Sam 67 - Nobonob Baibel

Kayaknu ena heme anak ahi

Imuam Dawitnu sam; Dawit nug danab kwaia gumattenu yom. Danab laa ag musik haknu keeke muɗi ele qebeppeg, laa ag sam imu ettaglagnu daatte.

^1-2 O Kayak, wan imuppan wan anen anen oh dilag danab ah oh ag na oot attem daatte dooglagnu, ag nahip ehanitte, padal ii mak kobol ele anidkkulagnu amu, na ihinignu oot bodoette enanag maɗoɗ ele hena, itigkkutnu ool daatte. Ao, na ig ele daagnignu, na oot ihinignu ena daakkunu ool hette. Sila.

³ Kayak, danab ah oh ag nahipnu oolag gamag aheb, ag na binan mekkulagnu ool daatte. Ao, wan atu oh danab ah ag na binan mekkulagnu ool hette.

⁴ Na nai doya mala hettoɗia epeɗia elele mettak kobol dim lamidnana, na danab ah epeɗiadttem. Ao, na wan atu ohppan danab ah ib enappa gokkulagnu ulum madattem. Na anam hettem amunu, wan imuppan wan anen anen dilag danab ah oh ag nahipnu oolag ittag qak doonna, ag oo gamag ahaknu ahi ettaladkkulagnu ool daatte. Sila.

⁵ Kayak, danab ah oh ag nahipnu oolag gamag aheb, ag na binan mekkulagnu ool hette. Ao, wan atu oh danab ah ag na binan mekkulagnu ool daatte!

⁶ Ihinig wanppa ee kuɗum be, ig aomut; Kayak, Nug am ihinig Kayak, Nug itittak ena ig mekkom.

⁷ Kayak Nug itittak ena ig mekkom ⌊amunu,⌋ wanppan danab ah oh ag nuhignu ebehilag oh bodoetteb le mekkunu ool daatte!