Sam 39 - Nobonob Baibel

Danab guittak doottenu unuqittak

Imuam Dawitnu sam; Dawit nug danab kwaia gumattenu yom. Danab amu onig Jedutun.

¹ Am da dakka da dahilnu ami. “Da dahil oiyak dabmetten, oɗelppa da hipunin hepanu da nai mattiak dahil ele atognoin aute aokkul. Da aɗi nai akkul amu, haen nau hak danab ag taliliɗak daappeg, da dabmein aute awewe, nai akkul.”

² Da anam dakka dahilnu ami amunu, ⌊nau hak danab ag gukkuiɗna daaegeg,⌋ da nai laa iinab mattimi, ⌊amge da ag nai appig daulib doomi.⌋ Da nai ii mattimi, amge amuppa da oolppa uug beum. Da anam heiyi, uug da oolppa dayaya, okkainab meum.

³ Anam aakku beebe, da oolppa uug okkainab doomi. Da amunu dabmak unuqag aoiyi, da oolppa aab ewak bia dayom. Anam aakku daye, da Kayak unuqitte ami.

⁴ “O Yawe, na da ehaniɗkkutnu unuqidttem. Na heppe, da haen adekku mauhkkulnu oittem, deɗ gane aakkuib da bau daakkulnu daatteb amu, da amu dookkulnu ool daatte. Deɗ deɗ amuam paha paha malakkun hetteb, amu na heppe, da amu dookkulnu oɗ medattem.

⁵ Na he, dahil bau dayak haen am tutunab daatte. Nahip neekkakppa, da wanppa bau daattem, bau dayak amunu digma ukka, gogppa tak am keeke ii ba ukkom bia daatte. Ao, danab ah dilag bau dayak haen am tutunab; amuam danab laa nug hik tutuib haen laippuib awom bia daatte.” Sila.

⁶ Danab ah ig am danab ah ittotolag bia daattem. Itotolag amu aɗitai laa ii hette. Ig paha paha keeke kuɗum hettem, amge amu oh am meu iitta. Ig en huana awota, ig mauhttem. Ig mauhota, ig en bakkalen qagmettem amu, ig aun men doɗo amu gumakku ii doottem.

⁷ O Naɗi, anam aakku daatte amunu, da wan imunu keeke laa dabmein, keeke ena bekkunu dabmak aɗe oikkulnu elele iitta. Keeke ena bekkunu dabmak aɗe oikkulnu am nahip-ppaib daatte.

⁸ Da hipunin hemi amunu, na hipunin dahil oh uhuqna meɗan, heppe iitta mekkunu oɗ medattem. Na da uuiɗppe, danab ag Kayak dab-ii-menan ii dim lamidtteb ele ag dahilnu, “Keeke hamunab,” doomnanu unuqidttem.

⁹ O Yawe, na, laa iitta, na, na da bu meɗattem amunu, da na noomppa bakkum daattem; da nai laa ii madittem.

¹⁰ Amge na da bau laa bu meɗamnanu oɗ medattem! Ao, na bu meɗeɗe, da iikku padal mekkulnu hein daattem.

¹¹ Ig danab ah, ig hipunin heutut, na ig toligna, bu megattem. Dittuɗ laa lamen etaɗe nauhtte bia, na danab dilag en hee nauhtte. Ulah, danab noobppa eeɗtte ele, am keeke ɠagattag iitta. Ig ele anamib daattem. Sila.

¹² “O Yawe, na dahil unuqittak dookkutnu oɗ medattem. Na dahil gayak imu dookkutnu unuqidttem. Na dahil gayak imu ii dokkutnu ool ii daatte. Aɗinu? Wan imuppa da wan laihnu danab; aab diig danab iitta daattem. Da mamelad aɗi, ag ele anam aakku daappig.

¹³ Da mauhen, wanppa ii daapa, amge da ii mauhmi, haen gamag imuppa amu, da eɗue, ool gamag ahak ele daakkulnu amu, na da baula bu ii iumnanu oɗ medattem.”