Sam 61 - Nobonob Baibel

Laa nug guittak aomanu Kayak unuqittom

Imuam Dawitnu sam; Dawit nug danab kwaia gumattenu yom. Danab laa ag musik haknu keeke muɗi ele qebeppeg, laa ag sam imu ettaglagnu daatte.

¹ O Kayak, na dahil ewak dookkutnu oɗ medattem! Ge, na dahil unuqittak dookkutnu unuqidttem!

² Uug da toniɗtteb amunu, wan batakppa appanu da na ehaniɗkkutnu unuqidttem. Ao, da oolppa elele iitta doyeye, na ehaniɗkkutnu oɗ medattem. Ge, danab nug men hume taknab naɗi attan daatte, kekeɗ ag nug guittak mettaglagnu ib iitta, nug ena daatte, amubia amu, na dahil men naɗi bia daakkutnu ool daatte.

³ Da na amu hekkutnu oɗ medattemnu diig am, na am dahil padal mak eɗitteb ena dayaknu ehanittak daattem. Na amu aab aɗ ɠagattanab ele, kekeɗ ag nokkulagnu elele iitta bia dayeye, da appa dayeye padal mak laa ii anidpa, na amubia daattem.

⁴ Da nahip mettid haknu peh lagppa daakkul dayeb, da ehanittak awe, padal ii mepa amunu, na heppe, da appa hanhan daakkulnu ool okkainab daatte. Ao, da matuk nakkud ag anilag haug waappa padal mak eɗidna ena daatteb, amubia da na guguittak dayeye, padal mak ii aopanu ool okkai daatte. Sila.

⁵ O Kayak, aɗinu da ool okkai anam daatte? Na genabnab haknu nai ana qakkak dahil doon ehaniɗna, na danab ah nahipnu ebehilag oh bodoetta le mette ele keeke ena ena, ahilag aug bia madattem amu, na da ele gemu keeke amu meɗame.

⁶ Na heppe, king nug maɗ kuɗum bau daakkunu oɗ medattem. Yo, na king ehanidppe, bau hanhan daakkunu unuqidttem.

⁷ O Kayak, na heppe, nug king hanhan dayebeb, atognobeppe daakkunu oɗ medattem. Ao, na nug nahip oo mauhaknab kobol, nahip oo metta ii uuak kobol eleppa ehanidkkutnu unuqidttem.

⁸ Anam dayeb amu, da deɗ anen anen aɗi aɗi hekkulnu genabnab hekkulnu nai ain qakkami amu, da heppi, nai amunu meu ob, da na onin humakkulnu ahi edette daakkul.