Sam 46 - Nobonob Baibel

Kayak Nug ig ele daattem

Imuam Kora buɗub dilag sam; Ag danab kwaia gumattenu yaappig. Am ahi laa. Ah ag baalag attannab ele, ag ahi imu ettaglag.

¹ Kayak Nug am padal mak eɗitta ena dayaknu ehanittak ihinig, amu ɠagattag ihinig ele daatte. Nug ig uugppa daapput ehanigkkunu, hanhan guguikkak daatte.

² Kayak Nug am padal mak eɗitta ena dayaknu ehanittak ihinig daatte amunu, ig ii baɗamta. Iitta! Mimte neeb, qauko pana yuppa nokkutai, amge ig amunu ii baɗamta.

³ Yute uɗala, oqotti huan oa, hipaɗ qaaqa heeb, qauko uɗalkkutai, amge ig amunu ii baɗamta. Sila.

⁴ ⌊Am le naɗi, le amunu le ippu danab eppelagppa buuppig ele, le ippu amu ag danab ah gamag ahak okkai madatteb, amubia⌋ Kayak Nug danab ah ag nuhig aab okkaippa daatteb ele, Nug ag gamag ahak okkai madatte. Aab okkai amuam Kayaknu tituanak daatte, Kayak Attannab Nug amuppa daatte.

⁵ Kayak Nug aab okkai amuppa daatte amunu, aɗitai laa uɗalkkunu ii daatte. Ao, Kayak Nug danab ah appa daatteb ehanatteb, ag padal mak ii anidmana. Tuqan uug bekkutai, amge buttua, wakkaɗebeb, Nug ag ehanadkku.

⁶ Wan imuppan wan anen anennu danab ah ag akka akka nug qeegeg, ɗo maɗoɗ laala nena qetteb. Anam, amge Kayak Nug nai maditte, haen amuppa wan baolia le bia daatte.

⁷ Yawe Nukka Ɠagattag Oh Ele, Nug ig oonigppa aakku daatte. Ao, ig Jakop buɗub daattem amu, ihinig Kayak Nug aab aɗ ɠagattagnab ele ihinig bia daatte. Sila.

⁸ Ag dona, Yawe Nug keeke heum amu antteg! Ao, ag dona, wan imuppan wan anen anen ⌊appan danab ah ag ban haknu oolag mauhak daatteb ele amu,⌋ Nug attemnab he nauhppig amu antteg!

⁹ Nug anam heehe, danab ah ag nug qak hekkulagnu elele iitta daatteb amunu, wanppa ban ii daatte. Nug ahilag lat tanig, ban ele qiialatta, guppiɗ ele aab aɗuppa manatte eotteb.

¹⁰ Yawe Nug atte. “Danab ah wanppanu, ag toettan daan, ag imu doyeg! Da am Kayak. Da geha wanppan wan anen anen oh dilag king daakkul. Ao, da geha wan ohnu king daakkul.”

¹¹ Yawe Nukka Ɠagattag Oh Ele, Nug ig oonigppa aakku daatte. Ao, ig Jakop buɗub daattem amu, ihinig Kayak Nug aab aɗ ɠagattagnab ele ihinig bia daatte. Sila.