Sam 52 - Nobonob Baibel

Kayak Nug keeke oh gumaama daatte

Imuam Dawitnu sam; am maskil laa. Dawit nug danab kwaia gumattenu yom. Amu Dawit nug Edom ted Doeg, nug Dawit Ahimelek toppa ukke ehanittomnu Saul amegppa a doyom amu, nug amunu yom.

¹ O ban danab naɗi, ⌊Doeg,⌋ aɗinu na nakka na eheɗ hemenu binan mettem? Kayaknu oo mauhaknab kobol ⌊dahilnu dim lamidtte am⌋ hanhan daatte.

² Na hanhan buttua ukka tueb batak Kayaknu danab ah hadappe nauhkkulagnu maittak aottem. Na aɗi keekenu attem, amuam resa laa aeg naunab ele, laa otaɗe guittak dootte, nahip nai amubia hette. Na nai attem amu, danab ah ag amunu oolag guidtte. Na hambuppuak nai madikkutnu doon autna aottem.

³ Na kobol nau hekkutnu oot mauhtte. Na ena hekkutnu oot ii hette. Yo, na hambuppuak nai madikkutnu oot mauhtte. Na nai genab madikkutnu oot ii hette. Sila.

⁴ Na nai mattiak nahip-ppa laa guittak mattaknu oot mauhtte. Na am hambuppuak danab laanab!

⁵ Amge Kayak Nug heeb, na nauhna, iitta mekkut. Ao, Nug na ɠagattagnab aɗaitta, Nug na baenppan oolagppan awitta, buɗitteb, laih gokkut. Ge, Nug heeb na mauhkkut. Sila.

⁶ Genab tutukku hak danab ah ag, ag amu anidna, ag Kayaknu ebehilag oh bodoetta le mekku. Ao, ag Kayaknu uɗat amu anidna, ag inam akkulag.

⁷ “Danab nug Kayaknu padal mak eɗitteb ena dayaknu ehanittak daatte ii dabmette ele amu, nuhigppa bette umu antteg! Nug nuhig en okkai nug ehanidkku dabmeum, ⌊amge ii ehanittom⌋. Yo, nug nuhig eheɗ hak nug ehanidkku dabmeum, ⌊amge ii ehanittom⌋,” aon akkulag.

⁸ Amge da amu, da olip ad laa, Kayaknu mettid lag, amuppa enanag bette, da amubia daattem. Ao, da Kayaknu oo mauhaknab kobol daatte amu, da amunu oolppa hanhan genab doottem.

⁹ “O Kayak, na keeke ena ena ele hena meɗame amunu, da alet, hanhan na onin humakkul. Genab, na am ena amunu, da nahipad danab ah ag nahipnu oo metta ii uuak kobol dim lamidtteb ele, da ag noolagppa binan mekkul.”