Sam 56 - Nobonob Baibel

Kayaknu ooppa genab dookkunu unuqittak laa

Imuam Dawitnu sam; Dawit nug danab kwaia gumattenu yom. Ahi imuam Pilistia danab, Gat appa Dawit aɗappig haenppanu ahi. Nug baag am “Uppuɗil Beɗulag Nakok Nug Ad Ok Umanab Daatte, Aguppa Daatte”. Am miktam laa.

¹ O Kayak, na dahilnu oot gai-iitta doon oot meɗan ehaniɗkkutnu unuqidttem. Aɗinu? Kekeɗ daup ag da huana lamiɗtteb. Yo, kekeɗ dahil ag deɗ oh amun tuqan ele banel uɗina, iuglagnu hetteb.

² Dahil kekeɗ ag deɗ oh amun tuqan ele da banel uɗin daatteb. Ao, ag am kuɗum, amu ag da banel uɗiglagnu ii baɗatteb.

³ O Kayak, ag anam hetteb, amge da baɗak doottem haenppa amu, da nahipnu oolppa genab doottem.

⁴ Ao, da Kayak, da nuhig nai binag mettem amu, da nuhignu oolppa genab doottem. Anam amunu, da ii baɗapa. Ge, ⌊Kayak Nug danab dahilppa aɗi hekkulagnu ii uuatteb hekkulag amu,⌋ danab ag aɗi keeke dahilppa hekkulagnu elele iitta.

⁵ Kekeɗ dahil ag hanhan da uug meɗatteb. Yo, deɗ oh ag da guittak dookkulnu ib maditteb.

⁶ Ag qagmena, ag dahilppa eheɗ nau hekkulagnu mattiak aotteb. Ag eheɗ heiɗkkulagnu meiɗna daatteb. Da aɗi keeke hettem amu, ag neegna autna aotteb. Ag da iuglagnu hetteb.

⁷ O Kayak, na heppe, ag eheɗ hak ahilagnu nob nau aoglagnu oɗ medattem. Ge, na kekeɗ dahilnu oot nauheb heppe, ag wanppa nena qekkulagnu unuqidttem.

⁸ Na dahil oo doyak amu oh anidme. Ao, na da amel leb am nippudppa itame. Ge, na buk itoɗiak nahip-ppa amu oh anen anen yaan aome.

⁹ Anam ⌊amunu⌋ da na ehaniɗkkutnu oninppa ekkul. Da eppi, na heppe, deɗ amuppa kekeɗ dahilad ag bittumttum gokkulag. Ge, da imu doottem. Na, Kayak, na dahil ehanittak daattem.

^10-11 Da Kayak, da nuhig nai binag mettem; Ao, da Yawe, da nuhig nai binag mettem amu, da nuhignu oolppa genab doottem amunu, da ii baɗapa. ⌊Kayak Nug danab dahilppa aɗi hekkulagnu ii uuatteb hekkulag amu,⌋ danab ag aɗi keeke dahilppa hekkulagnu elele iitta.

¹² O Kayak, da keeke laa na amenppa genab hekkulnu nai ain qakkami amunu, da aɗi hekkulnu ami amu, da amu hekkuloitte. Ao, da ena heme anaknu ofa hein medakkulnu ami amu, da amu awen, na gumitten wain medakkul.

¹³ Da anam hekkulnu diig am na hee, da ii mauhmi. Ao, na hee da nein ii qemi. O Kayak, na dahil amahlak, na da bau dayak meɗattem; da na oot hette bia wanppa dayeye oikkulnu, na dahilnu anam heme.