Sam 35 - Nobonob Baibel

Ehanittak awaknu unuqittak laa

Imuam Dawitnu sam.

¹ O Yawe, na laa ag da ele mehqak hettem ele amu, na ag ele nug mehqak hekkulagnu oɗ medattem. Yo, na laa ag da ele ban hettem amu, na ag ele ban hekkulagnu unuqidttem.

² Na ahan, qahaɗ, aria guppiɗ nahip ele aɗan uɗin, da ehaniɗkkutnu oɗ medattem.

³ Ao, na nahip ban, dahil kekeɗ dilagppa ekkutnu bappaidna daakkutnu unuqidttem. Ge, na dahilnu, “Da geha na padal memananu ehanidppi, ena daakkut,” akkutnu oɗ medattem.

⁴ Amu laa ag da iuppeg mauhkkulnu hetteb ele amu, ag uɗa nak aoglagnu, ge ag uɗa nak, nau, guittak ele dooglagnu oɗ medattem. Ao, na heppe, laa ag da eheɗ heiɗkkulagnu hetteb ele, ag bittumttum goppeg, ahilag dabmak am kaboliak nau ele daakkunu unuqidttem.

⁵ O Yawe, na heppe, ulah iwaleb, ee aeg dappunkkeg uma gotteb, amubia nahip engel laa, nug laa ag da eheɗ heiɗkkulagnu hetteb ele am lamatteb, ag uma gokkulagnu oɗ medattem.

⁶ Ge, laa ag da eheɗ heiɗkkulagnu hetteb ele, ag ippulag am gatatu nau, aiɗikkak ele dayebeb, nahip engel laa, O Yawe, ag lamadkkunu na unuqidttem.

⁷ Da ahilagppa eheɗ laa ii hemi, amge ag pelem laa dahil meppig. Yo, da ahilagppa eheɗ laa ii hemi, amge ag moɗ laa, da amuppa nokkulnu buuppig amunu,

⁸ ag laippun padal mekkulagnu ool daatte! Ag da awiɗkkulagnu pelem meppig amu, ag amuppa tekkulagnu na oɗ medattem. Ao, ag moɗ laa da amuppa noin qekkulnu buuppig, amuppa ag nona qena, mauhkkulagnu unuqidttem.

⁹ Am uug anam ahilagppa bekku dayeb amu, da Yawenu gamag ahak dookkul. Yo, uug amu ahilagppa bekku dayeb amu, Yawe Nug ehaniɗe, da padal ii meminu, da enanagnab dookkul.

¹⁰ Yawe, da na binan meul ohppa ele hume akkul, “Yawe, auntai na bia laal iitta. Na danab ag ɠagattag iitta ele ehanatte, ag danab ɠagattag ele amu, ag ag eppelagppa ii daatteb. Ao, na he, laa ag daɗek danab, danab ah keekenu tutu mak ele, ag amu dilag keeke yab aoglagnu hetteb amu, na he, ag amu hekkulagnu elele iitta daatteb. Daɗek amu ag laa eppelagppa ii daatteb.”

¹¹ Amu aɗi heehe anttomnu mattiak danab laa, ag naippa guittak meɗaglagnu hetteb amu, ag hettoɗiakppa dahilnu, “Nug eheɗ heum,” anana, amuppa ag ahilag naippa da iutteb. Ao, ag keeke laalanu, da anam laa ii hemi, da amunu nakok laa ii doottem ele amu, ag keeke amunu da naippa yaaiɗna, da hemi atteb.

¹² Da keeke ena ena ahilagnu hemi, amge ag dahilppa kobol nau hetteb. Anam amu, da uug doottem.

¹³ Haen ag oɗe mena daaegeg, da ahilagnu mahimi. Ao, da dakka, da onil qei ne, da ele ee ohnu kud mein daami. Ge, da dup noin aute awen, da ahilagnu unuqidmi.

¹⁴ Da ag am dahiladnab, o da baeladppa bianab doye oiyeye mahimi. Ao, da anilnunab, da nuhignu mahilom bia, da dup noin aute awen mahimi.

¹⁵ Amge gemu da uugppa daai, ag gamalag ahatte. Ag gamalag huananab ahe, ag da iuglagnu hetteb. Danab ah ag da banel uɗin hetteb. Ag hanhan da onil nauhkkunu nai nau maditteb.

