Sam 43 - Nobonob Baibel

Danab nug uugnu unuqittom

¹ O Kayak, na heppe, tutukku hak dahil miag atikkunu ool daatte. Ao, danab ag nahipnu oo metta ii uuak kobol ii dim lamidtteb amu, ag da naippa meiɗppeg, na dahilppa daanna, ahilag nai qeppe nekkunu oɗ medattem. Ge, haen danab nau, ag hambuppuak danab, ag da heiɗppeg nauhkkulnu heppeg amu, na ehaniɗppe, da ag eppelagppa, qagaiettak amuppa ii daapanu unuqidttem.

² Aɗinu? Na am dahil Kayak, na aakkuib am dahil padal mak eɗitteb ena dayaknu ehanittak daattem. O Kayak, na da uuiɗme, bael laippu daattemnu diig am appe dookkulnu ool daatte. Da gai-iitta daaiyi, dahil kekeɗ ag da eheɗ heiɗegeg, da mahieye oittem amu, na amunu diig appe dookkulnu ool hette.

³ O Kayak, na amahlak nahip, amu doyak diig genabib nahip ele meppe nekkunu oɗ medattem. Na keeke amu oh meppe uɗiya, aa da atognoiɗya omaiɗpeɗ, qauko Sion, qauko amuam nahipnu tituanak daatte, na amuppa daattem amu, da amuppa gokkul.

⁴ Na anam heppe amu, O Kayak, da nahip qaɗabppa wakkul. O Kayak, na maɗoɗppan gamag ahak da meɗan, oo enanagnab doyak ele da meɗattem. Nahip qaɗabppa amu, da harp qeinne, na binan medakkul. O Kayak, na dahil Kayak.

⁵ Aɗinu da oolppa elele iitta doottem? Ao, aɗinu da oolppa oo doyak okkai doottem? Da amu ii helom bia daatte amunu, da Kayaknuib dabmeinne, ena bekkulnu dabmak aɗe oikkul! Aɗinu? Da Nug eɗue, baula binag mekkul. Nug am dahil padal mepanu ehanittak daatte; Nug am dahil Kayak.