Sam 33 - Nobonob Baibel

Yawe binag maknu ahi

¹ Ag genab tutukku hak danab ah, ag Yawe binag mekkulagnu ahi etteg! Ao, ag genab tutukku hak danab ah, ag Nug binag mekkulag am ena!

² Ag ahi baag dim lamidna, harp qenana, ahi amuppa ag Yawe onig humeg! Yo, ag ahi baag dim lamidna, laia muɗi nuhig 10 ele qenana, ahi amuppa ag Yawe binag okkai metteg!

³ Ag ahi bau Yawe binag mekkulagnu etteg! Ao, ag oolag gamag aheb, gita keeke elelenab qenana, ⌊ag Yawe binag mekkulagnu⌋ ag qalan eig!

⁴ Ig amu hekkunignu diig am Yawenu nai oh am genab tutukku ele daatte. Ao, Nug aɗi hette amu, Nug oo metta ii uuak kobol dim lamitta hette.

⁵ Yawe Nug kobol genab tutukkunu, nai doya mala hettoɗia epeɗia elele mettak kobolnu ele, Nug kobol amunu oo mauhtte. Nuhig oo mauhaknab kobol am wan atu oh tona mala daatte.

⁶ Yawe Nug a, hab beum daatte. Nug oɗeppa nai mattieye, hoɗopai keeke beppig daatteb.

⁷ Nug yuppan le oh yu daakkunu aben laippu qagmeum daatte. Yo, Nug yuppan le oh aben laippu yu daakkunu qagmeum daatte.

^8-9 Yawe Nug a, wan beum daatte. Yo, Nug bekkununab a, wan ba, ɠagattag eppom daatte. Anam amunu, danab ah wan ohppanu ag Yawenu ebehilag oh bodoetta le maɗ! Yo, danab ah oh ag nuhignu ebehilag oh bodoetta le maɗ!

¹⁰ Yawe Nug danab ah ag aɗi hekkulagnu maittak aotteb ele, Nug ahilag maittak amu he nauhtte. Yo, Nug ahilag dabmak maidtteb amu he, gabotitte.

¹¹ Amge Yawe Nug aɗi keekenu maittak aotte amu, keeke amuam ɠagattag hanhan daatte. Yo, Nug aɗi keekenu oo unuqagnab, amuppa maittak aotte ele amu, keeke amuam ɠagattag hanhan dayaya bette.

¹² Wan atunu danab ah ag ahilag Kayak am Yawe amu, ag itittak ena aoppig daatteb. Ao, danab ah aun aɗi Yawe Nug ag nuhikkudnab daaglagnu tituanattom ele amu, ag itittak ena aoppig daatteb.

¹³ Yawe Nug hab attannu neekke ne, wanppa danab ah oh anadtte.

¹⁴ Yo, Yawe Nug nuhig sia kingppanu neekke ne, danab ah oh wanppa daatteb anadtte.

¹⁵ Nug ag hattom, nug ag keeke oh hetteb amu Nug amu diignu doyak tutukku ele.

¹⁶ King laa nug daup huanak eletai, amge daup amu ag akka ag king amu ehanidppeg, padal ii memanu elele iitta. Ban danab laa ɠagattagnabtai, nug nukka dabmak awa, ɠagattag nuhigppa, nugakka ehanitta, ena daakkunu elele iitta.

¹⁷ Am hos laala, daup ag amu attan tena oinna ban hetteb ele, hos amu ag heeg, daup amu ag kekeɗ ii eɗadtteb. Ao, hos amu ag ɠagattagnab, amge ag danab ag qaɗelagppa daaegeg oitteb ele, ag ag ehanadppeppeg, padal ii memananu elele iitta.

¹⁸ Anam aakku daatte, amge Yawe Nug danab ag nuhignu ebehilag oh bodoetta le mette ele, Nug ag ehanadtte. Yo, Nug laa ag nuhig oo mauhaknab kobolnu dabmenan oitteb ele amu, ag ehanadtte.

¹⁹ Danab ah ag anam hetteb ele amu, Nug ag ehanatteb ii mauhmananu, Yo, eenu tutu mak haenppa, ag dabmattebeb, ag bau daaglagnu, Nug ag dabmadatte.

²⁰ Ig Yawe, Nugib heeb, keeke ena bekkunu dabmak aɗat daat, Nug ameg meta daattem. Ao, Nugib am ihinig ehanittak, ihinig guppiɗ ele daatte.

²¹ Anam amunu, ig Nug, Nug am oppiaawak ele, ig nuhignu dabmeta, ig gamanig ahatte. Yo, Laa amu, ig nuhignu oonigppa genab doottem.

²² O Yawe, na heppe, oo mauhaknab kobol nahip am hanhan ihinigppa daakkunu ig na oɗ medattem. Auntai laa ehanigkkunu elele iitta amunu, ig nahipnu aakkuib dabmettem.