Sam 4 - Nobonob Baibel

Tueb ehanittak awaknu unuqittak

Imuam Dawitnu sam; Dawit nug danab kwaia gumattenu yom. Danab laa ag musik haknu keeke muɗi ele qebeppeg, laa ag sam imu ahi ettaglagnu daatte.

¹ O dahil Kayak, na am genab tutukku hak kobol aakkuib hettem. Anam amu, haen da na oninppa ettem, na nob meɗakkutnu ool daatte. Haen uug nau iutte amu, na dahilnu oot gai-iitta doon, oot meɗan ehaniɗna heppe, uug iitta mekkunu da oɗelppa aokkutnu oɗ medattem.

² Ag danab ah ag binag amahlak oppiaawak ele Kayak da meɗom amu, ag heppeg, keeke amuam keeke uɗa nak ele daakkunu hetteb; amu haen gane laa ele ukkeb, ag hak amu uuglag? Ag danab ah ag da nau ii hemi, amge ag da nau hemi atteb amu, ag anak amu, amu anak laala diig genab iittappanu ele atteb amu; haen gane laa ele ukkeb, ag anak amu uuglag? Sila.

³ Ag imu doyeg! Yawe Nug genab tutukku hak danab, nuhig daaglagnu epeɗiom. Yawe Nug da Nug unuqitti dootte.

⁴ Na Yawenu ebehin oh bodoetta le meeb, na aib hipunin heme. Ao, na niiak abenppa toettan niinna, na amu oh dabmette! Sila.

⁵ Na mana mettak tutukkuib hena, na Yawenu ootppa genab doye!

⁶ Am danab ah kuɗum ag atteb. “Aun nug ig haen ena ippunigkku?” O Yawe, na ig ele daagnignu, na oot ihinignu ena daakkunu oɗ medattem.

⁷ O Yawe, haen danab ah ag ee aeg huana aon, wain bau ele huan hena, ag maɗoɗppan gamag ahak naɗi dootteb. Anam amu, na maɗoɗppan gamag ahak amu eɗittak da meɗame.

⁸ O Yawe, na aakkuib dabmeɗeɗe, da baɗak iittappa daattem amunu, geha da ool maɗoɗ ele ukke, qein niikkul.