Sam 32 - Nobonob Baibel

Kayak amegppa nahip hipuninnu akkut dayeb amu, Kayak Nug uhuqa medakkunu nai

Imuam Dawitnu sam; am maskil laa.

¹ Danab laa Yawe Nug nuhig hipunin uhuqa mettom ele, nug itittak ena awom daatte. Ao, danab laa Yawe Nug nuhig hipunin oppia mettom amu, nug itittak ena awom daatte.

² Danab laa Yawe Nug nuhig hipunin uhuqa mettom daatte, bu laa aokkunu ii daatte amu, danab amu nug itittak ena awom daatte. Ao, danab laa nug ooppa hambuppuak laa ii daatte amu, nug itittak ena awom daatte.

³ Amu da hipunin dahil miag ii mehuqmi dayeye, da deɗ oh, tuqan amun ele gaaiyi, ebehil gai-iitta meum.

⁴ Aɗinu? Tuqan, amun ele na toliɗkkutnu, na eppen da qaɗelppa uug ele me, aam he, wan leppu qaɗaiettom bia dahil ɠagattag iitta meum. Sila.

⁵ Da anam hei ukke, deɗ laa da hipunin dahil mehuqe, amenppa oh miag ami. Da kobol nau dahil ii lokkummi. Da oh miagib mattien, na Yawe, na amenppa ai, na hipunin dahil uhuqna meɗae, da oolppa aab dayom am iitta meum. Sila.

⁶ Amunu O Yawe, danab oh ag genab tutukku hak kobol dim lamidtteb ele, ag uug bette haenppa na unuqidkkulag am ena. Ao, ag na unuqidkkulag dayeb amu, uug okkai, le naɗi hiɗ bette bia beeb, uug amu ii tonadma.

⁷ Na aakkuib na dahil lokkumak aben, dahil guppiɗ ele daattem! Ao, na da ehaniɗe, nauhakppa ii daattem amunu, diig amunu da ehanittak nahip-ppanu ahi edattem.

⁸ Yawe inam atte. “Da geha na doyak medette, ib na dim lamidkkut ele ippunidkkul. Da geha nahip ulum mettak danab dayeye, dabmak ena medette, da na atognoidkkul.

⁹ Na hos, miul ele ag diignu doyak tutukku iitta ele, ag mamelagnu nai dooglagnu, ag muɗippa qakkaladna gokkulagnu ulum mattaegeg gotteb amu, na amubia aib heme.” Yawe Nug anam awa atte.

¹⁰ Uug digdig geha nau hak danab dilagppa bekku, amge Yawe Nug danab ah ag nuhignu oolagppa genab dootteb ele, Nug ahilagnu oo mauhaknab dootte.

¹¹ Amunu ag genab tutukku hak danab ah, ag Yawe Nug aɗi keeke ena oh heum, ag amunu oolag ena doon, oolag gamag ahaɗ! Ao, ag genab tutukku hak danab ah, ag oo gamag ahak okkainab doon ahi etteg!