Sam 36 - Nobonob Baibel

Danab dilag nau hak kobolnu nai

Imuam Dawitnu sam; Dawit nug danab kwaia gumattenu yom. Dawit nug am Yawenu maɗi nid.

¹ Nau hak danab ah hipunin henan daatteb dilagnu nai meunab ele laa da oolppa daatte. Amu dilag ag Kayaknu ebehilag oh bodoetta le mak ii dootteb ⌊amunu ag aɗi hekkulagnu oolag daatte amu, ag hetteb⌋.

² Aɗinu? Ag akka ag ahilagnu enanagnab dooglagnu ag akka ahilagnu oo eeɗaknu ittag nai maditteb. Ag Yawe Nug ag hipunin heppeg anidkkunu elele iitta daya, ag eheɗ heppignu ag amelagppa ii ama, ag anam dabmetteb.

³ Nau hak danab ag hanhan nai nau, hambuppuak ele maditteb. Ag doyak dabmak ena ele, am kobol ena ele ii dim lamidtteb.

⁴ Tuqan niiak haenppa, ag kobol nau attemnab hekkulagnu dabmak aonna, niiak elele ii niitteb. Ag hak ena laa iinab hetteb. Ag kobol nau aakkuib hetteb.

⁵ O Yawe, nahip oo mauhaknab kobol am naɗinab. Keeke laa attannab lomppa tette ele, am amu eɗittak, naɗinab daatte. Ao, oo metta ii uuak kobol nahip am naɗinab. Amuam keeke laa ta, lombig ooppanab gotte, am amubia daatte.

⁶ Nahip genab tutukku hak kobol amu naɗinab, qauko attannab hume tak, amubia daatte. Ao, nahip nai doya mala hettoɗia epeɗia elele mettak kobol am naɗinab, am yu gamag unuqagnab noa ukkak bia daatte. O Yawe, na danab ah atognoadnana, doɗ ele atognoadttem.

⁷ O Kayak, danab ah ag nahip oo mauhaknab kobolnu oolag huana hette. Na danab ah oh dilagnu padal mak eɗitteb ena dayaknu ehanittak dayeye, ag matuk nakkud anilag haug waappa ena daatteb bia, danab ah ag nahip-ppa ena daatteb.

⁸ ⌊O Yawe,⌋ danab laa nug laugppa ee kuɗum ele dayeye, danab ah ag hanhan wana, ag ee oh oolag heumnu latteb, na amubia danab ah atognoadttem. Danab laa nug le enanagnab ele dayeye, danab ah ag nuhigppa gona latteb, na amubia dabmattan hettem.

⁹ Aɗinu? Na aakkuib am bau dayaknu diig. Na aakkuib hee, danab ah ag bau daaglagnu keeke aon, bau daatteb.

¹⁰ Laa ag na dooidna, oɗen dim lamidtteb amu, na ahilagnu na oo mauhaknab kobol nahip tuqan ii aomnanu unuqidttem. Ao, genab tutukku hak danab ah amu, na ahilagnu genab tutukku hak kobol tuɗidna dim lamidnana ehanadkkutnu oɗ medattem.

¹¹ Na danab ah beɗulagppa tak ele ag uuadppe, da tappiɗna oɗoɗilmananu oɗ medattem. Ao, na nau hak danab uuadppe, da lamiɗppeg laih gopanu unuqidttem.

¹² Nau hak danab ag nena qena niitteb. Ge, laa heeg, ag nena qena, eɗun ahaglagnu elele iitta daatteb.