Sam 54 - Nobonob Baibel

Dawit nug Kayak ehanitteb, kekeɗ ag nug ii eɗidmananu unuqittom

Imuam Dawitnu sam; am maskil laa. Dawit nug danab kwaia gumattenu yom. Danab nug Sip danab ag wana, Saul amegppa, “Dawit adeppa lokkumak daatte amu, ig doottem,” aeg doyom haenppa yom. Sam imuam, laa ag musik haknu keeke muɗi ele qebeppeg, laa ag sam imu ahi ettaglagnu daatte.

¹ O Kayak na ɠagattag ele, amu na uɗin, ɠagattag nahip amuppa ehaniɗppe, da ii padal mepanu oɗ medattem. Ao, na ebehin okkai ele amunu, na amuppa heppe, tutukku hak dahil miag atikkunu unuqidttem.

² O Kayak, na oot meɗan, dahil unuqittak dookkutnu oɗ medattem. Ao, na oot meɗan, dahil oɗmak imu dookkutnu oɗ medattem.

³ Aɗinu? Dada danab ag da banel uɗitteb. Ao, danab ag oo doyak ii doon nau hetteb ele, danab amu ag da iuglagnu hetteb. O Kayak, danab amu ag nahipnu hamu bia dootteb. Sila.

⁴ Ag anam hetteb amge antte! Kayak Nug da ehaniɗtte. Ao, Naɗi, na da atognoiɗe, da bau daattem.

⁵ O Kayak, dahil kekeɗ ag da guittak meɗaglagnu maidtteb ele amu, ahilag maittak amu akka ahilagppa heppe bekkunu oɗ medattem. Ao, na dahilnu oo metta ii uuak kobol dim lamidna heppe, ag iitta mekkulagnu unuqidttem.

⁶ O Yawe, na am ena amunu, da na noomppa ɗo hamu mettaknu ofa hekkul. Da na binan mekkul.

⁷ Da anam hekkulnu diig am, da uugppa daaiyi, na da ehaniɗe, qagaiettak ii aomi. Ao, na da ehaniɗe, dahil kekeɗ eɗadmi.