Sam 58 - Nobonob Baibel

Kayak Nug nau hak danab bu madakkunu unuqittak laa

Imuam Dawitnu sam; Dawit nug danab kwaia gumattenu yom. Ahi imu baag am, “Na keeke laa aib heppe nauhom”. Am miktam laa.

¹ Gumak danab ag, ag nai doya mala hettoɗia epeɗia elele mettak kobol genab hettebte? Ao, ag danab okkai ag epeɗiak maɗi ahilag henana, ag uɗat amu tutukku, kaliak laa iittappa genab hettebte?

² Iitta! Ag epeɗiak henana, ag nai doya mala hettoɗia epeɗia elele mettak kobol dim lamidkkulagnu uun, ag epeɗiak kobol laa kaliak ele, ag kobol nau amu hekkulagnu maittak aotteb. Ao, ag laa guittak nau mauhnoak madatteb.

³ Nau hak danab ag anilkad menuatteg dona, ag laippun ib apiɗidna, nauhtteb. Yo, ag anilkad oolkadppan donana, ag ib apiɗidna, hambuppuak nai maditteb.

⁴ Keeke ag hetteb, amuam mat naunu ouɗi, danab he mauhtteb, ag amubia hetteb. Ao, ag Kayak nai doomnanu, ag mat nau onig kobra nai laa ii dootte, ag amubia ag daulag itutteb.

⁵ Danab nug mat nau amu aɗi aɗi hekkunu dumuttum iwalakppa ippunittebeb, nug ii dooma. Ge, danab amu nug enanag iwalkkutai, amge mat nau amu nug ii dooma.

⁶ O Kayak, nau hak danab ag ban hak doɗ laa bia daatteb. Na heppe, ag ⌊ɠagattag iitta,⌋ doɗ laa aekkud qiialattak ele bia daaglagnu oɗ medattem. Ao, O Yawe, na heppe, nau hak danab ag ⌊ɠagattag iitta,⌋ laion bau aekkud kaulak ele bia daaglagnu na unuqidttem!

⁷ Na heppe, ag le wan qaɗaiettakppa noa iitta mette bia iitta mekkulagnu oɗ medattem. Ao, na heppe, ag eppelagppa bannu keeke aɗatteb amu, keeke amuam hamu bia daakkunu unuqidttem.

⁸ Na heppe, ag am demdem mauhna, wanppa beɗan iitta metteb bia mauhna, iitta mekkulagnu oɗ medattem. Ao, na heppe, nid nakok laa anig ooppa niiaya mauha, nug aam ii anttom bia, ag anam daaglagnu unuqidttem.

⁹ Danab waa aab gakkaɗaknabppa meeg dayeye, le pahanab ewa gakkaɗtte, amubia Yawe Nug paha heeb, nau hak danab, bau amu alag ele, ag iitta mekkulag.

¹⁰ Genab tutukku hak aɗi ag Yawe Nug laa ag eheɗ ahilagppa heppig ele nob tutukku madakku anidkkulag amunu, ag gamalag ahakku. Daup laa ag kekeɗ nena qeeg, tiilag na, wan qaɗeppa dayeye, daup amu ag kekeɗ lamadnana, tiilag baelagppa tappan gotteb, amubia genab tutukku hak danab ag nau hak danab eɗadna, gamalag ahakku.

¹¹ Amu beeb am, danab ag akkulag. “Am genab, laa ag genab tutukku hak danab ah daatteb, ag nob ena anidtteb. Ao, genab, Kayak Nug wan imuppan danab ah epeɗiadtte amu, Nug daatte,” aon akkulag.