Sam 51 - Nobonob Baibel

Hipunin uhuqa mettaknu unuqittak

Imuam Dawitnu sam; Dawit nug danab kwaia gumattenu yom. Sam imuam Dawit nug ewau pakkua he, Batseba ele gappai hepiɗ, dimppa propet Natan nug amunu Dawit toppa ukkom, am amunu nai.

¹ O Kayak, na ig danab ah, na ihinignu oo mauhaknab doottem amunu, na dahilnu oot gai-iitta doon oot meɗan ehaniɗkkutnu oɗ medattem. Yo, na ig danab ah, na ihinignu na oot bodoetta, le ma auta autanab aotte amunu, na dahil hipunin uhuqna meɗakkutnu unuqidttem.

² Na heppe, da oolppa aab iitta daakkunu oɗ medattem. Yo, na dahil hipunin uhuqna meɗan heppe, da oppiaawak bekkulnu unuqidttem.

³ Aɗinu? Da hipunin hemi amu, da doottem. Yo, da hipunin hemi amu, da amu daul atikkunu elele iitta.

⁴ Da hipunin na, nahip-ppanab hemi. Ge, da nahip neekkakppa eheɗ hemi. ⌊Amu genab, da hipunin laa dilagppa hein, ahilagnu eheɗ hemi, amge diigppanab⌋ da hipunin nahip-ppa hemi. Ge, da nahip neekkakppa eheɗ hemi. Da hipunin hemi amunu, na Kayak, haen na dahilnu, “Na hipunin heme,” attem am, na tutukkuib attem. Yo, haen na da hettoɗiakppa meiɗna, na kobol tutukkuib hettem.

⁵ Antte! Anai menuiɗom, haen amuppa da hipunin danab daami. Ge, anai ooppa nid bekkulnu meul oum, haen amuppa da hipunin danab daami.

⁶ Na danab ah ag oolag unuqagppa doyak diig genabib daakkunu oot daatte amunu, na da ool unuqagppa, da danab doyak dabmak ena ele, da danab anam daakkulnu ippuniɗkkutnu unuqidttem.

⁷ Na dahil hipunin oh uhuqna meɗan heppe, da oppiaawak daakkulnu oɗ medattem. Ao, na heppe, da oppiaawak bein, lamen hakkab bia daakkulnu unuqidttem.

⁸ Na hipunin dahil uhuqna meɗappe, diig amunu da baula gamag ahak okkai dookkulnu oɗ medattem. Ao, na da bu iume, amge gemu na heppe, da gamag ahak dookkulnu unuqidttem.

⁹ Na dahil hipunin oh uhuqna meɗan, na amunu baula ii dabmemanu oɗ medattem. Ao, na heppe, eheɗ hak dahil oh iitta mekkunu unuqidttem.

¹⁰ O Kayak, na heppe, da ool unuqag oppiak ele daakkunu oɗ medattem. Ao, na heppe, dahil dabmak tutukku ele dayeye, na dim lamidkkulnuib hekkulnu unuqidttem.

¹¹ O Yawe, na oot da meɗan, na heppe, da na uuitten ii gopanu oɗ medattem. Ao, na oot da meɗan, nahip Ouɗi oppiaawak ele, na Nug dahilppanu aɗilna ii aomnanu unuqidttem.

¹² Hipunin danab nug oo eɗue, na ehanitte, padal ii ma, maɗoɗppan gamag ahak dootte amu, na heppe, da maɗoɗppan gamag ahak amu doomi, baula dookkulnu unuqidttem. Ao, na da ehaniɗppe, da na oɗen dim lamidkkulnu ool dayeb, da amu hekkulnu ɠagattag meɗakkutnu oɗ medattem.

¹³ Am na anam hekkut dayeb amu, da geha nahip haknu hipunin danab ah ippunadppi, ag nahip-ppa eɗun uɗiglag.

¹⁴ O Kayak, da padal mepanu ehanittak am naib. Da am eheɗ nau hemi amunu, na heppe, da mauhkkulnu elele, amge O Kayak na heppe, da ii mauhpa, da bau daakkulnu unuqidttem. Na anam hekkut amu, da gamag ahak okkai doyen, da nahip genab tutukku hak kobolnu ahi edakkul.

¹⁵ O Naɗi, na da oɗel ehanidppe elele dayeb, da oɗelppa na humidkkulnu oɗ medattem.

¹⁶ Aɗinu? Da doɗ manen, na mettalom amu, na enanagnab ii doolom. Am da manen mettalomnu oot anam daalo, da anam helom. Ao, da manaknu ofa manen mettalom amu, na ii aolom; na ena ii doolom.

¹⁷ Amu genab na doɗ mana mettaknu oot ii daatte, amge na oot daatte am, danab nug hipunin qeum, nug ooppa guittak okkai doyaya, nukka nug onig qeeb nekkunu oot hette. O Kayak, danab hipunin heum ele nug ooppa guittak okkai doyaya, nukka onig qe nette dayeb, nug baula hemanu dabmekku dayeb amu, na danab amu ii geɗidmana. Iitta. Na hipunin amu uhuqna medakkut.

¹⁸ Na enanag, elele doon, danab ah Sion daatteb amu ehanadkkutnu oɗ medattem. Yo, na Jerusalem danab ah ehanadppe, ɠagattag daaglagnu unuqidttem.

¹⁹ ⌊Na anam hekkut amu⌋, ag mana mettak genab tutukku ele hekkulag. Ao, na enanagnab dookkutnu, ag manaknu ofa hekkulag. Ge, ag makau dawai manadna mettaglag.