Sam 31 - Nobonob Baibel

Danab nug Yawenu ooppa genab dootte amu, nug ehanittak aokkunu unuqidtte

Imuam Dawitnu sam; Dawit nug danab kwaia gumattenu yom.

¹ O Yawe, na am padal mak eɗitta ena dayaknu ehanittak dahil daattem; na heppe, da deɗ laa uɗa nak ii doopanu unuqidttem. Ao, na genab tutukkuib hettem amunu, na da ehaniɗppe, qagaiettakppa ii daapanu oɗ medattem.

² Na dahil unuqittak imu doon, na paha da padal mepanu ehaniɗkkutnu oɗ medattem. Ao, na da kekeɗ niɗamanu ehanittak dahil daakkutnu oɗ medattem. Ge, na aab aɗ ɠagattagnab dahil bia daappe, da nahip ehanittakppa ena daakkulnu unuqidttem.

³ Na am kekeɗ niɗamanu ehanittak dahil, aab aɗ ɠagattagnab ele dahil bia daattem amunu; na oninnu dabmak anuqak awaknu hena, na anuqna, ib ena ippuniɗna, omaiɗkkutnu oɗ medattem.

⁴ Doɗ pelemppa ta daatte bia, kekeɗ dahilad ag da iuglagnu hetteb. Anam, amge na am padal mak eɗitteb ena dayaknu ehanittak dahil daattem amunu, na da pelemppanu uhuqiɗkkutnu oɗ medattem.

⁵ O Yawe, da ouɗil na eppenppa mettem. O Yawe, na Kayak, na doyak diig genabib ohnu diig daattem. Na da qagaiettakppanu eɗua uhuqak hena meɗakkutnu oɗ medattem.

⁶ ⌊O Yawe, na Kayak, na keeke genab ohnu diig daattem.⌋ Da nahipnu oolppa genab doottem. Da laa ag kayak genab iitta dilag oolagppa genab doonna, ag noolagppa dup nona binalag menana daatteb amu, ⌊da amu dilag kobolnu amu,⌋ da nau ninig ele doottem.

⁷ Na uug da iwom anidme. Ao, na da oolppa guittak nau doomi anidme. Anam amunu da nahip oo mauhaknab kobolnu amu, da gamal huananab ahatte.

⁸ Na da uuiɗe, da dahil kekeɗ eppegppa ii wami. Iitta. Na awiɗna, aben okkai enanagppa meiɗe daami.

⁹ ⌊Amge O Yawe, kekeɗ dahil ag aɗailkkulagnu tuɗidna hetteb.⌋ O Yawe, na dahilnu oot gai-iitta doon oot meɗan ehaniɗkkutnu oɗ medattem. Aɗinu? Da ⌊dahil kekeɗ hetteb, diig amunu⌋ uug nau iikku doottem. Da uug imu doyeye, da gaai, gaai, da amel kokoɗ eppom. Yo, da uug amu dooiyi, da beɗul, ool ele uug nau dooyya, ɠagattag iitta doottep.

¹⁰ Haen oh da wanppa dayeye, da uug kuɗum mawewe gaattem. Yo, maɗ oh da wanppa dayeye, da guittak doyeye oittem. Da ebehilad oh ele bodoedatte.

¹¹ Dahil kekeɗ oh ag dahilnu keeke hamunab dootteb. Ao, danab ah laa, ag da gukkuiɗna daatteb ele, ag dahilnu oolagppa uuaknab dootteb. Ge, da lailad ag da ele laippu dayaknu baɗak okkai doon, ag da ibppa aniɗna, ag dekkaɗna, laih gotteb.

¹² Danab laa mauhe, laa ag nuhignu daulag atitte, amubia danab ah oh ag dahilnu daulag atitte. Ao, danab ag waa laa aoɗa nauhomnu kinipan dootteb, ag dahilnu anambia dootteb.

