Sam 47 - Nobonob Baibel

Yawe Nug okkai laa oh eɗadtte

Imuam Kora buɗub dilag sam; Ag danab kwaia gumattenu yaappig.

¹ Wan atu ohppanu danab ah ag eppelag tap qenana, gamag ahak doon, huana enana, Kayak binag okkai humeg!

² Aɗinu? Yawe Attannab Laa Oh Eɗattak amu, danab nug Nug toppa dayaya, nug ebehi oh bodoetta le mette. Ao, Nug am king anuqak, nug danab ah wan atu ohnu gumadtte.

³ Nug ig Israel ehanikke, ig wan laalappan danab eɗadmut. Yo, Nug ig ehanikke, ig danab ah huu laappanu gumadttem.

⁴ Nug wan ig daattem ele imu ihinignu, ig aunig daakkunu tituanom. Yo, ig Jakop buɗub, ig nuhikkud danab ah daattem. Nug ihinignu oo mauhtte. Wan imu ig daattemppa amu, ig wan amunu oonig huana hette. Anam amu, wan amunu, Yawe Nug wan amu ig mekkom. Sila.

⁵ Kayak Nug hab attan teete, danab ah ag oolag gamagnab ahe, huana enana, binag okkai humappig. Yo, haen Yawe Nug hab attan teete amu, danab ag trampet huana iwalppig.

⁶ Danab ah ag ahi ettaladnana, Kayak binag okkai humeg! Ag ahi ettanna, binag meig! Yo, danab oh ag king ihinig binag mekkulagnu ahi ettanna, Nug binag okkai humeg! Ag ahi ettanna, binag meig!

⁷ Kayak Nug wan atu ohnu king daatte. Nug am wan atu ohnu king amunu, ag ahi laa Nug humittaknab nuhignu etteg!

⁸ Kayak Nug wan atu oh gumadtte. Nug sia king nuhigppa daatte. Sia king amuam Kayaknu tituanak daatte.

⁹ Wan atu ohppanu danab okkai ag danab ah Abrahamnu Kayak dim lamidtteb ele, ag Nug ⌊binag okkai mekkulagnu⌋ uɗin, Kayaknu danab ah ele laippu qagmena daatteb. Aɗinu? King laa oh ag ele Kayak waappaib daatteb, Nug ag gumadtte. Kayak Nug attannab daatte. Nug keeke laa oh eɗadtte.