Sam 37 - Nobonob Baibel

Nau hak danab, ena hak danab ele, ahilagppa attem bekku

Imuam Dawitnu sam.

¹ Nau hak danab ag ena daaglagtai, amge na amunu, “Attemnab anam daatte,” na dabmak amunu tuqa ii awak aib aome. Ao, laa ag eheɗ hetteb ele, na amu dilagnu aib amen qeeb oot elele ii dayom.

² Aɗinu? Gikkiɗah nug paha qaɗaiedatte, amubia nau hak danab ele ag paha iitta mekkulag. Yo, bala haɗag ag haen tutuib daatteb, amubia nau hak danab ag haen tutuib bau daaglag.

³ Na Yawenu ootppa genab doonna, ena hee! Na wanppa daanna amu, na oo metta ii uuak kobol atognonana hee!

⁴ Na Yawe waappa dayaknu enanagnab doon daappe, Nug na oot unuqagnab aɗinu oot daatte am medakku.

⁵ Na wanppa bau daan oikkutnu keeke oh Yawe ulum medakkunu Nug eppegppa mee! Na nuhignu ootppa genab dooppe, Nug na ehanittatta, inam hekku.

⁶ Aam amahlak enanag be, danab ah anidtteb, amubia Nug geha heeb, laa oh ag nahipnu, nug am genab tutukku hak danab anidkkulag. Yo, aam anig amahlak okkainab daye, danab ah anidtteb, amubia Nug heeb, danab ah ag na, na am nai doya mala hettoɗia epeɗia elele mettak kobol dim lamidna hettem dooglag.

⁷ Na Yawe noobppa dagom daappe, Nug nuhig uɗat hekkunu na oot bodoettak ele Nug ameg mee! ⌊Hipunin⌋ danab ag enulag ele daaglagtai, amge na amunu, “Attemnab anam daatte,” na dabmak amu tuqa ii awak aib aɗan oime. ⌊Hipunin⌋ danab ag eheɗ hekkulagnu lokkumakppa doonna, maittak eheɗ aon, ag anam hekkulagtai, amge na amunu ele, na, “Attemnab anam daatte,” na dabmak amu tuqa ii awak aib aɗan oime.

⁸ Aib oo nauhak doome. Aib oppoɗi bak heppe ootppa beum. Aib ootppa hik nittak doome. Amuam heeg, danab ah ag nau hetteb.

⁹ ⌊Ag nau anam aib heppig.⌋ Aɗinu? Nau hak danab ag geha nauhkkulag. Amge aun aɗi ag Yawenu oolagppa genab dootteb, geha ag ii nauhmana. Ge, ag geha ag aulag wan imu aɗan daaglag.

¹⁰ Haen elab iitta, nau hak danab ag qettoɗkkulag; Na ag mattialadna autna aokkut, amge na ag ii anadmana, ag gona malaglag.

¹¹ Aun aɗi ag dagom daan, ag akka onilag qeeg nette ele, ag geha ag aulag wan imu aɗan daaglag Ag daan, ii baɗaglag, ag maɗoɗ naɗi ele daaglag.

¹² Nau hak danab ag am genab tutukku hak danab ah hadappeg nauhkkulagnu ib digdignu maidtteb. Ao, nau hak danab ag genab tutukku hak danab ah dilagnu aelkad emalna daatteb.

¹³ Ag anam hetteb, amge Naɗi Nug ag imadtte. Aɗinu? Nug ahilag gog tak anidtte.

¹⁴ Am nau hak danab ag daɗek danab, danab ah keekenu tutu mak ele, ag ag aqaglagnu, ag qep elab ahilkad diin, lat ele omanadtteb. Ao, genab tutukku hak danab ah dilagnu amu, nau hak danab ag ag aqaglagnu, ag qep elab diin, lat ele omanadtteb.

¹⁵ Amge geha nau hak danab dilagnu amu, geha laa ag ahilkad qep elab ag eppelagppanu aɗadna aɗan, amuppa ag gamalkad otuladnana, ag lat ahilkad ele qiiglag.

¹⁶ Genab tutukku hak dim lamittak am enaib. Laa nug genab tutukku hak danab dayaya, keeke nakoknabib eppegppa aɗakkutai, amge nug genab tutukku hak danab daatte amunu, nug enanag daatte. Amge nau hak kobol dim lamittak am nauib. Laa nug nau hak danab dayaya, enub okkai eppegppa aɗakkutai, amge nug am nau hak danab daatte amunu, nug nauib daatte.

¹⁷ Aɗinu? Yawe Nug heeb, nau hak danab dilag ɠagattag nauhkku, amge Yawe Nug danab ah genab tutukku hak kobol dim lamidtteb ele atognoadtte.

¹⁸ Danab ah ag Yawenu neekkakppa ag oolagppa kaliak laa iitta ele amu, Yawe Nug deɗ deɗ ag atognoadtte; ag am nob ena, ag aulag aakku, hanhan daatte ele aoglag.