¹⁶ Danab ag Kayaknu, nuhig haknu ele uuak doon, laa aon aon qedatteb, amubia ag da eheɗnab aon aon iutteb. Ag dahilnu aelkad emalna daatteb.

¹⁷ O Naɗi, ag anam hetteb, amu haen gane laa ele ukkeb, na anam neekkadnaib daappe, ag anam hekkulag? Haen gane laa ele ukkeb, na da ehaniɗkkut? Na danab ag da niɗaglagnu hetteb amu, na ag eppelagppan ehaniɗna awiɗkkutnu unuqidttem. Ao, ag am laion bau bia, na da atognoiɗppe ii mauhpanu oɗ medattem!

¹⁸ Am na da kekeɗ eppelagppanu ehaniɗna awiɗkkut dayeb amu, da Israel dilag tamaniak noolagppa, nahipnu “Ena heme,” awe akkul. Yo, da danab ah oh noolagppa, na binan mekkul.

¹⁹ O Yawe, dahilad kekeɗ dilagppa da eheɗ laa ii hemi, amge ag da eɗilkkulagnu hetteb. Anam amun na uuadppe, ag anam hemananu unuqidttem. Ao, danab ag dahilnu diig iittappa nau ninig ele dootteb, ag heppeg, da nein qekkulnu hetteb. Anam amu, na uuadppe, ag heppeg da nein qepanu oɗ medattem.

²⁰ Aɗinu? Ag nai mattiak ahilagppa maɗoɗ bekkunu ii maditteb. Iitta! Ag hambuppuak nai, danab ah laa ag maɗoɗ ele wanppa daatteb, ag ahilagnu maditteb.

²¹ Ao, ag naippa yaaiɗnana, “Antteg! Antteg! Ig amenigppanab na amu hee anidmut!” anan etteb!

²² O Yawe, na amu ohnu doottem. Ag nai hambuppuak maditteb, amu na amunu bu madakkutnu oɗ medattem. O Naɗi, na da ii uuiɗmananu unuqidttem,

²³ Na ahakkutnu oɗ medattem. Da keeke eheɗ laa ii hemi me, ag hamu da bu iuglagnu hetteb; na ag ippulag amu oo nekkutnu ool daatte. Na da hettoɗiakppa ehaniɗkkutnu unuqidttem. Na am dahil Kayak, na dahil Naɗi.

²⁴ O Yawe, dahil Kayak, na genab tutukkuib hettem. Na heppe, da eheɗ laa ii hemi, da tutukkuib hemi miag atieb, danab ah ippunadppe anidkkulagnu oɗ medattem. Na heppe, dahil kekeɗ ag da imiɗmananu unuqidttem.

²⁵ Na uuadppe, ag aɗi dahilppa hekkulagnu oolag daatte amu, ag amu hekkulagnu elele iitta daan, “Ig nuhignu aɗi hekkunignu oonig dayom aakku hemut,” amananu oɗ medattem. Na uuadppe ag doɗ laa, nug doɗ laa aqa ladatte, amubia ag aakku da eɗilppig amananu unuqidttem.

²⁶ Laa ag da uug nau doottemnu gamalag ahatte ele, ag uɗa nak nau dooglagnu oɗ medattem. Ao, danab ag da eɗilkkulagnu huana hetteb ele amu, ag uɗa nak aoglagnu, ge, ag uɗa nak nau guittak ele dooglagnu unuqidttem.

²⁷ Amge danab ah ag na hee, da tutukkuib hemi miag atiom anidna dabmena, ag amunu enanagnab dootteb ele amu, ag am gamag ahak okkainab madakkutnu oɗ medattem. Na heppe, danab amu ag hanhan, “Ig Yawe, Nug nuhikkud maɗi nid maɗoɗ ele daakkunu oo huana hette ele, ig Nug hanhan attanib daakkunu oonig daatte,” akkulagnu unuqidttem.

²⁸ Na anam hekkut dayeb amu, da geha nahip genab tutukku hak kobolnu danab ah oh amelagppa ainne, deɗ oh amun tuqan ele am naib binan mekkul.