Sam 68 - Nobonob Baibel

Israel ag ahilag kekeɗ eɗadppig amunu, ag gamag ahak okkai dooppig

Imuam Dawitnu sam; Dawit nug danab kwaia gumattenu yom. Am ahi laa iikku.

¹ Kayak Nug aha heeb, nuhikkud kekeɗ ag oolna, matatun gokkulagnu ool daatte. Ao, Kayak heeb, laa ag nuhignu nau ninig ele dootteb amu, ag Nug noobppanu oolna, nuhignu umanab gokkulagnu ool daatte.

² O Kayak, ulah kahug iwale gotte bia, na ag lamadppe gokkulagnu ool daatte. Yo, nau hak danab ag uppuh biig aab gakkaɗakppa gakkaɗa, le mette bia, Kayak Nug heeb, ag nauhkkulagnu ool daatte.

³ Amge Nug heeb, genab tutukku hak danab ah ag gamag ahak dooglagnu ool daatte. Ao, ag Kayak noobppa daan, gamalag ahakkunu ool hette. Ag maɗoɗppan gamag ahak naɗi ele daan, tuɗidib dooglagnu ool daatte.

⁴ Ag Kayaknu ahi etteg! Ag onig humeg! Ao, Kayak Nug lombig qaɗeppa dayaya gotte; ag baalag okkaippa nuhignu binag maknu ahi etteg! Nug onig am Yawe. Ag Nug noobppa gamalag ahaɗ!

⁵ Kayak Nug nuhig aben nuhignu tituanak daatte ele, Nug amuppa daatte. Nug laa oh ag mamelkad mauhadppig ele, Nug ag mamelag daatte. Nug ah qab atognoadtte.

⁶ Kayak Nug he, danab ah aun aɗi ag baelkadppa iitta ele amu, ag baelkadppa laa bena daatteb. Kayak Nug danab ah ag maniguittak daatteb amu, Nug he, ag uhuqak aon, ag gamag ahak aotteb. Amge danab ah aun aɗi ag nai tappe nak hetteb, ag wan gakkaɗak qaɗaiettak, keeke laa amuppa ii betteb ele, ag amuppa daatteb.

⁷ O Kayak, na danab ah nahipad Isipnu omalatte uɗippig. Yo, na danab ah nahipad wan meu waknu nakokib elele, na amuppa omaladme. Sila.

⁸ Na, na Kayak Sinai appa nahipad danab ah gumadna neme amu, na anam hee, na noomppa wan uɗalom. Ao, na, Israel dilag Kayak, na anam hee, na noomppa gu neum.

⁹ O Kayak, na gu huan hee neum. Ao, na hee, nahip wan, na aut, am eɗua, ena dayom.

¹⁰ Danab ah nahipad ag appa gona daappig. O Kayak, nahipad danab ah oolagppa laa ag qakub mena daappig, amge na wanppan keeke kuɗum beppig amu, na ag keeke amu mattame.

¹¹ Naɗi Nug keeke bekkunu aum, am danab ah kuɗumnab ag nai Kayak Nug heeb bekku, ag nai aumnu oo gamag ahak eleppa eppig.

¹² ⌊Anam aakku bekkunu ame amunu, anam aakku beum.⌋ Kekeɗ dilag king, amu ahilkad ban daup ele ag oolna gonana, keeke uuadna goppig ele, Israel ban danab ag diin panippig.

¹³ Gemu amu ag silwa, gol ele kuɗum ele daatteb. Ai uppuɗil beɗulag nakok nug haug silwappa tonak daatte, nug beɗu am golppa tonak daatte, anamnab aakku, ag gol, silwa ele huanak aoppig.

¹⁴ Qauko Salmonppa, Kayak Nukka Ɠagattag Oh Ele Nug kekeɗ dilag king oh he, tamtam gona daanna, sno hab attannu nette amu, ag amubia qaukoppa daappig.

¹⁵ Basan qauko amu, ag attannab, hume tak daatteb. Yo, Basan qauko amu attan, qauko ikkilkad kuɗum ele.

¹⁶ Kayak Nug qauko Sion appa daakkunu tituana, appa ana daatte amunu, danab ah Basan qauko hume takppanab daatteb ele, aɗinu ag danab ah Sion qaukoppa daatteb dilagnu amelag qe oolag elele ii daatte? Yawe Nug Sion qaukoppa hanhan daakku.

¹⁷ Kayak Nug bannu karis huanaknab ele; bannu karis amuam ebqaknu elele iitta. Naɗi Nug bannu karis amu oh Sinai qaukoppanu diie, ele uɗin, Nug nuhig mettid lag ooppa noum.

