Sam 64 - Nobonob Baibel

Guittak aomanu unuqittak laa

Imuam Dawitnu sam; Dawit nug danab kwaia gumattenu yom.

¹ O Kayak, uug da toniɗom daatte amunu, na dahil unuqittak dookkutnu oɗ medattem. Kekeɗ dahil ag da iuglagnu atteb. Na ag amu hemananu ahilag ib oo nekkutnu unuqidttem.

² Nau hak danab ag eheɗ heiɗkkulagnu maidtteb; na heppe da ag eppelagppa ii daapanu oɗ medattem. Ao, na ehaniɗppe, da danab ag muttub qenan, eheɗ hetteb amu, da eppelagppa ii daapanu unuqidttem.

³ Ag lemaɗulag am qep elab biappa nai maditteb. Ao, ag nai mattin, aɗi atteb amu, nai amuam lat aeg hawaɗ kekeɗ dilagppa etteb bia maditteb.

⁴ Nau hak danab ag lokkumna daanna, laa eheɗ ii heum ele, ag nuhigppa lat etteb. Ao, ag danab nug eheɗ hak danab iitta, ag nug baneb gona, tulan tena, baɗak iitta qekkulagnu hetteb.

⁵ Ag kobol nau hekkulagnu, nug ɠagattag qedatteb. Danab ag mattiak oh laippu hena, ag doɗ aoglagnu pelem metteb bia henana, ag danab eheɗ laa ii heppig ele aqaglagnu maittak aotteb. Ag nug oɗ mettan atteb. “Aun nug ig anigkku?

⁶ Ig amu hepput, dimppa aun nug ig hemutnu laa ippuanatteb anidkkulagnu elele? Ao, ig am keeke laa haknu maidta, autanab aomut ele amu, maittak amuam ena eleleib,” atteb. O gadon, am genab, danab ag oolag unuqagppa, ahilag dabmakppa ele eheɗ haknu daatte, amuam kaliaknab daattep.

⁷ Amge Kayak nukka nau hak danab hatteb nauhkkulag; danab nug laa lat doɗoppa guittak medatte bia. Ag pahanab guittak aona, nena qekkulag.

⁸ Kayak Nug ag aɗi appig, Nug amunu ag hatteb nauhkkulag. Ge, laa ag aɗi beebeb anidna, ag nau hak danab dilagnu, “Am keeke hamunab,” doon, ikkilag matuɗkkulag.

⁹ Anam beeb, laa oh ag Kayaknu ebehilag oh bodoetta le mekku. Ao, ag Kayak Nug keeke okkai okkai heumnu, ag laa amelagppa amunu mattiglag. Ge, ag amunu dabmena autna aoglag.

¹⁰ Aun aɗi ag genab tutukku hak danab daatteb, ag Yawenu oolag gamag ahakku. Ao, ag Nug ag padal mak eɗidna ena daaglagnu Nug waappa daaglag. Ge, ag kobol tutukku henana, ag Nug humidkkulag.