Sam 42 - Nobonob Baibel

Uug ba, diia ukka, laih me dayak danab laanu unuqittak

Imuam Kora buɗub dilag sam; am maskil laa. Ag danab kwaia gumattenu yaappig.

¹ Dia laa nug lenu baag diie, baag qaɗaietta auta awe, nug le antta lakkunu lenag mattia auta autanab aotte amu, O Kayak, anamib, da na anidkkulnu ool daya auta autanab aotte.

² Ao, danab le baag diieb, le antta lakkunu oo huana daatte, anamnab, da Kayak gumitte ukken daakkulnu ool huana daatte. Nug am Kayak bauklel. Ganeb da Nug noobppa daakkul?

³ Da deɗ oh, amun, tuqan ele gayak naɗi heiyi, amel leb nette. Anam amu, amel leppu am dahil ee bia daatte. Dahil kekeɗ ag da aon aon iun atteb. “Kayak nahip adekku? ⌊Nug aɗinu na ii ehanidtte?⌋” aon atteb.

⁴ Da anukka attemnab dayomnu amelppa doowo, ool huana dootte. Aɗinu? Haen amuppa da danab ah kuɗum oh ele, ig Kayak noobppa dup nota, Nug binag mekkunignu gottamut. Ag gamag ahak ahi ettenna, Kayak amegppa, “Ena heme,” aegeg, da anuqen ugekke, ag omalatti, Kayak laugppa gottamut.

⁵ Aɗinu da oolppa elele iitta doottem? Ao, aɗinu da oolppa oo doyak okkai doottem? Da amu ii helom bia daatte amunu, da Kayaknuib dabmeinne, ena bekkunu dabmak aɗe oikkul! Aɗinu? Da Nug eɗue, baula binag mekkul. Nug am dahil padal mepanu ehanittak daatte; Nug am dahil Kayak.

⁶ Da ippa qauko Hermon, qauko Misa, Jodan le gogppa ele guguittak uugnu oola, laih dayaknu danab daattem. Da anam dayeye, da oolppa elele ii doottem amunu, da Kayak unuqidkkul.

⁷ Kayak Nug le unuqag hatta, le baippa nonana, oqotti huana otteb ele hattom. Danab laa nug le amu ooppa nokku dayeb amu, le amu nug laitta tonakku. Anam amu, uug da toniɗom daatte ele amu, amuam le naɗi da toniɗlo bia doottem.

⁸ Anam aakku daatte, amge Yawe Nug deɗ ohppa nuhig oo mauhaknab kobol ii uutte. Tuqan da nuhig ahi edette, da Kayak dahil, Nug da bau meɗatte amu, da Nug unuqidttem.

⁹ Da Nug amegppa attem. “O Kayak, na kekeɗ niɗamanu ehanittak dahil daattem. Diig aɗinu na da uuiɗme? Ao, diig aɗinu, da mahieye, gai-iitta oiiyi, kekeɗ ag eheɗ heiɗtteb?” awe attem.

¹⁰ Dahil kekeɗ ag awa awa iwak nai dahilnu atteb am, nai amuam guittak naunab, mauhaknu bia guiɗe doottem. Ag da ihaklel iuna, deɗ oh amun tuqan ele atteb, “Kayak nahip am adekku? ⌊Nug aɗinu na ii ehanidtte?⌋” aon atteb.

¹¹ Aɗinu da oolppa elele iitta doottem? Ao, aɗinu da oolppa oo doyak okkai doottem? Da amu ii helom bia daatte amunu, da Kayaknuib dabmeinne, ena bekkulnu dabmak aɗe oikkul! Aɗinu? Da Nug eɗue, baula binag mekkul. Nug am dahil padal mepanu ehanittak daatte, Nug am dahil Kayak.