Sam 34 - Nobonob Baibel

Danab nug Yawenu kobol enanu Nug binag mette

Imuam Dawitnu sam; Dawit nug Abimelek noobppa kaaka kobol heehe, Abimelek nug lamittomnu haenppa yom.

¹ Da Yawe haen oh binag mekkul. Ao, da hanhan Nug binag mekkul.

² Da Yawe Nug attem attem heum amu, da amunu Nug binag mettem; laa ag oolagppa elele iitta dootteb ele amu, ag dahil nai doon, ag oolagppa ɠagattag qak dooglagnu ool daatte.

³ Ahappeg, ig Yawe, nuhig ɠagattagnu maditu! Ao, ig oh Nug onig okkai medatu!

⁴ Da Yawe antten, dim lamidkkulnu mattie unuqitti, Nug doya, da ehaniɗom. Nug da ehaniɗe, keeke oh da amunu baɗami amu, keeke amunu laa dahilppa ii beum.

⁵ Aun aɗi ag Nug ehanadkkunu Nug gumidna watteb ele, ag gamag ahak okkai dootteb. Nug ag ehanatte, ag deɗ laa uɗa nak ii aotteb.

⁶ Da am daɗek danab laa, amge Yawe unuqitti, Nug doya ehaniɗe, uug dahil oh eɗidmi.

⁷ Yawenu engel nug laa oh ag Yawenu ebehilag oh bodoetta le mette ele, nug ag guguattak dayaya, nug ag ehanatte, qagaiettakppa ii daatteb.

⁸ Na danab laa nug ee laa lana, miti ena doya, ena dootte, amubia na Yawe attem attem daatte dookkutnu he! Nug enaib daatte; Nug enaib hette. Danab ah aun aɗi ag nuhignu, “Nug am padal mak eɗitteb ena dayaknu ehanittak dahil daatte,” ag anam dootteb ele amu, ag itittak ena aoppig daatteb.

⁹ Aun aɗi ag Yawenu ebehilag oh bodoetta le mette ele, ag tutu makppa ii daatteb amunu, ag danab ah ag Yawenu oo metta ii uuak kobol dim lamidtteb ele, ag nuhignu ebehilag oh bodoetta le maɗ!

¹⁰ Am laion bau ag haen laala enug aqadtte, amge aun aɗi ag Yawe anidna dim lamidkkulagnu Nug maditteb amu, ag keeke ena laanu tutu ii memana.

¹¹ Dahilad nid naunau ag dona, nai dahil doyeg! Ge, da ag Yawenu ebehilag oh bodoetta le mekkunu ippunadkkul.

¹² Ag oolagppanu, na aun na bau daakkunu oot daatte; Ao, ag oolagppanu na aun na haen elab daanna, na dayak ena daanna, gamag ahak dookkutnu oot daatte ele,

¹³ na aɗi attem amu, na amunu pehettak dabmena, nai eheɗ aib mattime! Ao, nai hambuppuak laa aibnab aib mattime!

¹⁴ Na eheɗ hak dimettan, kobol enaib he! Ao, na laa ele maɗoɗ ele daaglagnu wagai me!

¹⁵ ⌊Aɗinu?⌋ Yawe Nug laa ag kobol genab tutukku hetteb ele, Nug ag dabmatta atognoadtte. Ao, Nug ahilag unuqittak doya, ag ehanadtte.

¹⁶ Yawe Nug laa ag kobol eheɗ hetteb ele, Nug ahilag hak amunu eheɗ doyaya oo ii madatte. Ao, Nug danab ah ag nau hak kobol hetteb ele, Nug he, ag padal meeg, Nug he, danab ah ag bau daatteb amu, ag padal meppig ele daulag atia auta autanab aotte.

¹⁷ Yawe Nug genab tutukku hak danab ah, Nug ag ehanadkkunu unuqidtteb amu, Nug ahilag unuqittak dootte. Ge, Nug ag ehanatte, qagaiettakppa ii daatteb.

¹⁸ Yawe Nug laa ag oolagppa guittak okkainab, nau ninig ele dootteb amu, Nug ag gukkuatta daatte. Ao, aun aɗi ag oolagppa, “Da eɗue bau ii daapa,” dootteb ele, Nug ag ehanatte, ag padal ii metteb.

¹⁹ Uug kuɗum am genab tutukku hak danab dilagppa uɗitteb, amge Yawe Nug uug amu ohppan ehanatte, ag padal ii metteb.

²⁰ Yawe Nug genab tutukku hak danab amu dabmatta atognoadtte. Ao, Nug anam heehe, genab tutukku hak danab ebehilag laa ii qiitte.

²¹ Nau hak danab ag nau hak ahilagppa mauhkkulag. Ao, laa ag genab tutukku hak danab dilagnu nau ninig ele dootteb amu, geha bu aoglag.

²² Yawe Nug laa ag Nug waappa daanna nuhig maɗi nid daatteb amu, Nug ag qagaiettakppanu eɗua uhuqak dayaknu hette. Nug laa ag nuhignu, Nug am ahilag padal mak eɗitteb ena dayaknu ehanittak daatte doon, nuhigppa uɗitteb ele amu, Nug ag bu ii mattama.