Sam 45 - Nobonob Baibel

King nug ah aokkunu ahi

Imuam Kora buɗubppan dilag sam; am maskil laa. Am ahi onig Lili baagppa ettaknu. Imuam danab ah ewau matulak awaknu ahi.

¹ Da dabmak enanagnab awewe, da ool huananab gamag ahatte! Ao, da kingnu nai ena ena madikkul. Ge, da lemaɗul am danab laanu pen, nai ena ena yaaladtte, amubia daatte. Da yaakkulnu iitta, amge da oɗelppa madikkul.

² Danab laala ag iɗulag tuqak ele, amge na ag oh eɗadttem. Na nai ena, nai ubuhi ele, nai maɗoɗ ele, na nai amu oɗenppa madittem. Na anam hettem amunu, Kayak Nug tuɗid ele na itidtte.

³ O king ɠagattag ele, na nahip qep elab na heqonppa qakke! Ao, na king, na dagom onig ɠagattag okkai naɗi ele, na keeke amu lamen bia takke!

⁴ Na king, na dagom onig ɠagattag ele amunu, doyak diig genabib, onig qe nak kobol, amu genab tutukku hak kobol ele, keeke amu oh ɠagattag daaglagnu na ahan gona, ban hena, na amunu kekeɗ eɗadkkutnu ool daatte! Ao, na gona, nahip ɠagattagppa ban kobol naɗinab, danab nug nahip hak amu amegppa antta, o daugppa doya, nug ebehi oh bodoetta le mekku amu, na hak amu hekkutnu oɗ medattem.

⁵ Nahip lat doɗo am aelkad hawaɗnab ele amunu, aeg amu ag nahip kekeɗ gamalagppanab otuladna notteb. Wan imuppan wan anen anenppan danab ag na noomppa nena qena, na baen waappa niitteb. ⌊Anam amunu Kayak he, nahip ɗo maɗoɗ attem daattenu dabmak inam dayaɗ!⌋

⁶ “O Kayak, ɗo maɗoɗ na kalame ele am hanhan daakku. Ao, nahip ɗo maɗoɗppa amu, nai doya mala hettoɗia epeɗia elele mettak kobol am anuqak daakku.

⁷ Na genab tutukku hak kobolnu oot mauhtte, kobol naunu amu, na nau ninig ele doottem.” Anam amunu, ⌊O king,⌋ Kayak, Nug am nahip Kayak, Nug goɗen gokkaɗakppa tituanitta, maɗoɗppan gamag ahak okkainab, king laa oh eɗattak, na mettom.

⁸ Keeke muttuɗig enanag, onig mir, alo, kasia ele, ag amu aon, lamen elab nahip laitteg, muttuɗig enanab otte. Na nahip launad enanagnab, appa amu, ag elepan aelkadppa keeke digdig hena, bala madappig. Na launad amuppa ahiettak danab ag ahi ettan autna aon heegeg, na doon, gaman ahatte.

⁹ Na waatad oolagppa king aɗelkad ag aakku daatteb. Amu kuin nug bala, bala amuam gol Opir wanppanu hak amu, kuin nug bala amu awa ma, na eppen naɗiap-ppa hibaitta daatte.

¹⁰ O ah makkun, ⌊king aɗeg wan laappanu⌋, na daut human, da doiɗe! Ao, na da aɗi attem amu, na dabmettan autna awe Na danab ah nahipad, amu na appan uma elenu daut atiaɗ!

¹¹ Na am ah iɗun tuqaknab, amu ⌊Israel⌋ dilag king nug amunu enanagnab dootte. Nug am nahip naɗi amunu na nug binag okkai mette!

¹² Tair danab ah ag na keeke kuɗumnab ena ena, nahip daakkunu hamu mettaglag. Danab ah en okkai ele ag na ahilagnu ii helom bia me, na ehanadkkutnu, ag na keeke nahip daakkunu hamu mettalag.

¹³ ⌊Wan laappan⌋ king aɗeg amu, nug nuhig neekkak am enanagnab, amu nug lag oo nuhigppa daatte. Nuhig lamen am muɗi golppa hak, muɗi laa ele, amuppa koitak daatte.

¹⁴ Nug nuhig bala enanagnab me dayeye, ag nug omalna, na king, ag nahip-ppa uɗitteb. Nug dimugppa ehanittak ah nuhikkud, ag nug omaleg uɗitteb.

¹⁵ ⌊Wan laappan⌋ king aɗeg amu, nuhikkud ehanittak ah ele, laa ag omaltteb ele, ag gamag ahak okkai dootteb. Ag oolag gamag ahe, ag uɗin, kingnu lag enanagnab ooppa notteb.

¹⁶ O king, na begapad ag na mamenad aɗi oulag daaglag. Na heppe, ag wan imu ohppan dilag gumak danab daaglag.

¹⁷ Da heppi, danab ah ag hanhan na dabmettaglag. Da anam hekkul, diig amunu amu, wan ohppan danab ah ag na onin okkai hanhan mettaglag.