Sam 60 - Nobonob Baibel

Danab laa nug Kayak ehanitteb, padal memanu unuqittak

Imuam Dawitnu sam; Dawit nug danab kwaia gumattenu yom. Sam imuam haen Dawit nug Aram Naharaim amu Aram Sobah ele ban heeg, amu Joap dimppa eɗua ukka ban hewowa, nug Edom danab 12,000 oolnu noak onig Yunu Oolnu Noak appa aqomnu ippunittak haknu daatte. Ahi ettaglagnu baag am, “Lili Nug Tituana Nai Qakkaknu”. Am miktam laa.

¹ O Kayak, na ig uuigme. Na ihinig kekeɗ ag ig eɗigkkulagnu heme. Na ihinignu oot nauhom. Na anam heme, amge gemu amu, na eɗun, ihinignu ena doon, ehanigkkutnu unuqidttem.

² Na hee, wan oppata, oɗe okkai dayom. Gemu na heppe, wan eɗua ena daakkunu oɗ medattem. Aɗinu? Wan uɗaltte.

³ Na ig bu ɠagattagnab mekkame. Ao, na hee, ig uug doot, danab nug le nau la, qe oiyom bia hemut.

⁴ Amge laa ag nahipnu ebehilag oh bodoetta le mette ele ag banppa mauhmananu, na ag attem hena, bau daaglagnu pilak laa qappame daatte. Sila.

⁵ Ig, na ihinignu oot mauhtte ele amu, ig kekeɗ eppelagppa ii daamtanu, na nahip ɠagattag okkai amuppa ig ehanigppe qagaiettakppa ii daamtanu oɗ medattem.

⁶ ⌊O danab ah,⌋ Kayak Nug nuhig mettid lagppa dayaya aum. “Da Sekem danab eɗatten, da melemel mein, Sekem wan oppatppi, maha maha neeb, ⌊da dahilad danab ah madakkul.⌋ Ao, da oolnu noak Sukot oppatppi, maha maha neeb, ⌊da dahilad danab ah madakkul.⌋

⁷ Gileat danab ah am dahilad, Manase danab ah, ag ele am dahilad. Epraim danab ah ag am da ikkil guittak aomanu aen hat dahil daatteb, amu Juda danab ah ag am dahil kingnu qakun, ⌊danab ah da am king daattem dooglagnu⌋ daatteb.

⁸ Moap danab ah, ag dahil maɗi nid maɗi ah ele daatteb, Edom danab ah ag da waalppa daatteb. Da Pilistia danab eɗatte, gamag ahakppa ettem.” Kayak anam awa atte.

⁹ ⌊Amge da Dawit, dahilnu amu,⌋ aun nug da ehaniɗeb ⌊Edom appa⌋ aab okkai ɠagattag aɗ ele amu aokkul? Ao, aun nug heeb, da Edom eɗidkkul?

¹⁰ O Kayak, naib, na amu hekkutnu elele, amge na ig uuigme. Ig Israel ig ban daup laippuppa tappat banppa gottem amu, na ig ele gemu ii daattem.

¹¹ Danab ah dilag ehanittak am meu iitta. Na ehanigppe, ig kekeɗ eɗadkkunignu oɗ medattem.

¹² O Kayak, na ig ehanigppe, ig keeke okkai okkai hekkunig. Na ig ehanigppe amu, ig kekeɗ ihinkad tappaladta, oɗoɗadkkunig.