¹³ Aɗinu? Danab kuɗum ag da onil nauhkkunu nai nau dahilnu atteb. Ag anam heegeg, baɗak eheɗ nau toniɗom daatte. Ag da eɗilkkulagnu nai nau dahilnu maditteb. Yo, ag da iuppeg mauhkkulnu maittak aotteb.

¹⁴ Amge O Yawe, da nahipnu oolppa genab doottem. Ge, da attem. “Na am dahil Kayak.”

¹⁵ Da na eppenppa daattem. Kekeɗ ag da iuppeg mauhkkulnu hetteb; laa ag da lamiɗna uɗina, da eɗilkkulagnu hetteb amu, da amu oh dilag qagaiettakppa daapanu na ehaniɗkkutnu oɗ medattem.

¹⁶ Da, da am nahip maɗi nid amu, da na ele daagnihnu, na oot dahilnu ena daakkunu oɗ medattem. Ao, na oo mauhaknab kobol nahip dim lamidna, da padal mepanu ehaniɗkkutnu unuqidttem.

¹⁷ Da nahipnu unuqidmi amunu, O Yawe, na heppe, da uɗa nak ii doopanu da na oɗ medattem. Amge na heppe, nau hak danab ag uɗalag neeb, ag mauhna, moɗppa oɗelag qamutna niiglagnu unuqidttem.

¹⁸ Danab amu ag dada danab daanna, ag genab tutukku hak danab ah dilagnu, “Keeke hamunab” doon, ag diig nau amuppa nai mattin, genab tutukku hak danab ah dilagnu hambuppuak nai maditteb amunu, ag beɗuppa tak danab nai maditteb bia tuɗidna mattimnanu, na ag oɗelag qamutkkutnu oɗ medattem.

¹⁹ ⌊O Yawe⌋ na danab ah ag nahipnu ebehilag oh bodoetta le mette ele, na amu dilagppa keeke ena ena ehanadkkutnu hena, bappaidna aɗattem. Yo, na danab ah ag padal mak eɗidna ena daaglagnu nahip-ppa uɗitteb ele, na amu dilagppa danab ah oh noolagppa kobol ena ena hettem.

²⁰ Na amu, na am nahipad danab ah dilagnu lokkumak aben bia daattem; na ag nakka nahip-ppa lokkumatte daatteb. Na anam hena, kobol amuppa na danab nau ag nahipad danab ah eheɗ hattamananu maittak aotteb amu, na ib oo nettem. Yo, danab ah nahipad dilagnu amu, na daattemppa maatte daaegeg, kekeɗ ahilkad hattappeg nauhkkulagnu nai maditteb amu, na nai ahilag amu qee nette.

²¹ Kekeɗ ag da iuppeg mauhkkulnu taliliɗeg, Yawe Nug miagib dahilnu oo mauhaknab kobol dim lamitta ha, da ehaniɗe, da ii mauhmi amunu, ig Nug binag attannab humatu!

²² O Yawe, ⌊am genab,⌋ da kekeɗ ag anam heegeg antten, da ottaien baɗak okkai doyeye, da nahipnu ami, “Yawe Nug dahil ii dabmette,” amge da na dahilnu oot gai-iitta doon oot meɗan ehaniɗkkutnu oɗ mettai, na oɗmak dahil amu doon, da ehaniɗme.

²³ Ag danab ah ag Yawenu oo metta ii uuak kobol dim lamidtteb ele, ag nuhignu oolag mauhaɗ! Yawe Nug aun aɗi ag nuhignu oo metta ii uuak kobol ii uutteb ele, Nug ag ehanatte, ag ena daan oitteb, amge Nug dada danab ah nob nau ag madatte.

²⁴ Ag aun aɗi ag ahilag dabmak oh Yawe toppa daatte, ag nuhig ehanittak aoglagnu dabmak aɗan oitteb ele amu, ag ɠagattag daan, ag oolag aib bodoettom.