Sam 53 - Nobonob Baibel

Danab ah ag nau hak digdig hetteb

Imuam Dawitnu sam; am maskil laa. Dawit nug danab kwaia gumattenu yom. Sam imuam mahalat kobol dim lamidtte.

¹ Am danab ag Kayak dab-ii-menan ii dim lamidtteb ele ag akka ag oolagppa, “Kayak laa ii daatte,” atteb, danab amu ag diilkad ena iitta, uɗig wak ele. Kobol ag hetteb am, kobol uɗig wak ele. Auntai laa ena ii hette!

² Kayak Nug hab attan dayaya, danab ah oh neekkadtte. Ao, Nug neekkattatta, laippu laa nug diignu doyak tutukku elete, o iittate anidkkunu neegtte. Ge, Nug laippu laa nug Kayak antta dim lamidkkunu madittatta anidkkunu neegtte.

³ Nug neegtte, amge Nug auntai anam laa heehe ii anidtte. Ag oh am Kayak dimedappig. Ag oh diilkad ena iitta, uɗig wak ele daatteb. Laippu laa ena ii hette. Iittanab!

⁴ Amu Kayak Nug oɗ mette. “Danab ag kobol nau hetteb, ao, danab ag laa bret latte, amubia ag danab dahilad hattaeg nauhtteb, ge, danab ah ag da Kayak ii unuqiɗtteb ele amu, danab amu ag da ag bu madakkulnu iite dabmetteb?” awa oɗ mette.

⁵ Kayak Nug heeb, danab ah nau hetteb ele ag baɗan humananab qekkulag. Ag anukka baɗappig, amge haen imuppa ag eheɗnab baɗaglag. Aɗinu? Kayak Nug ⌊nuhikkud danab ah, Nug⌋ ahilag kekeɗ, ag banelag uɗiglag ele amu, Nug ag hatteb nauhna autna aoglag. Yo, ag Israel, ag heppeg, ag uɗalag nekku. Aɗinu? Kayak Nug ag geɗadkku.

⁶ Da Kayak, Nug Sion Qaukoppa daatte amu, da Nug nuhikkud danab ah, Israel, Nug ag ehanatteb, ag padal ii memananu ool naɗi daatte! Ao, Kayak Nug nuhikkud danab ah, Jakop buɗuppud, Nug ag ehanatteb, ag eɗun ena daanna, ag gamag ahak doyeg! Ge, Israel danab ah ag gamag aheg!