahilad kekeɗ ag ag eheɗ hattaegeg, guittak tuɗittak, okkai dootteb. Ao, na laa, na ag bu matte guittak dootteb ele amu, dahilad kekeɗ ag amu dilag guittaknu qattag metteb.

²⁷ O Kayak, na dahilad kekeɗ dilag hipunin oh nahip dabmakppa mena aɗakkutnu oɗ medattem. Na ehanadppe, padal ii memananu uɗat ii hemananu unuqidttem.

²⁸ Na heppe, ag tuɗidna bau ii daamnanu oɗ medattem. Ao, na heppe, ag onilkad amu, genab tutukku hak danab onilkad ooppa daamnanu unuqidttem.

²⁹ O Kayak, da uug nau doyeye, guittakppa daattem. Nahip Padal ii maknu ehanittak da ehaniɗa, dahil guppiɗ daakkunu oɗ medattem.

³⁰ Dahilnu amu, da Kayak onig humakkulnu ahi edakkul. Ao, da nuhignu, “Ena heme,” doyeye, da Nug binag mekkul.

³¹ Da amu heppi, Yawe Nug makau okkai ebehi ele laa manan medattebnu ena dootte amu, Nug ena doyak amu eɗittak, Nug enanag dookku. Ao, da anam heppi, Nug makau dawai, qeqeɗi, baeg di ele medattebnu ena dootte amu, Nug ena doyak amu eɗittak, Nug enanag dookku.

³² Amu danab ah ag akka ag onilag qeeg ne oitteb ele amu, ag amu anidna, ag oolag gamag ahakku. Ao, ag laa ag Kayak anidna dim lamidkkulagnu Nug maditteb ele, ag amu anidna, ag oolag ɠagattag qedakku.

³³ Aɗinu? Yawe Nug laa ag keekenu tutu meppig daatteb amu, Nug unuqittak ahilag dootte. Ao, Nug danab ah nuhikkud laa, kekeɗ ag aɗualatteg, ag eppelagppa daatteb amu, Nug ahilagnu daug ii atitte.

³⁴ Hab amu habppan oh, wan amu wanppan oh ele, ag Kayak binag meig! Yu amu yuppan oh ele amu, ag oh ele, ag anam heig!

³⁵ Aɗinu? Kayak Nug danab ah ag Sion daatteb ele ehanatteb, ag padal ii memana. Ao, Nug heeb, danab ah ag Juda aab okkai baula buualadkkulag. Ge, danab ah nuhikkud ag appa daan, ag heppeg, wan ag eppelagppa eɗua daakku.

³⁶ Laa ag Nug oɗe dim lamidtteb ele buɗulkad, ag am wan aoglag. Ao, laa ag Kayaknu oolag mauhtte ele, ag wan amuppa ena daaglag.