¹⁸ O Yawe Kayak na appa daakkutnu, na Sion qaukoppa teme. Na tenana, na ban danab eɗadna, aɗualadna diin gome ele amu, na ag noolag aon teme. Ao, na te, danab ah ag na keeke kuɗumnab nahip daakkunu hamu mettaeg, na aome, amge agib iitta. Laa ag nahip nai tappe nak heppig, ag ele keeke anam mettaeg, na aome.

¹⁹ Ig Naɗi, Nug am ihinig Kayak, ihinig Padal ii maknu ehanittak, ig Nug binag metu! Nug deɗ oh ihinig uug maotte. Sila.

²⁰ Kayak ihinig, Nug am Kayak, ig padal makppanu eɗua awigtte ele! Ao, Naɗi Yawe Nug ig ehanikke, ig ii mauhttem.

²¹ Amge Kayak Nug nuhig kekeɗ ikkilkad aduduɗadkku. Ao, Nug laa ag tuɗid ele hipunin hetteb amu, Nug ag ikkilkad aduduɗadkku.

^22-23 Naɗi Nug inam atte, “⌊Da ag Israel danab ah, da ag ehanadkkul.⌋ Amu dahilad kekeɗ ag oolna, Basan gokkulag dayeb, ag dahilad danab ah ag hadappeg, padal mena autna aoglagnu da appanu diiadppi uɗiglag. Genab, dahilad kekeɗ ag ib imuag elab attem gokkulag amu, ag dahilad danab ah ag hadappeg, padal meppeg, qai ag beɗulag laadkkulagnu da diiadppi, ag appanu eɗun uɗiglag.”

²⁴ O Kayak, ig danab ah ameg naɗi ag baelagppa laippuppa tappa ukkak heegeg anadttem. Ao, O dahil Kayak, dahil King, ag nahip mettid lakka ukkaegeg anadttem.

²⁵ Danab ah ag ahi edatteb ele, ag anuqakppa daatteb. Laa ag musik haknu keeke aɗan, keeke amu iwaltteb, o qetteb ele, ag laa oh dimulagppa daatteb. Aria, ah makkun ag tambarin qetteb ele, ag amu gamagppa daatteb.

²⁶ Israel danab ah, ag oh Kayak humitteg! Yo, ag Israel buɗuppud, ag Yawe binag meig!

²⁷ Antte, Israel dilag huu okkai Benyamin danab ah amu, ahilag ebqak huanak iitta, amge ag anuqna gotteb. Ag ukkaegeg, Juda ooppan gumak danab kuɗumnab, amu Seblon, Naptali oolahppan gumak danab kuɗumnab ele, ag ag dimulagppa daatteb.

²⁸ O Kayak, na heppe, nahip ɠagattag miag daakkunu oɗ medattem. Ao, O Kayak, na matu nahip ɠagattag miagib ippunigme amu, na baula anam ippunigkkutnu unuqidttem.

²⁹ Na nahip mettid lag Jerusalem daatte amu, wanppan king anen anen ag en takis bia, na mettaglagnu aon uɗin, appa na medatteb.

³⁰ O Kayak, ihinkad kekeɗ ag doɗ ɠagattag bia daatteb. Na heppe, ag nena qekkulagnu oɗ medattem. Ao, ihinkad kekeɗ ag am doɗ ɠagattag laa nug doɗ gai-iitta guittak medatte bia henan daatteb. Na heppe, ag nena qekkulagnu unuqidttem. Ihinkad kekeɗ ag wagai meegeg, ig takis mattagnignu oolag he hettem, amge na heppe, ag uɗalag nekkunu oɗ medattem. Na heppe, danab ah wan anen anennu ag ban hekkulagnu enanagnab dootteb ele amu, ag oolna gona, matatun daaglagnu unuqidttem.

³¹ O Kayak, na anam heppe, dimppa Isip danab ah ag nagattoppa uɗiglag. Na anam heppe, dimppa Kus danab ah ag uɗin, na noomppa dup nona binan mekkulag.

³² Wanppan ɗo maɗoɗ ohppan danab ah ag Kayaknu ahi ettalatteg! Ao, ag ahi Naɗi binag mette ele ettalatteg! Sila.

³³ Ban daup ikki ɠagattag okkai ele laa, nuhig hosppa atu wan oh matta gotte, amubianab Yawe Nug hab anukkanab heum amu, Nug amuppa gotte. Nug lomppa nai maditte, amuam hakkaɗ qette, amubia bette.

³⁴ Ag danab ah oh Kayaknu ɠagattagnu appeg doyeg! Nug am Israel dilag king. Nug hab attan daatte, Nug ɠagattag oh ele.

³⁵ Kayak Nug nuhig mettid lakka dayeye, danab ah ag Nug anidna, ag ebehilag oh bodoetta le mette. Nug am Israel dilag Kayak. Nug danab ah nuhikkud ɠagattag aqadtte. Ig Kayak binag humatu!