Sam 66 - Nobonob Baibel

Kayak amegppa, “Ena heme,” anak, Nug binag humak elenu ahi

Imuam sam laa; Laa nug yom amu, nug danab kwaia gumattenu yom. Am ahi laa iikku.

¹ Danab ah ag wan atu ohppa daatteb ele, ag oh oo gamag ahakppa qalan enana, Kayak binag okkai metteg!

² Nug am binag amahlak oppiaawak ele amunu, ag amunu ahi etteg! Yo, ag Nug binag okkainab metteg!

³ Ag Kayak amegppa inam aig! “Keeke na hattame am enanagnab. Danab ag amu anadna, ag ebehilag oh bodoetta le mette. Ɠagattag nahip am okkainab, amu nahip kekeɗ ag amu doona, ag baɗana, na noomppa gatelag qaun ona daatteb.

⁴ Wanppan danab ah oh ag na noomppa gatelag qaun ona, dup nona daatteb. Ag ahi ettanna, na binan humatteb. Yo, ag ahi ettanna, na binan humatteb.” Ag Nug amegppa anam aig! Sila.

⁵ Kayak Nug keeke digdig danab ehanadkkunu heum amu, ag dona antteg! Kayak uɗat heum imu danab ag anadna, ag ebehilag oh bodoetta le mette.

⁶ Kayak he, ib qaɗaiettak laa le naɗi gamagppa ba dayeye, ig alankad ag baelagppa le amu laih laih gilil bia dayeye, ag le mataɗna, laih wappig. Kayak Nug anam heum amunu, ig nuhignu oonig gamag okkai aheb, binag humatu!

⁷ Nug keeke oh hanhannu nuhig ɠagattagppa gumadtte. Ao, Nug wan atu oh danab ah neekkadtte. Anam amu, danab auntai laa ag Nug waappa daamnanu dabmak aon, nuhig nai tabappeg aib neum! Sila.

⁸ O danab ah oh, ag ihinig Kayak binag humeg! Yo, laa ag dooglagnu, ag huana qalan enan, Nug binag humeg!

⁹ Nug dabmekke, ig bau ena daattem, amu keeke laa he, ig neta ii qemut daattem.

¹⁰ Am genab, O Kayak, na ma anttak ig mekkame. Ao, danab nug silwa babaitta epeɗia awak daakkunu uɗat hette, amubia ig enanag bekkunignu, na hee, uug ihinigppa beum.

¹¹ Na hee, ig maniguittakppa daamut. Na hee, ig uug okkai gomenigppa maomut.

¹² Na uuikke, ihinkad kekeɗ ag ig ikkinkad tappaladppig. Ig danab ag aab ewak ooppa, o iitta le ui oowo, wana gotteb bia anam oimut. Anam, amge uɗat amu ohppa na daanna, amu gemu na ig omaigna, aben enanagppa uɗie daattem amunu, ⌊ig bau ena daattem. Ig neta ii qemut daattem⌋.

¹³ O Kayak, da geha na lautppa ukken, da manaknu ofa heinne, da doɗ anam manatte medakkul. Yo, da geha ukken, da na noomppa aɗi keeke genabnab hekkulnu nai ain qakkami amu, da hekkul.

¹⁴ Ge, da uugppa dayeye, keeke da na amenppa ami amu, da hekkul. Ao, da oɗelppa aɗi ami amu, da hekkul.

¹⁵ Da sipsip ena, titiɗak ele, da amuppa manaknu ofa hein, manatten medakkul. Yo, da geha sipsip dawai manatten medakkul. Da geha mana mettak hein, makau dawai, meeme dawai ele manatten, na medakkul. Sila.

¹⁶ Aun aɗi oh ag Kayaknu ebehilag oh bodoetta le mette ele amu, ag doppeg, Kayak Nug aɗi keeke dahilppa ena heum amu, da amunu madippi doyeg!

¹⁷ Da Nug ehaniɗkkunu onigppa ein, da ahi ettalattette, Nug binag memi.

¹⁸ Da dabmak dahilppa hipunin qekkulnu dabmelom amu, Naɗi Nug unuqittak dahil ii doolo.

¹⁹ Amge anam iitta amunu, Kayak Nug dahil unuqittak doyom. Ao, da Nug unuqittitti, Nug da baal doyom.

²⁰ Da Kayak, Nug unuqittak dahil dookkunu ii uuom. Ao, Nug oo mauhaknab kobol nuhig dahilppanu ii aɗilom amu, da Nug binag humattem.