Sam 57 - Nobonob Baibel

Ehanittak awaknu unuqittak laa

Imuam Dawitnu sam; Dawit nug danab kwaia gumattenu yom. Dawit nug Saul aɗamanu baɗa oola, wan oɗeppa dayom, nug haen amunu sam imu yom. Ahi imu baag am, “Na keeke laa aib heppe nauhom”. Am miktam laa.

¹ O Kayak, da nahip-ppanu padal mak eɗitteb ena dayaknu ehanittak aottem amunu, na dahilnu oot gai-iitta doon oot meɗan ehaniɗkkutnu oɗ medattem. Ao, na dahilnu oot gai-iitta doon oot meɗan ehaniɗkkutnu unuqidttem. Da padal mepanu, matuk nag anig haug waappa daatte bia, da na guguitten daakkul. Ao, da anam hebippi ukkeb ukkeb, uug naunab amu oh qe-eɗilkkulag.

² Da Kayak Attannab Laa Oh Eɗattak, da Nug unuqidttem. Ao, Kayak, Nug da aɗi hekkulnu maittak awa he, da hettem ele amu, da nuhignu unuqidttem.

³ Kayak Nug hab attan daatte, Nug appanu da ehaniɗeb padal ii mepa. Ao, Nug danab ag da heiɗeg nauhttem ele amu heeb nauhkkulag. Sila. Ge, Kayak Nug dahilnu oo mauhaknab doya, Nug ele dahilnu oo metta ii uuak kobol dim lamidkku.

⁴ Dahil kekeɗ ag da taliliɗppig daatteb. Da am danab nug laion ag enug aqak ele, ag nug talilidppig daatteb, da amubia daattem. Ao, dahil kekeɗ ag laion doɗ laa laatteg iitta metteb bia, ag danab ah hattaeg nauhtteb. Ge, kekeɗ dahil ag laion bia, ag aelkad am lat doɗo bia, lemaɗulkad amu qep elab bia.

⁵ O Kayak, na heppe, danab ah oh ag na ohnab eɗattak daattem anidkkulagnu oɗ medattem. Yo, danab ah aben ohppa ag nahip binag amahlak oppiaawak ele anidkkulagnu unuqidttem.

⁶ Dahil kekeɗ ag da awiɗkkulagnu pelem meppig daatte. Da uug nauppa daattem. Ag da ippulppa moɗ umanab aoeg noum, amge ag akka amuppa nokkulag. Sila.

⁷ O Kayak, da ool ⌊na binan mekkulnu⌋ ɠagattag daatte. Ge, da ool anam haknu ɠagattag daatte; Da ahi laala, ag na binan metteb ele edakkul.

⁸ Da dakka dahilnu attem. “Na ahe!” Ao, harp, laia ele ⌊aa danab daaloplob, da ahilahnu; “Aa musik hekkulahnu⌋ aa ahai hibaitteɗ!” awe alom. Da buttuanab ahen, aam ii bak haenppa musik haknu keeke ahi laala hadappi ukkeb, aam bekku.

⁹ O Naɗi, da danab ah oh noolagppa na amenppa, “Ena heme,” akkul. Yo, da wan imuppan wan anen anen ohppan danab ah oolagppa, nahip humittak ahi ettaladkkul.

¹⁰ Da amu hekkulnu diig am inam. Keeke laa elabnab habppa tak daakku dayeb amu, keeke amuam keeke okkainab, nahip oo mauhaknab kobol bia. Ao, keeke laa ikki ta, hab yaakku dayeb amu, keeke amuam keeke okkainab, nahip oo metta ii uuak kobol bia.

¹¹ O Kayak, na heppe, danab ah oh ag na ohnab eɗattak daattem anidkkulagnu oɗ medattem. Yo, danab ah aben ohppa ag binag amahlak oppiaawak ele nahip anidkkulagnu unuqidttem.