Sam 55 - Nobonob Baibel

Laa nug layag dimug meum ele, nuhig unuqittak iikku

Imuam Dawitnu sam; am maskil laa. Dawit nug danab kwaia gumattenu yom. Danab laa ag musik haknu keeke muɗi ele qebeppeg, laa ag sam imu ahi ettaglagnu daatte.

¹ O Kayak, na dahil unuqittak dookkutnu oɗ medattem! Ao, da ehaniɗkkutnu oninppa ettem haenppa amu, na daut ii itumnanu unuqidttem.

^2-3 Na dahil unuqittak doona, nob ena meɗakkutnu oɗ medattem. Dahil kekeɗ ag nai nau dahilnu atteb. Ao, nau hak danab ag guittak meɗaglagnu dabmena, amelag behabe, da neekkiɗtteb. Ag anam hetteb amunu, da uug digdig toniɗe, elele iittanab doottem. Da anam doottemnu diig am, ag heeg, da guittak doottem. Ao, ag dahilnu oolag nauhe, ag da aon aon iutteb.

⁴ Da ool unuqagppa guittak nau doottem. Ao, da mauhkkulnu heiyi, baɗak eheɗ nau da toniɗkkunu wagai ma hette.

⁵ Da baɗe, hahaɗttem. Ao, da uug amu oh antten, ameg iɗuak dooi, toniɗom daatte.

⁶ Da ami. “Oh, da am uppuɗil beɗulag nakok laa bia haul ele daappilob. Ao, da anam bia daalomlob, da hagagɗe ukken, hik awe daalom.

⁷ Antte! Da anam daalomlob amu, da hagagɗe, umanab atu taɗakppa, atu toettakppa ukken daalom. Sila.

⁸ Da pahanab hagagɗe ena dayaknu abenppa golom. Aben amuppa uug imu da ii toniɗlob.” Da anam aakku ami.

⁹ Naɗi, da kobol laa, laa guittak nau mauhnoak mettak, amu nug mehqak ele, da amu aab okkaippa daye anidttem. Anam amunu, na nau hak danab amu hadappe nauhkkulagnu oɗ medattem. Ao, na heppe, nau hak danab amu ag ahilag nai laippu ii daamanu unuqidttem.

¹⁰ Amun tuqan ele danab kobol nau hetteb ele ag aab okkainu aɗ attan, ⌊ag yabhoi hena, guittak mattaglagnu neegnan⌋ oitteb. Danab ah aab okkai ooppan ag oo aeg bak akka akka ahilagnu henana, guittak nug medatteb.

¹¹ Aab okkaippan danab ah ag, ag akka akka ahilkad keeke hatteg nauhtteb. Ao, ag tuɗidib nug eheɗ hattaglagnu mattinna, ag nug buppuidtteb.

¹² Amu dahilnu amu, kekeɗ laa nug awa awa naunab niɗalo amu, da uugnab ii doolom. Yo, dahil kekeɗ laa beɗuppa tak ha, nug da awa awa naunab niɗalo amu, da lokkumlom.

¹³ Amge anam iitta. Dahil kekeɗ nug awa awa naunab ii niɗatte. Iitta. Amuam na, da layal ena laa, na hettem. I am laippu oittep. Da na ele i laippu daattep.

¹⁴ Anukka, i nai ena laippu mattimuɗ. Ao, i gamag ahakppa danab ah oolagppa Kayak laugppa oh gottamuɗ.

¹⁵ Dahil kekeɗ ag hanhan kobol nauib hetteb amunu, ag dab-ii-menana mauhkkulagnu ool daatte. Ao, ag paha moɗppa nokkulagnu ool daatte.

¹⁶ Dahilnu amu, da Kayak unuqidppi, Yawe Nug da ehaniɗeb, padal ii mepa.

¹⁷ Buttua, amun, tuqan ele da unuqittak baal okkaippa uug nau toniɗom imunu hebippi, Yawe Nug da baal dookku.

¹⁸ Yawe Nug da danab kuɗum ag niɗaglagnu henana, banel uɗitteb dilagppanu qagaiettakppanu eɗua uhuqak ha meɗa atognoiɗkku.

¹⁹ Kekeɗ dahil ag ahilag hak digdig baoliglagnu uutteb. Ag Kayaknu ebehilag oh bodoetta le mak ii hetteb amunu, Kayak, Nug am king hanhannu, Nug da dooiɗa heeb, ag uɗalag eheɗ nekku. Sila.

²⁰ ⌊Da layal, nuhignu amu,⌋ nug laikkud banelag gotte. Nug aɗi hekkunu layag ele nug tituana nai qakkakppa aum amu, nug amunu hamu bia doya, tippala, ii hette.

²¹ Nuhig nai amu enanag, ee enanag bia, amge nug ooppa amu, nug nug qaknuib hette. Yo, nuhig nai amu enanag, beɗu laittaknu goɗen enanag bia, amge nug oo unuqag amu, nug danab ah aqakkunu hette!

²² ⌊Na aun,⌋ na nahip uug Yawe medappe, Nug na atognoidkku. Nug am genab tutukku hak danab uuatteb, nena ii qemana.

²³ Amge, O Kayak, na nau hak danab hadappe nauhna iitta mekkulag. Laa makkuɗe mauhak danab, amu hambuppuak danab ele, ag danab bau daanna, ag mauhkkulag, amge na da padal mepanu ehaniɗkkutnu oolppa genab doottem.