Sam 62 - Nobonob Baibel

Danab nug Kayak ehanittatta, atognokkunu ooppa genab doottenu sam

Imuam Dawitnu sam; Dawit nug danab kwaia gumattenu yom. Danab amu onig am Jedutun.

¹ Da Kayak, nuhignuib oolppa maɗoɗ doottem. Ao, Nugib am Padal ii maknu ehanittak dahil daatte.

² Nug aakkuib am kekeɗ niɗamanu ehanittak dahil daatte. Nug aakkuib da padal mepanu ehaniɗtte. Nug am aab aɗ ɠagattagnab ele dahil bia daatte. ⌊Da Nug ele daapuɗ amu,⌋ auntai laa nug da uɗaliɗkkunu elele iitta.

³ Ag dahilad kekeɗ, ag da banel uɗitteb; amu haen gane laa ele ukkeb, ag amu uuglag? Da am danab dakka laippuib, amge ag kekeɗ dahilad ag am kuɗum, ag ohnab ag da iuglagnu hetteb. Da am gilil beɗak bia, o da aɗ oɗaɗittak daatte bia daattem, aakkuib.

⁴ Da am king amunu, ag heppeg, da nein qein, king ii daapanu hetteb. Ag nai hambuppuak mattiglagnu enanagnab dootteb. Ag da iɗul anidna amu, ag nai ena meɗatteb, amge ag mattiak henana, ag da eheɗ laa awaknu anak waappa daakkulnu ag oolag unuqagppa atteb. Sila.

⁵ Da Kayak Nug da ehaniɗeb, dahilppa ena bekkunu dabmak aɗe oittem amunu, da Nug noobppa dagom daattem.

⁶ Nug aakkuib am kekeɗ niɗamanu ehanittak dahil daatte. Nug aakkuib da padal mepanu ehaniɗtte. Nug am aab aɗ ɠagattagnab ele dahil bia daatte. ⌊Da Nug ele daapuɗ amu,⌋ auntai laa nug da uɗaliɗkkunu elele iitta.

⁷ Padal ii maknu ehanittak dahil, am Kayak nukka, laa da binal meɗatte ele amu, amu ele am Kayak nukka. Nug am kekeɗ niɗamnanu ehanittak dahil daatte. Nug am padal mak eɗitteb ena dayaknu ehanittak dahil daatte.

⁸ O danab ah dahilad, Kayak Nug am padal mak eɗitteb ena dayaknu ehanittak ihinig daatte. Ag hanhan Kayaknu oolagppa genab doyeg! Ge, ag nug oolag unuqagppanu unuqitteg! Sila.

⁹ Danab onilag iitta, ag am keeke hamu, ulah bia daatteb. Danab ag onilag ele, ag am keeke ii daatte bia daatteb. Laa nug ag oh ag uulag anidkkunu skelppa maatta neekka, nug skelppa aɗitai keeke laa ii daatte anidkku.

¹⁰ Na keeke lokkumakppa awaknu duttuna hak kobolppanu, “Da anam hekkulnu elele daattem amunu, amuppa da keeke ena kuɗum aokkulnu elele,” aib ootppa genab doon dabmeme. Ao, na dabmak hambuppuak aib aonna, yabhokppa keeke aokkutnu maittak aonna heme. Na ⌊ib enappa⌋ en kuɗum aokkuttai, amge na keeke amunu, “Anuqak keeke,” aib dabmeme.

¹¹ Kayak Nug nai laa mattiom. Ge, nug haen aɗit anam nai mattieye doomi. O Kayak, amuam, Naib ɠagattag daattem.

¹² Ge, O Naɗi, oo mauhaknab kobolnu diig am naib. Am genab, na danab anen anen aɗi hetteb anidnana, ag nob tutukku madattem.