Sam 59 - Nobonob Baibel

Guittak aomanu unuqittak laa

Imuam Dawitnu sam; Dawit nug danab kwaia gumattenu yom. Dawit nug Saul danab laa Dawit laug meidna daanna, qeppeg mauhkkunu maatte goppig haenppa yom. Ahi imu baag am, “Na keeke laa aib heppe nauhom”. Am miktam laa.

¹ O Kayak, na heppe, da kekeɗ dahilad eppelagppa ii daapanu oɗ medattem. Ao, laa iuppeg mauhkkulnu oolag hette ele amu, na da ehaniɗppe, ag amu ii hemananu unuqidttem.

² Na heppe da laa ag nau hetteb ele eppelagppa ii daapanu oɗ medattem. Ao, laa ag gamag ahak doon, danab aqadtteb ele, na da ehaniɗppe, dahilppa anam hemananu unuqidttem.

³ Aɗinu? O Yawe, antte! Danab ag da niɗaglagnu meiɗna hetteb. Danab ag lailkad aqaglagnu tiilagppa daatte ele amu, da ahilagnu hipunin laa, o eheɗ laa ii hemi, amge ag attem hena, da niɗaglagnu maittak aotteb.

⁴ Da ahilagnu aɗitai eheɗ laa ii hemi, amge ag da iuppeg mauhkkulnu bappaidtteb. O Yawe, na ahan, da ehaniɗkkutnu oɗ medattem! Na ag dahilppa aɗi hekkulagnu hetteb amu antte!

⁵ O Yawe Kayak Nakka Ɠagattag Oh Ele, na Israel dilag Kayak, na wan imuppan wan anen anen ohnu laa ag nau hetteb ele bu madakkutnu ahakkutnu oɗ medattem. Ao, na laa ag dimul menan, nau hekkulagnu maidtteb ele, am na oo gai-iitta doya oo metta ehanittak kobol ii dim lamidna heppe, ag nau aoglagnu unuqidttem. Sila.

⁶ Ag da iuglagnu tuqan uɗitteb. Ag am qai, danab, o doɗ laa emalkkulagnu pahaettak hetteb bia hetteb. Ge, ag am qai ag aab okkainu ib manppa oinna liɗimtteb bia hetteb.

⁷ O Kayak, danab nau amu oɗelagppanu nai nau huanaknab nette, na nai amu dookkutnu unuqidttem. Ao, qep elab aeg nau ele danab guittak okkai medatte, ag oɗelagppanu nai am amubia hette. Ge, ag amu hettebnu diig am, ag nai nau oh amu mattieg neene, ag hibguitta hena, inam atteb. “Aun ig dooikka bu iqakku?”

⁸ Amge na, Yawe, na ag imadttem. Ao, na wan imuppan wan anen anennu danab ah kobol nau hetteb ele, na ag aon aon qadattem.

⁹ O Kayak, na am dahil ɠagattag daattem. Da na amen mettem. Aɗinu? O Kayak, na am aab aɗ ɠagattagnab dahil bia daattem.

¹⁰ Kayak dahil Nug dahilnu oo mauhaknab dootte amunu, Nug uɗia da ehaniɗkku. Nug da ehaniɗa heeb, da kekeɗ dahil oh eɗadkkul.

¹¹ O Naɗi, na ihinig guppiɗ daattem. Dahilad danab ag nahip hak pahanab daulag atikkununab daatteb amunu, na laippun heppe, dahil kekeɗ ag mauhkkulagnu ool ii daatte. Iitta. Danab nug na qekkunu oiyeye ukke ukke na qette, amubia na nahip ɠagattagppa heppe, uug kuɗum dahil kekeɗ, ahilagppa beeb ukkeb ukkeb, padal mekkulagnu ool daatte. ⌊Na anam hekkut dayeb amu, danab ah dahilad ag na aɗi heme amu ii daulag atima.⌋

¹² Dahil kekeɗ ag dada hena, ag nai nau atteb. Yo, ag oɗelagppa ag laa ag eheɗ laa awaknu anak waappa daaglagnu ana, ag hambubutteb. Anam amunu, nai nau ag atteb, amu dada hak kobol ahilag ele, keeke aɗit amuam ahilag pelem bia dayebeb, na heppe, ag amuppa nena qekkulagnu oɗ medattem.

¹³ Wan imuppan wan anen anennu danab ah oh ag na Kayak, na ippa Israel daanna gumigttem, ag amu dooglagnu amu, na dahil kekeɗ dilagnu oppoɗin beeb heppe, ag padal mekkulagnu oɗ medattem! Ao, na ahilagnu oppoɗin beeb heppe, ag padal mena, laippu laa ii daamnanu unuqidttem! Sila.

¹⁴ ⌊Am genab, dahil kekeɗ⌋ ag da iuglagnu tuqan uɗitteb. Ag am qai, danab, o doɗ laa emalkkulagnu pahaettak hetteb bia hetteb. Ge, ag am qai ag aab okkainu ib manppa oinna liɗimtteb bia hetteb.

¹⁵ Qai ag ee mattin wana dona wana dotteb, ⌊amubia dahil kekeɗ ag gotteb dotteb henana, da iuglagnu hetteb⌋. Qai ag ee elele ii anidna amu, ag liɗimtteb, ⌊amubia kekeɗ dahil ag da ii iun, ag oppoɗilag bette⌋.

¹⁶ Ag anam aakku hetteb, amge na am aab aɗ ɠagattagnab ele dahil bia dayeye, gemu ele anam daattem. Ao, da uug doottem, haen amuppa na am padal mak eɗitteb ena dayaknu ehanittak dahil daattem amunu, da nahip ɠagattag okkainu ahi edakkul. Ao, da buttua anen anenppa, da hanhan nahip oo mauhaknab kobolnu ahi edakkul.

¹⁷ O Kayak, na amu aab aɗ ɠagattagnab dahil bia daattem. Na dahilnu oo mauhaknab doottem amunu, da na, na am dahil ɠagattag amu, da nahipnu humittak ahi edakkul.