Sam 38 - Nobonob Baibel

Danab guittak doottenu unuqittak

Imuam Dawitnu sam; Dawit nug danab sam imu ahi etteb, Kayak Nug danab amu eɗua dabmedakkunu yom.

¹ O Yawe, na oot nauhebeb, daul ii batamnanu unuqidttem. Ao, na oppoɗin beeb, na toliɗna, bu ii meɗamnanu oɗ medattem.

² Aɗinu? Nahip lat doɗo da iwa, da beɗul ooppa noum. Ao, na eppenppa da oiɗme.

³ Na dahilnu oppoɗin beum amunu, da beɗul oɗe ele. Ao, da hipunin hemi amunu, da beɗul kunum oh oɗe ele.

⁴ Aɗinu? Da beɗulppa aab okkainab, da eɗilak daatte, amu aab amuam keeke uug nau ele, mawaknu elele iitta, amubia daatte.

⁵ Da Kayak dab-ii-maama hak kobol dim lamitten, da hipunin hemi amunu, ihilad yu nak, uɗig wak ele da beɗul iuppig daatteb.

⁶ Ao, da beɗul nauhe, guittak okkai doottem. Deɗ oh, amun tuqan ele da aeqagattem.

⁷ Aɗinu? Da beɗul gakkaɗak okkai ele. Ao, da oɗe eheɗnab memi.

⁸ Da beɗul nauhe, ɠagattag iitta daattem. Da oolppa maɗoɗ iitta amunu, da aiqakkak hettem.

⁹ O Naɗi, na da aɗinunab ool huana hette am na doottem. Na haen oh da mahiak hettem amu, na doottem.

¹⁰ Da oolppa uttu taub dahil am uɗat elele ii hette. Da gai-iitta mei, amel gaɗutte.

¹¹ Da lailad ag da oɗe aomi imunu aomnanu baɗatteb amunu, ag da gukkuiɗna uɗin ii daatteb. Da baeladppanab ag ele laih uma daatteb.

¹² Kekeɗ dahil ag danab laa nug pelem doɗ aɗeb qekkunu mette amubia, ag dahilppa anam bia hekkulagnu hetteb. Ao, danab ag da guittak meɗaglagnu hetteb amu, ag mattiak hena, ag eheɗ nau heiɗkkulagnu maidtteb. Ag deɗ oh amun tuqan ele amu hambuppuak nai maditteb.

¹³ Amge da am danab laa daug ituak ele bia daattem. Da ag maditteb am ii doottem. Da am laa nug nai madikkunu elele iitta, amubia daattem. Da nai laa ahilagnu ii attem.

¹⁴ Amu genab, da am danab laa nug daug ituak ele keeke laanu iinab dootte, da amubia daattem. Da am laa nug nai madikkunu elele iitta, nug nai nob mekkunu ele elele iitta, da amubia daattem.

¹⁵ O Yawe, na da oɗelppa aokkutnu amen mein daye, ehaniɗkkutnu dabmettem. O Naɗi, na am dahil Kayak, ⌊da doottem,⌋ na da oɗelppa aon ehaniɗkkut.

¹⁶ Da unuqitte ami. “Dahil kekeɗ ag dahilnu, ‘Enanagnab na qeum,’ amananu, na ehaniɗppe, da nein ii qepanu oɗ medattem. Ge, dahil kekeɗ ag da eɗilmananu, na ehaniɗppe, da nein ii qepanu unuqidttem.”

¹⁷ Da nein qekkulnu miag daattem. Da hanhan guittak ele daattem.

¹⁸ Amu da eheɗ hak dahil miagib madittem. Da ool unuqagnab ele da hipunin heminu, da, “Gadonnab,” awe attem.

¹⁹ Dahil kekeɗ am kuɗumnab. Ao, da ahilagnu nau laa ii hemi me, ag dahilnu nau ninig ele dootteb.

²⁰ Da genab, tutukku hekkulnu heinne oittem amunu, diig amunu danab ah laala ag kekeɗ meɗatteb. Da ahilagnu ena hettem, amge ag dahilnu nau hetteb.

²¹ O Yawe, na dahilnu awaidna, uma daamnanu oɗ medattem. Ao, O Kayak dahil, na da uuiɗna, uma gona daamnanu unuqidttem.

²² O Naɗi, na am dahil padal mepanu ehanittak daattem. Na paha dona, da ehaniɗkkutnu oɗ medattem.