Sam 40 - Nobonob Baibel

Yawenu binag maknu ahi

Imuam Dawitnu sam; Dawit nug danab kwaia gumattenu yom.

¹ Yawe Nug da ehaniɗkkunu, da ool bodoettette dayeye, ameg mein daaiyi, Nug unuqittak dahil doya, da ehaniɗom.

² Yawe Nug da ehaniɗa, Nug danab laa nug layag moɗ nauppanu behie beum bia ehaniɗe, da ena daattem. Ao, danab laa nug layag moɗ lekkoh naunab nau eleppanu ehanitte uɗitte, amubia Yawe Nug da ehaniɗe, da ena daattem. Genab, Nug danab laa layag ehanitta awa, men attan meum bia he, da ena daattem. Ao, Nug danab laa nug layag ehanitta awa, aben baɗak iitta eleppa mette amu, Yawe Nug dahilppa anam he, da ena daattem.

³ Yawe Nug da ahi bau laa ippuniɗom; ahi amuam ihinig Kayak binag maknu ahi. Danab ah kuɗum ag amu anidna, ag Kayaknu ebehilag oh bodoetta le meeb, ag nuhignu oolagppa genab dooglag.

⁴ Danab nug Yawenu ooppa genab dootte, nug dada danab dilagppa ehanittak aokkunu dab-ii-mette, nug kayak hambuppuak ele binalag ii maama oitte, danab amu nug itittak ena awom daatte.

⁵ O Yawe, dahil Kayak, na keeke kuɗum, danab amu hekkunu elele iitta, na aakku heme. Ao, na keeke ena ena kuɗum ihinignu maidme amu, laa nug keeke amu ohnu eɗua, na amenppa ab dookkutnu elele iitta. Keeke na hekkutnu maidttem am huanak, ebqaknu iitta amunu, da ma anttak hein, da laa amegppa keeke amu ohnu akkulnu hekkul dayeb amu, da elele iitta. Am keeke kuɗum, huanak ele.

⁶ O Yawe, na ootppa keeke anuqak am, danab ah ag ofa iɗu iɗu na mettaglagnu ii daatte. Ge, danab ag nahip qaɗabppa manaknu ofa, ib etta hipunin haknu ofa ele na mettaglagnu amu, na amunu ootppa keeke anuqak ii doottem. Kobol na amunu anuqak doottem ele am, danab nug nahip nai dim lamidkku.

⁷ Anam amunu, da ami. “Da iikku daattem. Dahilnu nahip nai buk itoɗiakppa yaak niitte bia amu, da uɗimi daattem.

⁸ O dahil Kayak, nahip dabmaknab awak aɗi daatte amu, da amu hekkulnu ool daatte. Yo, nahip ɗo amu, da oolppa memi daatte”.

⁹ O Yawe, haen Israel dilag tamaniak ag qagmetteb ele, haen amuppa da genab tutukku hak kobolnu amelagppa mehuqe, miagib madittem. Da anamib heine daattem amu, na doottem, da mattiak amunu amu, da oɗel ii qamutpa.

¹⁰ Da nahip genab tutukku hak kobol da oolppa ii tonai daatte. Iitta. Ao, da nahip oo metta ii uuak kobol na dim lamidttem, aria na danab ah ag padal memananu ehanadttem, kobol nahip amu ele amu, da amunu Israel dilag tamaniak amelagppa madittem. Ge, haen ag qagmeegeg, da nahip oo mauhaknab kobolnu, amu nahip doyak diig genabibnu ele madittem.

¹¹ O Yawe, na dahilnu oot gai-iitta doon oot meɗan ehaniɗttem amu, na heppe, kobol amu iitta memanu da na oɗ medattem. Da nahip oo mauhaknab, nahip doyak diig genabib ele dahilppa daayya, hanhan ehaniɗpeɗ, da ena daakkulnu unuqidttem.

¹² Aɗinu? Uug kuɗum, ebqaknu iitta, da taliliɗtteb. Hipunin da hemi am toniɗkkulagnu heegeg, da ib ena laa antte gokkulnu ii anidttem. Uug amu, dahil hipunin ele am da ikkil uɗugnu ebqak am eɗittak. Dabmak dahil am ɠagattag daakkunu elele iitta.

¹³ O Yawe, na da ehaniɗppe da qagaiettakppa ii daapanu oɗ medattem. Ao, O Yawe, na paha dona, da ehaniɗkkutnu unuqidttem.

¹⁴ Na heppe, laa ag heppeg, da padal mekkulnu hetteb ele, ag uɗa nak, ge, ag uɗa nak nau guittak ele dooglagnu oɗ medattem. Ao, laa ag da uug iwe aniɗna, gamag ahak dootteb ele amu, ag bittumttum gonana, uɗa nak nau guittak ele aoglagnu unuqidttem.

¹⁵ Ge, na heppe, danab laa ag dahilnu awa awa qettak nai naunab maditteb ele, ag uɗa nak nau aon anidna, eheɗ ottaippeg, ag uɗa nak nau aon malappignu dabmak aqakkunu ool daatte.

¹⁶ Laa ag dahilnu nau hetteb ele amu, na ahilagppa anam hekkutnu ool daatte, amge na heppe, laa ag na anidna dim lamidkkulagnu na mattidtteb amu, ag ena doon, gamag ahak okkai aoglagnu oɗ medattem. Ao, na heppe, laa na ehanatte, ag padal ii mena, ag amunu enanag dootteb ele amu, ag hanhan, “Yawe Nug hak ena, hak tutukku, hak genabib hette,” akkulagnu unuqidttem.

¹⁷ Amge da am daɗek, keekenu tutu mak daattem; Naɗi Nug da dabmeɗakkunu ool daatte. O Kayak dahil, naib dahil ehanittak daattem. Naib na ehaniɗe da qagaiettakppa ii daattem; na da ehaniɗppe padal ii mepanu haen elab ameg mak ii daapanu unuqidttem.