Sam 44 - Nobonob Baibel

Kayak Nug danab gumebeb, ena daakkunu unuqittak

Imuam Kora buɗub dilag sam; am maskil laa. Ag danab kwaia gumattenu yaappig.

¹ O Kayak, ig mamenkad aɗi, ag na anukkanab keeke oh na heme, ag amunu amenigppa mattieg doomut. Yo, ig nai amunu daunigppanab doomut.

² Ig mamenkad aɗi ii uɗippig dayeye, danab ah Kanan daappig ele ag na ii dim lamitteg ukke, haen na ig mamenkad omaladna uɗin, haen amuppa na laa ag wan anen anenppa wan imuppa daappig, na he, Israel ag danab amu lamatteg, na wan imu ig mamenkad aɗi mattame. Yo, na danab ah, ig mamenkad aɗi dilag kekeɗ, ag Kanan daappig ele amu, na hee nauheg, na hee ig mamenkad aɗi ag elele daappig.

³ Amu ag akka, ahilag qep elabppa wan amu ii aoppig. Ge, ag akka ag ahilag ɠagattagppa, kekeɗ wan amuppa daappig ele ii eɗadppig. Amu iitta. Na ahilagnu oo mauhak doome amunu, na ag ele hanhan daan hena, nahip ɠagattag amuppa ehanatte, ag kekeɗ eɗadppig.

⁴ ⌊O Kayak,⌋ na am dahil King, dahil Kayak ele. Naib danab ah nahipad, Jakop buɗub, na ag ehanatte, ag ahilkad kekeɗ eɗadtteb.

⁵ Na nahip ɠagattagppa ehanikke, ig ihinkad kekeɗ eɗadttem. Ib laappa anam ii hettem. Ao, na ig ehanigttem, diig amunu ig ihinkad kekeɗ eɗadttem.

⁶ Da dakka dahil latppa kekeɗ eɗadkkulnu oolppa genab ii doottem. Am genab, dahil qep elab nug ehaniɗeb, da ena daakkulnu ii dabmettem.

⁷ O Kayak, naib na hee, ig kekeɗ ihinkad eɗadttem. Ao, naib na hee, laa ag ihinignu nau ninig ele dootteb ag nena qena, uɗa nak aotteb.

⁸ O Kayak, diig amu ohnu ig deɗ oh amun tuqan ele, na ig ehanikke padal ii memutnu danab ah amelagppa mattignig. Ig hanhan na binan mekkunig. Sila.

⁹ Amge gemu na ig dimekkan hee, ig gai-iitta daattem. Ao, na ig Israel, na ihinig ban danab ban gokkulagnu ii omaladttem.

¹⁰ Na hee, kekeɗ ag heegeg, ig oolta gomut. Yo, kekeɗ ag keeke ihinkad, am ahilag iitta, am ihinkad, amge ag akkan, ihinig wan ele aoppig.

¹¹ Na hee, ig am sipsip danab aqadkkunu gotteb bia daattem. Ao, na ig huu okkai laala oolagppa tamtam daagnignu heme.

¹² Danab nug keeke enanag laa daden maknu ma heeb, laa nug men doɗo honapnab metta aokkutai. Anam bekkunu elele, amu na ihinignu anambia heme anidttem. Ao, na ihinig kekeɗ uuatte, ag ig eɗigna awigna meikkeg, laa ag ig awigppig, amge na keeke laa ihinignu ii aome.

¹³ Na hee, ig aabaab danab ag taliligna daatteb ele, ag ig aon aon iqan autna aotteb. Ao, danab ah ig talilikkak aabaab daatteb ag, ag ihinignu awa awa qettak nai naunab nau anan, ag ihinignu, “Am keeke hamunab,” dootteb.

¹⁴ Na hee, wanppan wan ohppa danab ah ag ig am nau bekkunu at daattem dabmetteb. Ao, wan laalappan danab ah ag aon aon iqan, ihinignu nai eheɗ maditteb.

¹⁵ Da deɗ oh amun tuqan ele uɗa nak guittak ele doottem. Ao, uɗa nak da oolppa hanhan ambak daatte.

¹⁶ Danab ah ag awa awa qettak nai aegeg, da uɗa nak amu aakku doottem. Ao, kekeɗ ag uɗin, ag nob nau da meɗaglagnu heegeg, da uɗa nak amu doottem.

¹⁷ O Kayak, ig nahipnu ii daunig atiom. Ao, ig na ele nug tituanta nai qakkamut, nai amuppa ig aɗi aɗi hekkunignu daatte amu, ig nai amu ii uumut. Ig tappaut ii neum. Amge uug imu iikku ihinigppa betteib.

¹⁸ Ig oonig unuqagppa na ii dimettamut. Na, ig aɗi hekkunignu ame amu, aakku hetataib daattem.

¹⁹ Amu na hee, ig padal meut, na ihinig wan hee, doɗ jakal ag amuppa daatteb. Ao, na hee, gatatu naunab ig tonikkom.

^20-21 O ihinig Kayak, ig nahipnu dup noa binan mak kobol haknu ii dimettamut. Ig kayak laa ii unuqadmut. O Kayak na, na ig aɗi hettem amu, na amu doottem. Ig lokkumakppa keeke hettem am, na anidna doottem amunu, ig kobol nau amu helomlob, na amu doon autnanab aolom.

²² O Kayak, danab ah ag ihinignu nau ninig ele doottebnu diig am, ig na dim lamidttem amunu, ag ig deɗ oh amun tuqan ele iqaglagnu hetteb. Ao, danab ag sipsip lanaknu baalag otaɗadtteb, amubia danab ah ag ig iqaglagnu dabmak aotteb.

²³ Am anam daatte amunu, O Naɗi, na ahakkutnu oɗ medattem! Na ig ii ehanigttemnu diig am, da ii doottem. Ao, na ahakkutnu unuqidttem! Na ihinig nai ii doottem amu, na amubia tuɗidna hanhan hemananu, da na oɗ medattem.

²⁴ Na laih neegna, ig nahip ehanittak aognignunab daattem ii anigkkut am ena iitta amunu, na anam ii hemananu oɗ medattem. Ao, danab ah ɠagattag ag heeg, ig guittak dootut, eheɗ heigtteb. Na heppe, ag tuɗidna, amu hemananu unuqidttem.

²⁵ Aɗinu? Kekeɗ ihinig ag heeg, ig neta qeta, wanppa eheɗnab niittem. Ao, ihinig kekeɗ ag ig eɗikkeg, ig gappudppa neta qeta niittem.

²⁶ Na ahan dona ig ehanigkkutnu oɗ medattem! Ao, na nahip oo mauhaknab kobol dabmena, na ig qagaiettakppanu eɗua uhuqak dayaknu hekkutnu unuqidttem.