Sam 48 - Nobonob Baibel

Sion am Kayaknu aab okkai

Imuam Kora buɗub dilag sam; Am ahi laa.

¹ Yawe Nug onig okkai ele; danab ah ag Nug binag mekkulagnu elelenab. Nug onig aab okkai Jerusalem appa meum daatte. Danab ah ag Nug appa binag mekkulagnu daatte. Ge, ag nuhig qaukoppa, Nug binag mekkulagnu daatte. Qauko amuam nuhignu tituanak daatte.

² Qauko Sion amu attannab, anttak nuhig enanagnab. Wanppan danab ah oh ag qauko amu anidna, ag gamag ahak okkai dootteb. Qauko Sion ⌊am Kayaknu,⌋ am nuhig tituanak daatte. Kayak Nug wanppan king laa oh eɗattak daatte, amu Jerusalem, ⌊Sion qaukoppa daatte amu, aab⌋ amuam nuhig aab okkai.

³ Kayak Nug, Sion ooppa aben aɗ ɠagattagnab ele daatteb, Nug amu ohppa daatte. Ao, nug danab ah Sion daatteb ele, Nug ahilag aab aɗ ɠagattagnab ele bia daatte.

⁴ Wanppan king oh laippu aɗaeg o, ag Jerusalemnu daup ele ban hekkulagnu uɗippig

⁵ Amge ag gukkuidna gona amu, Kayak Nug aab okkai amu dabmetta, atognowo anidna, ag dabmak huanak aon, ag eheɗ nau baɗan, oolna goppig.

⁶ Appa ag Kayak Nug aab amu atognotte anidna, ag huanaknab baɗappig. Ao, ag anidna baɗan, ag ⌊ahilag dabmak aab amunu dim lamidkkulagnu elele iitta doon,⌋ ag ah nid aokkun haaha, nug guittak naunab doyaya, beɗu aab qette, ag amubia guittak ⌊oolagppa⌋ dooppig.

⁷ Amuam genab, ulah kaɗag laa uɗia he, Tarsis uub ag nauhppig, amubia na king, ahilkad daup ele ag uɗin, Jerusalem ele ban hekkulag heeg, na Kayak, na hee, ag nauhppig.

⁸ Tatam ig daunigppaib doomut, gemu ig amenigppanab anidmut. ⌊Jerusalem danab ah ag Kayak oɗe genab dim lamidkkulag dayeb amu,⌋ Kayak Nug nuhig aab okkai Jerusalem, Nug hanhan aab amu atognobob, padal ii mema. Jerusalem am Kayaknu aab; am Yawe Nukka Ɠagattag Oh Ele, nuhig aab. Sila.

⁹ O Kayak, ig nahip mettid lakka gota, oo mauhaknab kobol nahipnu dabmak unuqag aotta daattem.

¹⁰ O Kayak, na am binan okkai ele amunu, danab ah wan atu ohppan ag na binan metteb. Nahip hak am genab, tutukku aakkuib.

¹¹ O Kayak, na nai doya mala hettoɗia epeɗia elele mettak kobol dim lamidttem amunu, danab ah Sion qaukoppa daatteb ele, ag gamag ahak dootteb. Ao, danab ah Judanu aab anen anenppa daatteb amu, ag gamag ahak dootteb.

^12-13 Amu ag buɗulkad dona daabppeg, ag madippeg dooglagnu elele daaglagnu, ag gona aab Sion talilidna, italna antteg! Ao, ag oinna, lag attan ta ukkak menppa hak gane daatteb ebaqeeg! Ag ele nuhig wan buue te aɗ itak bia daatteb tutukku dabmetteg! Ge, ag aab ooppa aben aɗ ɠagattagnab ele laa daatteb oh anatteg!

¹⁴ Aɗinu? Kayak Nug ⌊he, keeke amu anam⌋ aakku daatte amunu, ag buɗulkad amelagppa appeg dooglagnu, ag anam antteg! Kayak, Nug am ihinig Kayak hanhannu daatte. Nug omaikkebeb ukkeb, ihinig mauhak batakku.