Sam 49 - Nobonob Baibel

Danab nug enubnu ooppa genab dootte ele, nug kaaka hette

Imuam Kora buɗub dilag sam; Ag danab kwaia gumattenu yaappig.

¹ Danab ah oh ag imu doyeg! Ao, wanppan danab ah oh ag daulag human doyeg!

² Na danab okkaite, o na danab okkai iittate; na danab enun elete, o na daɗek danabte, na daut human doon autna awe!

³ Da doyak dabmak ena elenu nai madikkul. Ao, da keeke da ool unuqagnab daaegeg doottem ele ippunadppi, ag amuppa diignu doyak tutukku aoglag.

⁴ Da daul humen, oiyak ehanittaknu nai tutu laa doyen appi dooglag. Ao, da harp qeinne, nai amu mehuqppi dooglag.

⁵ Uug laa bette haenppa amu, da baɗakkulnu diig laa ii daatte. Ao, kekeɗ ag taliliɗna daatteb haenppa amu, da baɗakkulnu diig laa ii daatte.

⁶ Kekeɗ dahilad amu, ag ennu oolagppa genab dootteb. Ao, ag enulag okkai okkai amu ehanatteb, padal ii memana atteb.

⁷ Ag anam atteb amge iitta. Auntai laa nug layag mauhaknu qagaiettakppanu eɗua uhuqak hekkunu elele iitta. Ao, laa nug mauhkkunu heeb, layag nug Kayak en okkai metteb, qagaiettak amuppanu uhuqkkunu elele iitta.

⁸ Danab laa nug layag mauhmanu en okkaippa ehanitteb, qagaiettak amuppanu uhuqkkunu hekku amu, nug en okkainabppa hekkunu daalo, amge laa nug en naɗinab amubia ele am iitta amunu, laa nug layag enppa ehanitteb, ii mauhmanu hekkunu elele iitta.

⁹ Auntai laa layag ehanitteb, nug bau hanhan daakkunu elele iitta. Auntai laa layag ehanitteb, nug moɗppa ii nokkunu laa iitta.

¹⁰ Amuam genab. Aɗinu? Ig oh anidttem. Danab Kayaknu ii dabmena ii dim lamidtteb, kaaka danab ele, ag oh mauhtteb, amge ig ele anidttem, danab ah doyak dabmak ena ele, ag ele mauhtteb. Ag oh mauhna, ahilag en uun ukkaeg, laa ag en amu aotteb.

¹¹ Danab Kayaknu ii dabmena, ii dim lamidtteb, kaaka danab ele amu, ag oh mauhna, hanhan moɗppa niitteb, Ao, ag hanhan appaib daatteb. Ag onilag aon, wan laala onilag aakku medappig, amge laa ag wan amu aon daaglag.

¹² Danab ah bau daatteb haenppa ag enulag ele daattebtai, amge ag bau hanhan ii daamna. Ag doɗ bia mauhkkulag.

¹³ Imu ele dabmetteg! Danab ah ag akka ahilagnu, “Ig ikka ig elelenab daat, laappanu ehanittak keeke laanu awaknu ii daattem,” atteb amu, ahilagppa inam bekku. Ao, laa ag akka ahilagnu ena, elelenab dootteb amu, ahilagppa inam bekku. Sila.

¹⁴ Danab ah amu amu, ahilag gumak danab Mauhak, nug omalattebeb, ag sipsip mauhtteb bia mauhna, moɗppa gokkulag. Butti aɗi, Kayak Nug genab tutukku hak danab ah ehanattak haenppa amu, haen amuppa genab tutukku hak danab ah ag gumadkkulag. Danab ah amu ag mauhppeg, beɗulag moɗppa beɗakku. Ag laulkad ena ena amuppa ii daamna. Moɗ ahilkad amu, ag laulkad guguittak ii daamna.

¹⁵ Amge dahilnu amu, Kayak Nug moɗppa niiaknu qagaiettakppanu eɗua uhuqak ha meɗeb, da mauhak eppegppa ii daapa. Aɗinu? Nug heeb, da Nug eppegppa daakkul. Sila.

¹⁶ Danab laa ag enulag ele aon daappeg amu, na diig amunu aib dabmak huana aome. Ao, ag lag okkai okkai enanagnab hattana daappeg amu, na diig amunu aib dabmak huana aome.

¹⁷ Aɗinu? Ag mauhna, ag keeke laippu laa iinab aon ele gomana. Ao, ag moɗppa ahilag en ele akkan ii nomana.

¹⁸ Danab nug bau dayaya, nug enub awawa, nug enub amu ohnu gamag ahakkutai. Ao, nug anam dayebeb, wanppan danab ah ag anidna, ag onig okkai mettaglagtai.

¹⁹ Anam daakkutai, amge diig amunu nug laa oh mauhppig bia iite mauhma? Nug mauhkku. Nug baula aam beeb ii anidma.

²⁰ Danab ah ag bau daanna, enulag naɗi ele daatteb, amge ag diignu doyak tutukku iitta ele amu, ag doɗ mauhttebbia daatteb.