Sam 50 - Nobonob Baibel

Kayak noobppa dup noa binag mak kobol tutukkunu nai

Imuam Asapnu sam.

¹ Laa Ɠagattag Okkai Ele, Nug Kayak, Nug Kayak Yawe, Nug danab ah oh, ag laih aam bedeppanu ukkak laih aam nodeppanu danab ah aabaab ohppanu ag uɗina, Nug gukkuidna uɗiglagnu atte.

² Sion, nuhig neekkak am qa oppiaawak ele. Kayak Nug Sion appa dayeye, nuhig amahlak appanu aha, aben ohppa ukka amahaltte.

³ Ihinig Kayak Nug uɗitte. Nug ii toettama; oɗe ii qamutma. Nug uɗieye, aab ewak naɗinab Nug noobppa dayeye, ulah naɗi Nug talilitta daatte.

⁴ Kayak Nug nuhikkud danab ah epeɗiadkkunu, Nug hab, wan ele aa uɗiya, aa laa aɗi heehe anttomnu mattiak danab daayya, anidpiɗnu akkulahnu onilahppa ette.

⁵ Nug atte. “Danab ah aun aɗi ag dahilnu tituana meɗak daatteb, ag aun aɗi ag doɗ main meɗaeg, amuppa ag da ele nug tituanta nai qakkat laippu daattem amu, ag dahilppa uɗieg!” awa atte.

⁶ Hab daup ag Kayak Nug genab tutukku kobolib dim lamidtte ippunigtteb. Aɗinu? Nug nukka, Nug am epeɗiak danab daatte ⌊amu Nug hanhan nai doya mala hettoɗia epeɗia elele mettak kobolib dim lamidtte⌋. Sila.

⁷ Kayak Nug atte. “Dahilad danab ah, da appi, ag doyeg! Ao, Israel danab ah, da ahilag eheɗ haknu amu appi, ag dooglag. Da Kayak, Da ahilag Kayak.

⁸ Da ahilag mana mettaknu amu, da ii aladttem. Ao, da ag manaknu ofa hanhan main meɗattebnu amu, da amunu ag ii aladttem.

⁹ Amge da makau dawai laa ahilag aɗ ooppanu ii awen amu, da keeke laanu tutu mekkulte? O iitta da meeme dawai laa ahilag aɗ ooppanu ii awen amu, da keeke laanu tutu mekkulte? Iitta! Amunu da ag doɗ maitteb amu, da awaknu duttunak laa ii doottem.

¹⁰ Aɗinu? Doɗ oh atuppa daatteb am dahilib. Ao, makau wan ohppa daatteb, amu ele am dahilib.

¹¹ Ai dakkuɗ ele am dahilib. Ao, doɗ iɗu iɗu oh wanppa oitteb am dahilib.

¹² Wan, amu keeke oh amuppa daatteb ele am dahil amunu, da enug iutte elelob, da ag ee meɗaglagnu oɗ madakkulte?

¹³ Da Kayak, da makau dawai teppu lattemte? Ge, da meeme dawai tiilag lattemte? ⌊Iitta,⌋” awa atte.

¹⁴ ⌊Ag hamu doɗ main, Kayak aib medappig. Iitta!⌋ Ag ena heme anaknu ofa hena, Kayak metteg! Ao, ag aɗi keeke Kayak Attannab Laa Oh Eɗattak Nug mettaglagnu ag ahilag nai ɠagattag qettan appig ele amu, ag nai amu dim lamidna, anam heig!

¹⁵ Amu Kayak Nug atte. “Haen nau laa uɗieb amu, ag da unuqiɗppeg, da ag ehanadkkul. Ao, da ag ehanadppi, ag da binal mekkulag.” Kayak anam awa atte.

¹⁶ Amge Kayak Nug nau hak danab dilag atte. “Ag dahil ɗo oɗelagppa maditteb, amge aɗinu? Ao, ag nug tituana nai qakkak ig hemut ele amu oɗelagppa maditteb amge aɗinu?

¹⁷ Ag anen anen ag dahil tolittaknu nau ninig ele dootteb. Ag dahil ɗo dimedappig daatteb.

¹⁸ Haen na yab danab laa anidna amu, na nug ele layam batatep. Na danab ag laa waalkad ele niitteb amu, na amu dilag ele laippu daattem.

¹⁹ Na tuɗid ele nai eheɗ madittem. Na hanhan nai hambuppuak madittem.

²⁰ Na awante o iitta, na amapte, na nuhignu nai nauib hanhan madittem. Ao, na awante, o amapte, anilah laippuppan, na nug onig nauhkkunu na nai nau nuhignu madittem.

²¹ Na amu oh heehe, da Kayak, da na bu ii mettami. Ao, da na bu ii nittami amunu, dahil hak amuppanu na da eletai kobol nau amubia hettem dabmeme. Amge da anam ii hettem. Da na daut baten, hettoɗiakppa meidkkul.

²² Ag laa ag da dimeɗan, dahilnu ii dabmetteb ele amu, da ag bu naunab madappi, auntai laa ag ehanadkkunu laa ii daamanu, ag dahil nai imu doyeg!

²³ Danab laa nug ena heme anaknu ofa ha, da meɗakku dayeb amu, amuam ena. Amuppa nug da binal mette. Amu da nug ehanidppi, nug padal ii memanu ippu dahil ippunidkkulnu amu, nug ofa amuppa ib amu matultte.” Kayak Nug anam awa atte.