Sam 65 - Nobonob Baibel

Laa nug Kayak binag ma, “Ena heme,” ele aum

Imuam Dawitnu sam; Dawit nug danab kwaia gumattenu yom. Am ahi laa iikku.

¹ O Kayak, ig danab ah, ig Sion appa na binan humagnignu daattem. Ao, ig danab ah, ig na noomppa aɗi keeke genabnab hekkunignu nai atat qakkamut amu, ig am hepput, meu okku.

² O Kayak, na, laa iitta, na ihinig unuqittak doona, na ig ehanigttem ⌊amunu,⌋ danab ah oh ag geha nahip-ppa wakkulag.

³ Hipunin ihinig tonikke, ig naunab daamut, amge na ihinig hipunin uhuqadna mekkame.

⁴ Danab ah ag nahip daaglagnu na tituanadna, diin uɗie, ag nahip mettid lagnu haɗap-ppa, na guguittak daatteb amu, ag itittak ena aoppig daatteb. Na heppe, ig aun aɗi anam na laut, amuam nahip mettid lag nahipnu tituanak daatte amu, ig amu guguittak haɗap-ppa daattem, ig lag amuppanu itittak ena ena aognignu na oɗ medattem.

⁵ O Kayak, na am ihinig padal mematanu ehanittak daattem. Haen na nahip uɗat hettem amu, na kobol genab tutukkuib dim lamidna heehe, danab ag uɗat amu anidna, ag ebehilag oh bodoetta le mette. Nahip uɗat am anam aakku amunu, haen na unuqittak ihinig nob mettem amu, na uɗat anam aakku hettem. Amu danab ah wan ohppanu, miagnu, amu umanu ele ag nahipnu oolagppa genab dootteb

⁶ Nahip ɠagattagppa, na qauko hatte bena, ag abenlagppa daatteb. Nahip ɠagattag am okkainab.

⁷ Amu na aakkuib hee, yu duban qa, koɗkoɗ qette amu, manin niitte; amu wan anen anen danab dilag ban hak amu, naib hee, iitta mette.

⁸ Danab ah adekku adekku daatteb amu, ag na nahipnu dabmettaknu kobol danab haknu elele iitta heme, ag amu oh anidna, ag ebehilag oh bodoetta le mette. Amu laih aam bedeppa ukka aam nodeppa batak, ag na keeke oh heme amu anidna, ag maɗoɗppan gamag ahaknu ahi ele ettadtteb.

⁹ Na wan dabmettanna, na gu hee nette. Ao, na hee, wan ittag ele daatte. Kayak, na le aben ohppa me, le ag ii qaɗaiedatteb. Ao, na hee, ee aeg beeg, danab ah ag aotteb. Aɗinu? Na anam daakkunu tituanme.

¹⁰ Amu na hee, gu huana elele dad ohppa na, wan buuak amuppa le dayeye, wan ena gai-iitta dayeye, na hee, ee keeke ena betteb.

¹¹ Na hee, ig ee elelenab kuɗum be aottem. Na hee, ee mak lakka amuppa, ee elelenab kuɗum meeg daatte.

¹² Na hee, atu taɗakppa gikkiɗah ena be, makau, sipsip ele ag aben amuppa ambak daatteb. Ao, qauko nakokppa, doɗ, ahilkad gumak danab ah ele, ag oolag gamag ahatte.

¹³ Aben gikkiɗah daatteppa amu, sipsip huanaknab daatteb. Aben oolnu noakppa, ee aeg eheɗnab betteb. Appan danab, doɗ ele oh, ag gamag ahak doon, danab ah ag enan, ahi edatteb.