¹⁹ Uug naunab haenppa keeke nauhkkulag me, ag am bau elele daaglag. Ge, enug haen daakku me, ag am ee elele ele daaglag.

²⁰ Amu nau hak danab ah ag mauhkkulag. Ao, Yawenu kekeɗ ag dad okkaippan bala haɗag, bala haɗag amu ag laippun mauɗna nena qetteb, ag amubia hekkulag. Ge, Yawenu kekeɗ ag kahug laippun ukka qettoɗtte bia hekkulag.

²¹ Nau hak danab ag, ag lon aona, nob eɗun ii metteb, amge genab tutukku hak danab ag keeke mettaknu oolag qak iitta dim lamidnana, ag laa madatteb.

²² Amu Yawe Nug danab ah itadtte ele amu, ag geha ag aulag wan imu aɗan daaglag, amge nug laa ag eheɗ laa awaknu anak waappa daaglagnu atte, ag mauhkkulag.

²³ Yawe Nug danabnu oiyaknu enanagnab dootte dayeb amu, Nug he, danab amu nug ɠagattag daatte.

²⁴ Nug taataɗ qedakkutai me, nug anam heeb, Yawe Nug eppeg aɗatte amunu, nug na qa, auta autanab ii aoma.

²⁵ Anukka da nid bau daami, gemu da kaino memi, amge Yawe Nug genab tutukku hak danab laa uuitte, nukka hamu dayeye ii anidmi. Genab, da nid naunau ahilkad ag enug aqe, ag laa eenu unuqak uɗat heegeg ele ii anidmi.

²⁶ Genab tutukku hak danab, ag haen oh keeke mettaknu oolag qak iitta henana, ag ele lon ena, eɗua mettaknu uug iitta laa dilagppa hetteb; Ag ahilkad nid ele, ag itittak ena laa madatteb.

²⁷ Ag nau hak dimettan, ena heig! Ag anam hekkulag dayeb amu, ag hanhan ɠagattag, ena daaglag.

²⁸ Aɗinu? Yawe Nug danab ah ag nai doya mala hettoɗia epeɗia elele mettak kobol hetteb amu, Nug amu dilagnu oo mauhtte. Nug danab ah ag oolag Nug mettan, amu haknu ii uun oitteb amu, Nug ag ii uuadma. Nug am genab tutukku hak danab hanhan atognoadkku, amge nau hak danab ag buɗulkad iitta daaglag.

²⁹ Genab tutukku hak danab ag aulag wan imu aɗan, imuppa hanhan daaglag.

³⁰ Genab tutukku hak danab ag doyak dabmak ena elenu nai maditteb. Yo, ag aɗi kobol nai doya mala hettoɗia epeɗia elele mettak kobol dim lamidtteb ele, ag amunu dabmena maditteb.

³¹ Kayaknu ɗo ag oolag unuqagppa ambak daatte. Ag ii nena qetteb.

³² Danab ag nau hetteb ele, ag genab tutukku hak danab maadna daatteb. Ag aqappeg mauhkkulagnu hetteb.

³³ Amge Yawe Nug genab tutukku hak danab ah, ag hipunin danab eppelagppa ii uuatteb daamna. Ao, hettoɗiakppa Nug ag uuatteb, bu ii aomna.

³⁴ Ag genab tutukku hak danab ah ag Yawe aɗi heeb anidkkulagnu ameg meig! Ag hanhan Nug aɗi atte amu heig! Ag anam hekkulag dayeb amu, Nug ag ehanatteb, ag geha ag aulag wan imu aɗan daaglag. Ge, Nug nau hak danab hatteb nauhppeg anadkkulag.

³⁵ Da nau hak danab, nug oo doyak ii doyaya nau hette ele amu, nug ad laa wan ittag enanagppa, anttak enanag be anidtteb bia enanag ba heehe anidmi,

³⁶ amge haen elab iitta nug mauhom! Da nug mattimi, amge da nug ii anidmi!

³⁷ Ag laa, ag danab ah beɗulagppa aab iitta am anatteg! Ao ag tutukku hak danab ah dilagnu dabmak aweg! Aɗinu? ⌊Danab ah amu ag maɗoɗ ele dayaknu oolag mauhtte, amu⌋ Yawe Nug danab ah ag maɗoɗ ele dayaknu oolag mauhtte am ehanatta heeb, ag butti aɗi ii iitta memana.

³⁸ Anam amge hipunin danab amu, Nug heeb, ag padal mekkulag. Ao, nau hak danab ah, ag buɗulkad iitta daaglag.

³⁹ Yawe Nug genab tutukku hak danab ah padal memananu ehanadtte. Uug laa uɗitte am, Nug ban haknu aben ɠagattag ahilag bia daatte.

⁴⁰ Yawe Nug genab tutukku hak danab dilag padal mak eɗitteb ena dayaknu ehanittak daatte; ag ena daaglagnu ag Nug gumidna uɗitteb amunu, Nug ag ehanatte, nau hak danab ag ii eɗadtteb. Ao, Nug ag atognoatte, ag hipunin danab eppelagppa ii daatteb.