Sam 41 - Nobonob Baibel

Oɗe danab laanu unuqittak

Imuam Dawitnu sam.

¹ Am danab nug daɗek danab ah anatta, nug ahilagnu oo bodoettak ele doyadtte amu, nug itittak ena awom daatte. Danab nug daɗek anam ehanadtte amu, uug digdig nuhigppa betteb amu beegeg, Yawe Nug danab amu ehanidtte.

² Yawe Nug danab amu dabmetta atognobob bau daakku. Ao, Nug geha danab amu, laa ag wan amuppa daatteb ele, amu oolagppanu ititta heeb, nug nuhikkud kekeɗ eppelagppa ii daama.

³ Am laa daɗek dabmadatte ele, danab amu nug oɗe mette dayeb, Yawe Nug nug dabmedatte. Ao, Nug laa nug daɗek dilag dabmette amu ehanitte, nuhig oɗe iitta me, ena daatte.

⁴ Amu dahilnu amu, da unuqitten ami. “O Yawe, da hipunin qein, nahip-ppa eheɗ hemi. Da anam hemi amunu, na dahilnu oot gai-iitta doon oot meɗan ehaniɗppe, da beɗul eɗua ena daakkunu oɗ medattem.”

⁵ Dahil kekeɗ ag dahilnu oo aeg bak doon, ag dahil mauhaknu tappaɗna atteb, “Nug ganeb mauhkku? Ao, Nug ganeb mauheb, laa oh ag nug wanppa dayom am daulag atikku?” aon atteb.

⁶ Haen ag oolagppan laippu laa da aniɗkkunu uɗitte amu, nug hambuppua, nai ena maditte, amge nug oo unuqagppa, nug dahilnu da onil nauhkkunu nai nau anaknu dabmette. Ge, nug aha gotte, da dimulppa nug laa oh amelagppa eheɗ dabmeumnu amelagppa maditte.

⁷ Laa oh ag dahilnu nau ninig ele dootteb, ag otiptip-ppa dahilnu nai nau maditteb. Ag da guittak meɗaglagnu dabmetteb.

⁸ Ag dahilnu mattin atteb. “Nug am oɗe naunab meum; nug mauhkkun niitte. Nug geha bau mekkunu elele iitta,” aon atteb.

⁹ Am da layalnab, da nuhignu oolppa genab doyen, ool mettami, i oh ee lamuɗ ele, nug da kekeɗ meɗom.

¹⁰ O Yawe, na dahilnu oot gai-iitta doon oot meɗan ehaniɗna heppe, da eɗue ena dayen, da eɗuen, ag nob madakkulnu na oɗ medattem.

¹¹ Na kekeɗ dahil uuatte, ag da ii eɗilppig amunu, da imu doottem, na dahilnu ena doottem.

¹² Dahil dabmak oiyak ele am tutukkuib amunu, na hee, da bau daye, nagattoppa hanhan wain daakkulnu elele.

¹³ Ig Yawe, Israel dilag Kayak, ig hanhan alet binag metu. Genab, anam dayaɗ! Genab, anam dayaɗ!