Sam 5 - Nobonob Baibel

Dawit nug Yawe ehanitteb, qagaiettakppa ii daamanu Yawe unuqittom

Imuam Dawitnu sam; Dawit nug danab kwaia gumattenu yom. Danab laa ag dumuttum iwalppeppeg, laa ag sam imu ahi ettaglagnu daatte.

¹ O Yawe, na da unuqidttem imu dookkutnu oɗ medattem. Na dahil dabmak unuqag daatteb imunu dabmekkutnu unuqidttem.

² Da auntai laa ii unuqidttem, na aakkuib da unuqidttem amunu, O dahil Kayak, dahil King, da na ehaniɗkkutnu unuqidttem imu dookkutnu, da na oɗ medattem.

³ O Yawe, da buttua unuqitti, na doottem. Ao, da buttua anen anen da oolppa aɗi keekenu na oɗ medakkulnu dabmettem ele amu, da na unuqidttem. Ge, da unuqittette, na da ehaniɗkkutnu ool maɗoɗ ele amen mein daattem.

⁴ Amu O Kayak, na danab ag nau hetteb ele, na nau hak amunu na ootppa ena ii doottem. Danab ah ag nau hak danab daatteb, ag na ele daaglagnu elele iitta.

⁵ Beɗuppa tak danab ag na noomppa ii daamna. Ao, na danab ag kobol nau hetteb ele, na ahilagnu nau ninig ele doottem.

⁶ Geha na danab ag hambuppuak nai maditteb ele hadappe nauhkkulag. Ao, na Yawe, na laa ag laa makkuɗadtteb, ag laa hambubutteb ele, na amu dilagnu ootppa uuaknab doottem.

⁷ Na oo mauhaknab kobol dim lamidttem amunu, da na lautppa wakkulnu elele. Da nahipnu ebehil oh bodoetta le me doyen, nahip mettid lag nahipnu tituanak daatte ele, da amu neekkitten, da dup noin binan mekkul.

⁸ O Yawe, na genab tutukku hak kobolib heehe, da na ulum meɗakkutnu oɗ mettem. Ao, na nahip hak, nahip nai ele am miag atiak heppe, kekeɗ ag da ii eɗilmananu unuqidttem.

⁹ Aɗinu? Kekeɗ dahil ag nai genab mattiglagnu elele iitta. Ao, ag oolag unuqagppa laa hadappeg nauhkkulagnuib oolag ahak daatte. Mattiak ahilag am uɗig wak nau, mauhak moɗ ooppan bia. Ge, ag nai maditteb, amge nai amuam nai hambuppuak.

¹⁰ O Kayak, na epeɗiadna, ag eheɗ hetteb appe, miag atiak daakkunu oɗ medattem. Ao, ag laa dilag pelem metteb amu, ag pelem amuppa nokklagnu unuqidttem. Ge, ag na waatppa ii daan, tappe nak hetteb amunu, na hipunin ahilag kuɗum, na amunu lamadppe, ag laih gokkulagnu ool daatte.

¹¹ Amge na heppe, aun aɗi oh ag padal mak eɗitteb ena dayaknu ehanittak nahip-ppanu aotteb amu, ag oo gamag ahak dooglagnu unuqidttem. Ao, na heppe, ag gamag ahak ahi hanhan ettaglagnu ool daatte. Ge, na laa ag nahipnu oo mauhak doonna oitteb ele ehanadppe, ag padal ii memana, ag nahipnu gamag ahak naɗi dooglagnu oɗ medattem.

¹² Aɗinu? Amu O Yawe, na genabnab danab ah ag genab tutukku hak kobol dim lamidtteb ele itadttem. Ao, na ii helom bia me, na hee, nahip ehanittak amuam guppiɗ bia taliliatta daatte.